ផ្លូវក្រាលកៅស៊ូជិត៣០គ.ម ឆ្លងកាត់ឃុំចំនួន៣ នៃស្រុកកងមាស នឹងលេចជារូបរាងនាពេលឆាប់ៗ

លោក អ៊ុន ចាន់ដា អភិបាលខេត្តកំពង់ចាម កាលពីថ្ងៃទី១៣ ខែកុម្ភៈ ឆ្នាំ២០២២  បានដឹកនាំអភិបាលរងខេត្ត មន្ទីរជំនាញ អាជ្ញាធរស្រុកកងមាស និងមន្ត្រីបច្ចេកទេស ចុះពិនិត្យវឌ្ឍនភាពការស្ថាបនាផ្លូវក្រាលកៅស៊ូប្រភេទDBST មួយខ្សែប្រវែង ២៧,៣៥០ម៉ែត្រ ដែលជាប្រភពថវិការបស់ធនាគារពិភពលោក និងអនុវត្តគម្រោងដោយក្រសួងអភិវឌ្ឍន៍ជនបទតាមរយៈការស្នើសុំរបស់រដ្ឋបាលខេត្តកំពង់ចាម។

មន្ត្រីបច្ចេកទេស បានជម្រាបជូនលោកអភិបាលខេត្តថា  ផ្លូវ១ខ្សែខាងលើនេះ គឺឆ្លងកាត់ឃុំចំនួនបី រួមមានឃុំព្រែកកុយ កងតាណឹង និងឃុំសូគង នៃស្រុកកងមាស ហើយផ្លូវ១ខ្សែនេះ នឹងបញ្ចប់ការដ្ឋានស្ថាបនានៅចុងឆ្នាំ ២០២២ ខាងមុខ។ លោក អ៊ុន ចាន់ដា អភិបាលខេត្តកំពង់ចាម បានស្នើដល់មន្ត្រីបច្ចេកទេស និងអ្នកទទួលម៉ៅការសាងសង់ សំដៅធ្វើយ៉ាងណាឱ្យការស្ថាបនាផ្លូវខាងលើ ប្រកបមានគុណភាព ស្របទៅតាមលក្ខណៈបទដ្ឋានស្តង់ដារបច្ចេកទេស។ លោកអភិបាលខេត្ត ក៏បានស្នើឱ្យអាជ្ញាធរស្រុក និងគណៈកម្មការត្រួតពិនិត្យផ្លូវខាងលើយកចិត្តទុកដាក់ និងជួយសម្របសម្រួលជាមួយប្រជាពលរដ្ឋ ដើម្បីឱ្យផ្លូវដ៏មានសារសំខាន់១ខ្សែនេះ រួចរាល់តាមការគ្រោងទុក។

បន្ទាប់មក លោកអភិបាលខេត្ត ក៏បានបន្តដឹកនាំក្រុមការងារអញ្ជើញចុះត្រួតពិនិត្យសំណង់ទប់ច្រាំងព្រែកកុយ ប្រវែងម្រមាណ៤០០ ម៉ែត្រ ដែលសម្រេចការសាងសង់រួចរាល់ជាស្ថាពរ៕

ដោយ ៖ ហុង ម៉េង ហៀ