ក្រសួង​កសិកម្ម​កំពុង​ចាត់​វិធានការ​បង្ក្រាប​បទល្មើស​នេសាទ​ជុំវិញបឹង​ទន្លេសាប​ផ្ដោតខ្លាំង​លើការ​អូសអួន​ និង​ឆក់​ត្រជាក់​

ក្រសួងកសិកម្ម រុក្ខាប្រមាញ់ និងនេសាទ បានប្រកាសនៅថ្ងៃទី ២៥ ខែមីនា ឆ្នាំ ២០២២ នេះថា ខ្លួនកំពុងចាត់វិធានការយ៉ាងម៉ឺងម៉ាត់ ក្នុងការបង្ក្រាបបទល្មើសជលផលជុំវិញបឹងទន្លេសាប​ឱ្យមានប្រសិទ្ធភាពខ្ពស់ ពិសេសបទល្មើសអូសអួនទឹកសាបឆក់ត្រជាក់ និងបទល្មើសដ៍ទៃទៀត ដែលធ្វើឱ្យប៉ះពាល់ធ្ងន់ធ្ងរដល់ធនធានជលផល។

សម្ដេចតេជោ ហ៊ុន សែន​ នាយករដ្ឋមន្ត្រីកម្ពុជា​ នៅថ្ងៃទី ២៣ ខែមីនា ឆ្នាំ ២០២២ ​បានចេញ​បញ្ជា​ឱ្យកម្លាំងសមត្ថកិច្ច ចេញប្រតិបត្តិការកម្ចាត់មេឈ្មួញទុច្ចរិត​ប្រព្រឹត្ត​បទល្មើស​នេសាទខុសច្បាប់​បំផ្លាញ​ត្រីក្នុង​បឹង​ទន្លេសាប។

សម្ដេចអះអាងថា បទល្មើសដែលចាប់បានកន្លងមក គឺមានលក្ខណៈទ្រង់ទ្រាយតូច ប៉ុន្តែនៅមានមេក្លោងធំៗ នៅពីក្រោយ​ដែលសមត្ថកិច្ចមិនទាន់បង្ក្រាបបាន។

សម្ដេចតេជោបញ្ជាឱ្យអភិបាលខេត្តនៅជាប់ភូមិសាស្ត្របឹងទន្លេសាប និងមន្ទីរពាក់ព័ន្ធ​សហការ​ជាមួយ​កងម្លាំងនគរបាលចេញប្រតិបត្តិការបង្ក្រាបឱ្យខាងតែបាន បើពុំដូច្នេះទេបឹងទន្លេសាប នឹងបាត់បង់ត្រីអស់។

ក្រោយការប្រកាសមួយថ្ងៃ គណៈបញ្ជាការឯកភាពរដ្ឋបាលខេត្តកំពង់ឆ្នាំង លោក ស៊ុន សុវណ្ណារិទ្ធិ បានបែង​ចែកកម្លាំង​ក្រុមការងារចម្រុះ​ជាង ១០០ នាក់​ ចែកជា ៤ ក្រុម​ ប្រតិបត្តិការចុះបង្ក្រាប និង​ទប់​ស្កាត់បទល្មើស​នេសាទខុសច្បាប់​ នៅភូមិសាស្ត្របឹង​ទន្លេសាបស្ថិត​ក្នុងស្រុក​ជលគីរី​ ស្រុកកំពង់លែង​ និងស្រុកបរិបូណ៌។

សូមជំរាបថា លទ្ធផលសម្រេចបានក្នុងថ្ងៃទី ២៤ ខែមីនាម្សិលមិញនេះ រួមមាន៖ បានរុះរើរបាំងសាច់អួនចំនួន ២៧កន្លែង ស្មើនឹង ២ ២០០ម៉ែត្រ បង្គោលចំនួន ៨៥០ដើម លូសាច់អួនចំនួន ៣៤លូ រុះរើសម្រាស់ចំនួន ៧កន្លែង ស្មើនឹង ៥៦០ម៉ែត្រការ៉េ បង្គោលចំនួន ១៣០ដើម មែកសម្រាស់ចំនួន ៣ ៤០០មែក៕

អត្ថបទ៖ ឡេង ដេត