ព័ត៌មានជាតិ

កសិករដាំម្នាស់ទទួលបានជោគជ័យ និងមានជីវភាពល្អប្រសើរ

បានផុស

២ years មុន

នៅ

ថ្ងៃសុក្រ ២៥ កុម្ភៈ ២០២២

ដោយ

កសិករចំនួន៥ភូមិ ក្នុងឃុំទន្លេបិទ ស្រុក/ខេត្តត្បូងឃ្មុំ បានជ្រើសរើសដំណាំដាំម្នាស់វិញម្តង ដោយសារម្នាស់ងាយដាំ ធននឹងអាកាសធាតុ ឲ្យផលល្អ ងាយលក់សម្បូរទីផ្សារច្បាស់លាស់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថិតក្នុងដំណាក់ការមន្ត្រីជំនាញមន្ទីរកសិកម្មខេត្ត អាជ្ញាធរដែនដីបានយកចិត្តទុកដាក់ចុះប្រតិបត្តិការបើកវគ្គបណ្តុះបណ្តាលផ្តល់ចំណេះដឹងផ្នែកកសិកម្មដល់ប្រជាកសិករ ជាហេតុធ្វើឲ្យកសិករឈានទៅសម្រេចលើវិស័យកសិកម្មនាសម័យទំនើបយើងនេះ។ ដែលម្នាស់ប្រភេទ ម្នាស់ស្ករ ម្នាស់កែវទឹកឃ្មុំ លើផ្ទៃដីមួយហិចតា វាផ្តល់ប្រាក់ចំណូកក្នុងមួយឆ្នាំមិនក្រោម៥ពាន់ដុល្លារនោះទេ ។ ហើយវាបានញាំងឲ្យស្មារតី បងប្អូនប្រជាកសិករសប្បាយរីករាយ អឺងកង ក្នុងការប្រមូលផលម្នាស់ ឆ្នាំ២០២២នេះ ម្នាស់ឲ្យផលល្អជាងឆ្នាំទៅ ។

លោក អ៊ូ ស៊ាងហេង អាយុ៣៦ឆ្នាំ រស់នៅក្នុងភូមិអំពិលជ្រុំ ឃុំទន្លេបិទ ស្រុក/ខេត្តត្បូងឃ្មុំ បានបញ្ជាក់ឲ្យដឹងថា ម្នាស់ជារុក្ខជាតិម្យ៉ាង មានដើមព័ទ្ធជុំវិញដោយធាងលាយឡំដោយធាងមានបន្លារដូចធ្មេញរណា ដែលមានផ្លែរាងមូលទ្រវែងបន្តិច ប្រកបដោយរសជាតិ ជូរអែម និងផ្អែមស្អិត ដូចប្រភេទម្នាស់ស្ករ ម្នាស់កែវទឹកឃ្មុំ គឺម្នាស់ខ្មែរយើងសុទ្ធសាធតែម្តង ។ ម្នាស់ដាំមិនរើសដីទេ ទាំងដីស ដីខ្មៅ និងដីក្រហម ។ល។ គឺដាំបានទាំងអស់ តែវាត្រូវការដីទួលស្រស់ទឹក ទើបវាឲ្យផលល្អ វាធននឹងអាកាសធាតុទាំងក្តៅ និងត្រជាក់ផងដែរ ហើយវាមិនត្រូវការដីដក់ទឹក និងជាំទឹកដែរ ។ ក្នុងដី១ហិចតា យើងដាំបានម្នាស់ចំនួន៦ម៉ឺនដើម ជាទូទៅនៅដើមខែ៣ខាងមុខនេះ កសិករចាប់ផ្តើមចុះដាំហើយ ដោយប្រើរយៈពេល១ឆ្នាំពេញទើបវាឲ្យផល ។ ពេលប្រមូលផល គេលក់គិតជាឡូ ១ឡូមាន១២ផ្លែ ជាប្រភេទលេខ១ តម្លៃ២ម៉ឺន និង៣ពាន់រៀល ដែលចែកចេញជា១១ប្រភេទ ហើយប្រភេទលេខ១១ ជាប្រភេទម្នាស់គ្រាប់បែក ក្នុង១ថង់មានចំនួន៤០ផ្លែ តម្លៃ៦ពាន់រៀល ។

លោកស្រី ប៊ុល លីន អាយុ៣៩ឆ្នាំ រស់នៅភូមិអំពិលជ្រុំដែរ បានឲ្យដឹងដែរថា ចំពោះទីផ្សារម្នាស់មិនពិបាកលក់ទេ មានម៉ូយមកទទួលទិញដល់ទីផ្សារតែម្តង យកទៅលក់នៅ កំពង់ចាម ត្បូងឃ្មុំ ព្រៃវែង និងទីក្រុងភ្នំពេញ ។ល។ មានទីផ្សារច្បាស់លាស់ ម្នាស់ស្ករ ម្នាស់កែវទឹកឃ្មុំ ប្រកបដោយរសជាតិផ្អែមឆ្ងុយឆ្ងាញ់ ក្នុង១ហិចតាវាឲ្យផលបាន១ម៉ឺនដុល្លារ កសិករផាត់សោហ៊ុយ ពលកម្ម កសិករអាចរកប្រាក់ចំណូលបានមិនក្រោម ៥ពាន់ដុល្លារ ក្នុង១ឆ្នាំ ។ ឥលូវកសិករ ចាប់ផ្តើមបោះបង់ពីការដាំដំឡូង ចំប៉ី មកដាំម្នាស់វិញម្តងហើយ ។

លោក ភិន ឈុន ជាមេឃុំទន្លេបិទ បានឲ្យដឹងដែរថា កសិករដាំម្នាស់មានចំនួន ៥ភូមិ រួមមាន.ភូមិអំពិលជ្រុំ ភូមិភ្នំ ភូមិតាអ៊ុយ ភូមិជ្រោយស្រឡៅ និងភូមិអន្លង់ពោង ដែលមានផ្ទៃដីដាំម្នាស់ ចំនួន៣៥ហិចតា ។ នាពេលកន្លងមកយើងមាន មេភូមិ ក្រុមប្រឹក្សាឃុំ និងមន្ត្រីខាងកសិកម្មខេត្ត បានបើកវគ្គបណ្តុះបណ្តាលបង្រៀនដល់កសិករការដាំដំណាំគ្រប់ប្រភេទ និងផ្តល់បច្ចេកទេស ទាំងការពិនិត្យដី ការប្រើប្រាស់ជីធម្មជាតិ ការប្រើថ្នាំកំចាត់សត្វល្អិត ការជ្រើសរើសពូជដំណាំ ការថែរក្សាពូជ ការប្រមូលផល ការវេចខ្ចប់ ជាដើម ។ ព្រមទាំងការជ្រើសរើសដំណាំតាមតម្រូវការទីផ្សារ និងដើម្បីផ្គត់ផ្គង់ទីផ្សារផងដែរ ។ កត្តាទាំងអស់ហើយ ដែលបានជម្រុញឲ្យបងប្អូនប្រជាកសិករទទួលបាននូវភាពជោគជ័យក្នុងវិស័យកសិកម្ម ៕

អត្ថបទ៖ សាន វិឡែម