ព័ត៌មានជាតិ

ចិន ផ្ដល់ថ្នាំការពារជំងឺឆ្លងអុតក្តាមគោ/ក្របី ចំនួន ២ សែន(Doses)ដល់កម្ពុជា

បានផុស

៥ years មុន

នៅ

ថ្ងៃព្រហស្បតិ៍ ១៧ ធ្នូ ២០២០

ដោយ

ក្រសួងកសិកម្ម និងកិច្ចការជនបទចិន បានផ្ដល់ថ្នាំការពារជំងឺឆ្លងអុតក្តាមគោ/ក្របី ចំនួន ២០០,០០០ កម្រិត (Doses)ដើម្បីផ្ដល់ជូនភាគីកម្ពុជា ផ្នែកបច្ចេកទេស និងបង្កើនសមត្ថភាពក្នុងការឃ្លាំមើលការបង្ការនិងការគ្រប់គ្រងការរាលដាលជំងឺឆ្លងសត្វ។ នេះបើយោងតាម លោក វ៉េង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឲ្យដឹងនៅល្ងាចថ្ងៃទី ១៦ ខែ ធ្នូ ២០២០តាមរយៈបណ្តាញសង្គម ។

លោក វ៉េង សាខុន បានឲ្យដឹងថា កាលពីថ្ងៃទី៤ ខែធ្នូ ឆ្នាំ២០២០ លោកបានធ្វើសំណើស្នើសុំលោករដ្ឋមន្ត្រីក្រសួងកសិកម្ម និងកិច្ចការជនបទ នៃសាធាររណរដ្ឋ ប្រជាមានិតចិន ឲ្យជួយផ្តល់ថ្នាំការពារជំងឺឆ្លងអុតក្តាមសត្វគោ/ក្របី ដែលប្រទេសកម្ពុជា កំពុងប្រឈម ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តបតាមសំណើការចាំបាច់ និងបន្ទាន់ របស់កម្ពុជា ក្រសួងកសិកម្ម និងកិច្ចការជនបទចិន នាថ្ងៃទី១៣ ខែធ្នូបានឯកភាពផ្តល់ថ្នាំការពារជំងឺឆ្លងអុតក្តាម គោ/ក្របី ចំនួន ២០០,០០០ កម្រិត(Doses)ហើយបានសម្របសម្រួលជាមួយវិទ្យាស្ថានស្រាវជ្រាវបសុពេទ្យឡានចូវ(Lanzhou Veterinary Research Institute) សមាគមថ្នាំពេទ្យនិងបសុពេទ្យចិន (China Veterinary Drug Association)និង ក្រុមការងារ នៃសាកលវិទ្យាល័យកសិកម្មចិន សម្រាប់សម្ពន្ធភាពឧស្សាហកម្មឡានឆាង-មេគង្គបសុពេទ្យ និងថ្នាំការពារជំងឺ (China Agriculture University for Lancang-Mekong Veterinary Drug and Vaccine Industry Alliance) ដើម្បីផ្ដល់ជូនភាគីកម្ពុជា ផ្នែកបច្ចេកទេស និងបង្កើនសមត្ថភាពក្នុងការឃ្លាំមើល ការបង្ការ និងការគ្រប់គ្រងការរាលដាលជំងឺឆ្លងសត្វ។

លោករដ្ឋមន្ត្រីកសិកម្ម បានឲ្យដឹងទៀតថា ចំពោះការផលិតថ្នាំការពារជំងឺឆ្លងសត្វ នាយកដ្ឋានសហប្រតិបត្តិការអន្តរជាតិ នៃក្រសួងទាំងពីរ កំពុងធ្វើការសម្របសម្រួលផ្នែកលិខិតបទដ្ឋានគតិយុត្តិនានា ធ្វើយ៉ាងណាបង្កើតភាពងាយស្រួលជូនដល់ក្រុមហ៊ុនវិនិយោគិនចិន ដែលមានបំណងធ្វើការវិនិយោគ ដើម្បីសិក្សាស្រាវជ្រាវ និងផលិតនៅកម្ពុជា នាពេលខាងមុខ។

លោករដ្ឋមន្ត្រី លើកឡើងថា ក្នុងនាមរាជរដ្ឋាភិបាលកម្ពុជា បានថ្លែងអំណរគុណយ៉ាងជ្រាលជ្រៅចំពោះប្រជាជន និងរដ្ឋាភិបាលចិន ដែលផ្តល់កិច្ចសហប្រតិបត្តិការគ្រប់ជ្រុងជ្រោយជាមួយរដ្ឋាភិបាលកម្ពុជា។

លទ្ធផល នៃកិច្ចសហប្រតិបត្តិការនេះ បានចូលរួមជាចំណែកយ៉ាងមានប្រសិទ្ធិភាពក្នុងការជួយរុញកំណើនសេដ្ឋកិច្ចតាមរយៈការអភិវឌ្ឍលើគ្រប់វិស័យរួមទាំងវិស័យកសិកម្មផងដែរ ៕

អត្ថបទ ៖ណារី

Related Topics:គោ/ក្របី