ព័ត៌មានជាតិ

សម្តេចតេជោ ហ៊ុន សែន ៖ ការចាក់វាក់សាំងដូសជំរុញទី៥ នឹងចាប់ផ្ដើមពីថ្ងៃទី០៩ ខែមិថុនា តទៅ

បានផុស

១ ខែ មុន

នៅ

ថ្ងៃសុក្រ ២០ ឧសភា ២០២២

ដោយ

មានប្រសាសន៍តាមរយៈសារជាសំឡេង នាល្ងាចថ្ងៃទី២០ ខែឧសភា ឆ្នាំ២០២២ មុនចាកចេញទៅកាន់ប្រទេសស្វីស ដើម្បីចូលរួមវេទិកាសេដ្ឋកិច្ចពិភពលោក សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានលើកឡើងថា សម្តេចបានអនុញ្ញាតតាមសំណើក្នុងការចាក់វាក់សាំងដូសជំរុញទី៥ ចាប់ផ្ដើមពីថ្ងៃទី០៩ ខែមិថុនា តទៅហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសម្ដេចតេជោ ហ៊ុន សែន ថ្ងៃនេះគឺជាថ្ងៃទី១៤ហើយ ដែលព្រះរាជាណាចក្រកម្ពុជាយើងមិនមានការឆ្លងជំងឺ covid-19 សូម្បីមួយករណី ហើយរហូតមកដល់ពេលនេះមាននៅសល់អ្នកជំងឺកូវីដ១៩តែចំនួន១៤នាក់ប៉ុណ្ណោះ កំពុងសម្រាកព្យាបាលនៅតាមមន្ទីរពេទ្យ។ ក្នុងនោះ មាននៅទីក្រុងភ្នំពេញចំនួន៤នាក់ នៅបាត់ដំបងចំនួន៤នាក់ ហើយអ្នកជំងឺ៨នាក់នេះ មិនមែនជាជំងឺកូវីដ១៩តែមួយមុខនោះទេ គឺពួកគាត់មានជំងឺផ្សេងទៀត។

សម្តេចអះអាងថា នេះគឺជាព័ត៌មានមួយដ៏ល្អ ដែលពីមុនយើងមានអ្នកជំងឺប្រមាណជាង២ម៉ឺននាក់ កំពុងសម្រាកព្យាបាល ហើយនេះអាចចាត់ទុកថា ជាលទ្ធផលនៃការខិតខំរបស់យើង និងការចូលរួមរបស់ប្រជាពលរដ្ឋ ក្នុងការអនុវត្តវិធានការរបស់សុខាភិបាល ព្រមទាំងការទទួលយកវ៉ាក់សាំង។

សម្ដេចនាយករដ្ឋមន្ត្រីបានឲ្យដឹងដែរថា រហូតមកដល់ពេលនេះ សម្ដេចទទួលបានព័ត៌មានពីខាងសុខាភិបាលថា បន្ទាប់ពីប្រជាពលរដ្ឋទទួលយកវ៉ាក់សាំង មិនត្រឹមតែជំងឺកូវីដ១៩ទេ សូម្បីតែជំងឺផ្សេងៗទៀត ដែលមានផ្ដាសាយធំជាដើម ក៏បានថយចុះគួរឱ្យកត់សម្គាល់ផងដែរ។ ដែលនេះ គឺជាឥទ្ធិពលនៃវ៉ាក់សាំង ដែលយើងទទួលយកតាមរយៈយុទ្ធនាការនៃការចាក់វ៉ាក់សាំង ដែលរហូតមកដល់ពេលនេះយើងបានចាក់រហូតដល់ជាង១៥ លាននាក់ ក្នុងចំណោមប្រជាពលរដ្ឋជាង១៦លាននាក់។

សម្ដេចតេជោ ហ៊ុន សែន បានឲ្យដឹងទៀតថា នៅរសៀលនេះសម្ដេចបានយល់ព្រមតាមការស្នើសុំរបស់លោកស្រីវេជ្ជបណ្ឌិត ឱ វណ្ណឌីន ដើម្បីចាក់វាក់សាំងដូសជំរុញទី៥ ដែលនឹងត្រូវចាប់ផ្ដើមពីថ្ងៃទី០៩ ខែមិថុនា ឆ្នាំ២០២២ នេះតទៅ សម្រាប់អ្នកដែលបានចាក់ដូសទី៤ រួចហើយ ដែលមានគំលាតពីដូសទី៤ មកដូសទី៥ មានរយៈពេលយ៉ាងតិចចំនួន៣ខែ។

ជាមួយគ្នានោះសម្ដេចតេជោ ហ៊ុន សែន បានអំពាវនាវប្រជាពលរដ្ឋបន្តរក្សានូវស្ថានភាពដ៏ល្អនេះតទៅទៀត ដោយការការពារខ្លួននៅចំពោះការរាតត្បាតនៃជំងឺកូវីដ១៩ ដែលមិនទាន់ត្រូវបានបញ្ចប់ ជាមួយនឹងការទទួលយកនូវវ៉ាក់សាំង។ សម្តេចបន្តថា វ៉ាក់សាំងមិនត្រឹមតែធ្វើឲ្យរួចផុតពីការឆ្លងពេលនៃជំងឺកូវីដ១៩ ក៏ប៉ុន្តែបានធ្វើឲ្យរួចផុតពីជំងឺផ្សេងៗទៀតផងដែរ៕

ដោយ ៖ កោះកែវ