អ្នកឃ្លាំមើលបញ្ហាសង្គម គាំទ្រគំនិតផ្ដួចផ្ដើមចំពោះការពិចារណា កំណត់អាយុអនុញ្ញាតឲ្យទទួល​ទានគ្រឿងស្រវឹង

ក្រោយពីមានការបង្ហើប អំពីការពិចារណាលើការកំណត់អាយុ អនុញ្ញាតឲ្យទទួលទានគ្រឿងស្រវឹង ស​ម្រាប់មនុស្សពេញ វ័យនោះ អ្នកឃ្លាំមើលបញ្ហាសង្គមនៅកម្ពុជា បានបង្ហាញការគាំទ្រ និងយល់ថាអាចជួយកាត់បន្ថយករណីគ្រោះថ្នាក់ចរាចរណ៍ និងបញ្ហាមួយចំនួនទៀត។

លោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតត្យសភាកម្ពុជា និងជាអ្នកឃ្លាំមើលបញ្ហាសង្គម មានប្រសាសន៍ប្រាប់កម្ពុជាថ្មី នៅថ្ងៃទី ៦ ខែឧសភានេះថា លោកគាំទ្រគំនិតផ្ដួចផ្ដើម ទៅលើការកំណត់អាយុអនុញ្ញាតឲ្យទទួល​ទានគ្រឿងស្រវឹង សម្រាប់មនុស្សពេញវ័យនេះ ដោយការកំណត់នេះបណ្ដាប្រទេសមួយចំនួន នៅលើពិភពលោកបានធ្វើរួចហើយ។

លោកមានប្រសាសន៍ថា «ខ្ញុំគាំទ្រគំនិតនេះ ដោយសារតែការកំណត់អាយុមនុស្ស ដែលត្រូវទទួលទាន ឬក៏ត្រូវទៅសេពគ្រឿងស្រវឹង ឬក៏ស្រាហ្នឹង វាជារឿងមួយដែលបណ្ដាប្រទេសមួយចំនួន នៅលើពិភពលោកគេក៏បានធ្វើដែរ ដោយសារតែយើងឃើញហើយ បើយើងនិយាយពីកំណត់អាយុ យើងកំណត់ពីក្រោមទៅថាតើអាយុប៉ុណ្ណា? ឧបមាថា ២១ឆ្នាំ ឬប៉ុន្មានឆ្នាំ បានអនុញ្ញាតឲ្យចូលរួមប្រឡូកក្នុងការសេពគ្រឿងស្រវឹងហ្នឹង ក៏វាអាចជួយកាត់បន្ថយមិនមែនតែគ្រោះថ្នាក់ចរាចរណ៍ទេ វាអាចកាត់បន្ថយដល់ការបំផ្លាញសុខភាព ឬក៏ការបង្កហិង្សា ឬក៏អ្វីផ្សេងទៀតច្រើនដែរ»។

អ្នកឃ្លាំមើលសង្គមរូបនេះ បានលើកឡើងបន្តថា អ្វីដែលក្រសួងសាធារណការ និងដឹកជញ្ជូន, ក្រសួងអប់រំ យុវជន និងកីឡា, និងក្រសួងសុខាភិបាល កំពុងពិចារណាលើការកំណត់អាយុអនុញ្ញាតឲ្យទទួល​ទានគ្រឿងស្រវឹង សម្រាប់មនុស្សពេញវ័យនោះ គឺជារឿងដែលសង្គមកម្ពុជាត្រូវការយូរហើយ។ លោកបណ្ឌិត ឈត ប៊ុនថង បានបន្ថែមថា បញ្ហាគ្រោះថ្នាក់ចរាចរណ៍ មិនមែនបណ្ដាលមកតែពីការទទួលគ្រឿងស្រវឹងនោះទេ។ ប៉ុន្តែការទទួលគ្រឿងស្រវឹងនេះ ជាមូលហេតុលេចធ្លោមួយ ក្នុងចំណោមមូលហេតុដទៃទៀត ដែលនាំឲ្យគ្រោះថ្នាក់ចរាចរណ៍ធ្ងន់ធ្ងរ។

លោកថា «គ្រោះថ្នាក់ចរាចរណ៍នេះ វាមែនទែនមិនមែនមានមូលហេតុ តែបណ្ដាលមកពីតែសេពគ្រឿងស្រវឹងទេ ប៉ុន្តែការសេពគ្រឿងស្រវឹងនេះក៏វាជាមូលហេតុលេចធ្លោ ក្នុងចំណោមមូលហេតុដទៃទៀត ហើយតាមរបាយការណ៍ព័ត៌មានកន្លងមកនឹង គឺអ្នកដែលស្រវឹងហ្នឹងគឺបង្កគ្រោះថ្នាក់ធ្ងន់ធ្ងរតែម្ដង ហើ​យជាពិសេសគឺពេលយប់ៗ ហើយបង្កគ្រោះថ្នាក់ហើយជួនកាលប៉ះពារគ្នាតិចតួច បង្កហិង្សាទៀតមិនព្រមរកដំណោះស្រាយ អញ្ចឹងហើយបើសិនជាការផ្ដួចផ្ដើមគំនិតនេះ បានសម្រេចខ្ញុំគិតថា យើងអាចកាត់បន្ថយនូវគ្រោះថ្នាក់ចរាចរណ៍ ដែលបង្កឡើងដោយអ្នកបើកបរដែលស្រវឹងស្រាហ្នឹងដែរ»។

អ្នកឃ្លាំមើលបញ្ហាសង្គមលោកបណ្ឌិត ឈត ប៊ុនថង បានស្នើឲ្យមានការពន្លឿន ចំពោះការកំណ​ត់អា​យុ​អនុញ្ញា​តឲ្យទទួល​ទានគ្រឿងស្រវឹង សម្រាប់មនុស្សពេញវ័យនេះ ហើយនៅពេលកំណត់រួចហើយ ត្រូវមានការផ្សព្វផ្សាយឲ្យប្រជាពលរដ្ឋ បានដឹងឲ្យបានទូលំទូលាយផងដែរ ដើម្បីការអនុវត្តទទួលបានជោគជ័យ។

សូមជម្រាបថា កាលពីពេលថ្មីៗនេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបង្ហើបឲ្យដឹងថា ក្រសួងសាធារណការ និងដឹកជញ្ជូន, ក្រសួងអប់រំ យុវជន និងកីឡា, និងក្រសួងសុខាភិបាល ដើម្បីឈានទៅដល់ការពិចារណា លើការកំណត់អាយុអនុញ្ញាតឲ្យទទួលទានគ្រឿងស្រវឹង សម្រាប់មនុស្សពេញវ័យ ដើម្បីលើកកម្ពស់សុវត្ថិភាពចរាចរណ៍ និងកាត់បន្ថយគ្រោះថ្នាក់ចរាចរណ៍៕

អត្ថបទ៖ ឃួន សុភ័ក្រ