រដ្ឋមន្ត្រីក្រសួងមហាផ្ទៃ ជំរុញអាជ្ញាធរខិតខំដោះស្រាយទំនាស់មូលដ្ឋានដោយសន្ដិវិធី

សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានជំរុញឱ្យអាជ្ញាធរគ្រប់លំដាប់ថ្នាក់ ត្រូវខិតខំសហការ និងសម្របសម្រួល ដើម្បីដោះស្រាយទំនាស់ និងសកម្មភាពទាមទារ តវ៉ានានា ក្នុងមូលដ្ឋាន ដោយប្រើសន្ដិវិធី និងបញ្ជៀសអំពើហិង្សា តាមគ្រប់រូបភាព។

សម្ដេចក្រឡាហោម ស ខេង បានមានប្រសាសន៍បែបនេះ ក្នុងឱកាសអញ្ជើញជាអធិបតីក្នុងពិធីបូកសរុបលទ្ធផល នៃអង្គសន្និបាតរបស់ក្រសួងមហាផ្ទៃ និងផ្តល់អនុសាសន៍ផ្តាំផ្ញើជូនដល់ថ្នាក់ដឹកនាំ ចំណុះក្រសួងមហាផ្ទៃ សម្រាប់ទិសដៅការងារបន្ត ឆ្នាំ២០២២ នៅសណ្ឋាគាររ៉េស៊ីដង់សុខាភ្នំពេញ នាព្រឹកថ្ងៃទី២៣ ខែកុម្ភៈ ឆ្នាំ២០២២។

សម្ដេចក្រឡាហោម មានប្រសាសន៍បន្តថា៖ “អាជ្ញាធរ ត្រូវបង្កើនការគ្រប់គ្រងសភាពការណ៍នៅមូលដ្ឋាន ដើម្បីបង្ការទប់ស្កាត់រាល់សកម្មភាពអុចអាលបំផុសបំផុលញុះញង់ប៉ុនប៉ងបង្កឱ្យមានភាពចលាចលវឹកវរនៅក្នុងសង្គម។ ត្រូវខិតខំសហការសម្របសម្រួលដោះស្រាយទំនាស់ និងសកម្មភាពទាមទារតវ៉ានានានៅមូលដ្ឋានដោយសន្តិវិធី និងខិតខំបញ្ចៀសឱ្យបាននូវរាល់អំពើហិង្សាតាមគ្រប់រូបភាព”។

សម្ដេចក្រឡាហោម បានណែនាំដល់អាជ្ញាធរត្រូវបន្តរួមគ្នារក្សាការពារសុខសន្តិភាព ស្ថេរភាពនយោបាយ និងសន្តិសុខជាតិឱ្យបានកាន់តែរឹងមាំ សំដៅធានាប្រក្រតីភាពនៃស្ថាប័នជាតិ, ធានាការពារព្រះរាជសុវត្ថិភាពព្រះមហាក្សត្រ, សុវត្ថិភាពថ្នាក់ដឹកនាំជាន់ខ្ពស់របស់ជាតិ, បង្កើនការការពារគោលដៅនយោបាយ ការទូត សេដ្ឋកិច្ច វប្បធម៌ ទេសចរណ៍ ពាណិជ្ជកម្ម និងសកម្មភាពវិនិយោគនានានៅក្នុងព្រះរាជាណាចក្រកម្ពុជា។

លើសពីនេះទៀត សម្ដេចក្រឡាហោម ស ខេង បានណែនាំដល់អគ្គស្នងការដ្ឋាននគរបាលជាតិ ត្រូវសហការជាមួយអាជ្ញាធរ កងកម្លាំងមានសមត្ថកិច្ចនានា ដើម្បីរក្សាការពារឱ្យបានល្អនូវសុវត្ថិភាពសម្រាប់កិច្ចប្រជុំ និងការរៀបចំព្រឹត្តិការណ៍នានាក្នុងពេលដែលកម្ពុជាទទួលធ្វើជាប្រធានប្តូរវេនរបស់អាស៊ានក្នុងឆ្នាំ២០២២ នេះ និងការពារសុវត្ថិភាពដំណើរទស្សនកិច្ចរបស់គណៈប្រតិភូបរទេសនានា និងកិច្ចប្រជុំអន្តរជាតិនានា ដែលរៀបចំធ្វើឡើងនៅព្រះរាជាណាចក្រកម្ពុជា។

សម្ដេចក្រឡាហោម បានបន្ថែមថា អាជ្ញាធរ និងកងកម្លាំងមានសមត្ថកិច្ចគ្រប់លំដាប់ថ្នាក់ ត្រូវផ្តល់នូវការគាំទ្រ និងសហការជាមួយ គ.ជ.ប ដើម្បីចាត់ចែងអនុវត្តកិច្ចការនានាស្របតាមច្បាប់តម្រូវ និងធានារក្សាសន្តិសុខ សណ្តាប់ធ្នាប់ និងសុវត្ថិភាពក្នុងដំណើរការនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ឱ្យប្រព្រឹត្តទៅប្រកបដោយសុវត្ថិភាព និងមានលក្ខណៈសេរី ត្រឹមត្រូវ និងយុត្តិធម៌។

សម្ដេចក្រឡាហោម មានប្រសាសន៍បន្ថែមទៀតថា កងកម្លាំងនគរបាលជាតិ ត្រូវបន្តសហការជាមួយកងយោធពលខេមរភូមិន្ទ បង្កើនការគ្រប់គ្រងព្រំដែន ដើម្បីថែរក្សាការពារបូរណភាពទឹកដី អធិបតេយ្យជាតិ, បង្កើនការរក្សាសន្តិសុខ សណ្តាប់ធ្នាប់នៅតាមតំបន់ព្រំដែន, បង្ការទប់ស្កាត់បង្ក្រាបឱ្យបានទាន់ពេលវេលា និងមានប្រសិទ្ធភាពនូវបទល្មើសឆ្លងកាត់ព្រំដែនគ្រប់ប្រភេទ និងពង្រឹងកិច្ចសហការជាមួយអាជ្ញាធរ និងកងកម្លាំងមានសមត្ថកិច្ចនៃប្រទេសជិតខាង ដើម្បីគ្រប់គ្រងការចេញចូលឆ្លងកាត់ព្រំដែន និងបន្តខិតខំជំរុញការអភិវឌ្ឍសេដ្ឋកិច្ចសង្គម និងលើកកម្ពស់ជីវភាពរបស់ប្រជាពលរដ្ឋតាមតំបន់ព្រំដែន៕

អត្ថបទ៖ សំអឿន