រយៈពេលកន្លះខែ កម្ពុជារកឃើញអ្នកឆ្លង អូមីក្រុង ក្នុងសហគមន៍ ជាង ៣ ៧០០ ករណី

ត្រឹមតែរយៈពេល ១៥ថ្ងៃ ដើមខែមីនា ឆ្នាំ២០២២នេះ ព្រះរាជាណាចក្រកកម្ពុជា បានរកឃើញប្រជាពលរដ្ឋឆ្លងជំងឺកូវីដ-១៩ ប្រភេទ អូមីក្រុង នៅក្នុងសហគមន៍ ចំនួន ៣ ៧០៦ ករណី ក្នុងចំណោម ករណីឆ្លងសរុបចំនួន ៤ ០៧៦ ករណី ពោលគឺ ការឆ្លងពីក្រៅប្រទេស មានចំនួន ៣៧០ ករណី។

ជារៀងរាល់ថ្ងៃ បន្ទាប់ពីប្រមូលទិន្នន័យឆ្លង និងស្លាប់ ដោយសារជំងឺកូវីដ-១៩ ឬប្រភេទ អូមីក្រុង ទូទាំងប្រទេស១ថ្ងៃ លុះថ្ងៃឡើង ក្រសួងសុខាភិបាលតែងបានបង្ហាញទិន្នន័យ។

នេះជាតារាងស្ថានភាពឆ្លង និងករណីស្លាប់ ដោយសារជំងឺកូវីដ-១៩ ដែលចងក្រងដោយ “កម្ពុជាថ្មី” រយៈពេល ១៥ ថ្ងៃ៖

គិតត្រឹមថ្ងៃទី១៥ ខែមីនា នេះ កម្ពុជា បានរកឃើញ ករណីអូមីក្រុងក្នុងសហគមន៍សរុបចំនួន ១២ ១០៦ ករណី ខណៈករណីចូលពីក្រៅប្រទេស មានចំនួន ២១ ១០៦ ករណី ក្នុងចំណោមករណីឆ្លងកូវីដ-១៩ សរុប មានចំនួន ១៣៤ ៣៥២ ករណី ទន្ទឹមពេល អ្នកជាសះស្បើយសរុប មានចំនួន ១២៩ ៧១៧ ករណី និងស្លាប់សរុប មានចំនួន ៣ ០៤៨ ករណី។

គួររំលឹកថា វីរុសកូវីដ-១៩បំប្លែងថ្មី​ អូមីក្រុង ត្រូវបានរកឃើញឆ្លងរាលចូលក្នុងសហគមន៍ជាលើកដំបូង នៅថ្ងៃទី០៨ ខែមករា ឆ្នាំ២០២២។

រដ្ឋាភិបាលបានជ្រើសរើសយកការចាក់វ៉ាក់សាំងកូវីដ-១៩ និងការអនុវត្តវិធានការសុខាភិបាល ៣កុំ ៣ការពារ ជាមធ្យោបាយចម្បងក្នុងការទប់ស្កាត់ និងប្រយុទ្ធប្រឆាំងជំងឺកូវីដ-១៩។ គិតត្រឹមថ្ងៃទី១៤ ខែមីនា ម្សិលមិញ លទ្ធផលចាក់វ៉ាក់សាំងកូវីដ-១៩ បានចំនួន ៩២,២៣ ភាគរយ ធៀបនឹងចំនួនប្រជាជនសរុប ១៦ លាននាក់៕

អត្ថបទ៖ ច័ន្ទ វីរៈ