លោក សុន ឆ័យ ចូលបំភ្លឺនៅតុលាការនាព្រឹកនេះ តាមបណ្ដឹងរបស់ គ.ជ.ប

លោក សុន ឆ័យ អនុប្រធានគណបក្សភ្លើងទៀន នៅព្រឹកថ្ងៃទី ១២ ខែកក្កដា ឆ្នាំ ២០២២នេះ បានចូលខ្លួនទៅអយ្យការអមសាលាដំបូងរាជធានីភ្នំពេញ ដើម្បីឆ្លើយបំភ្លឺទៅនឹងបណ្ដឹងរបស់ គ.ជ.ប ដែលប្តឹង ពីបទបរិហាកេរ្តិ៍ជាសាធារណៈ។ នេះបើតាមសេចក្ដីរាយការណ៍ពីភ្នាក់ងារកម្ពុជាថ្មី ប្រចាំសាលាដំបូងរាជធានីភ្នំពេញ។

សេចក្ដីរាយការណ៍ បានឲ្យដឹងទៀតថា តំណាង គ.ជ.ប ដែលជាដើមបណ្ដឹងកាលពីថ្ងៃទី ១១ ខែកក្កដា ឆ្នាំ ២០២២ បានចូលបំភ្លឺនៅអយ្យការអមសាលាដំបូងរាជធានីភ្នំពេញ រួចហើយដែរ។

សូមជម្រាបថា លោក ឌឹម សុវណ្ណារុំ សមាជិក គ.ជ.ប និងលោក សោម សូរីដា អគ្គលេខាធិការរង គ.ជ.ប ជាតំណាងឲ្យគណៈកម្មាធិការជាតិរៀបចំការបោះឆ្នោត កាលពីថ្ងៃទី ១៧ ខែមិថុនា ឆ្នាំ ២០២២ បាន​ដាក់ពាក្យប្តឹងលោក សុន ឆ័យ ពីបទបរិហាកេរ្តិ៍ជាសាធារណៈ និងបានស្នើឲ្យផ្ដន្ទាទោសលោក សុន ឆ័យ តាមបញ្ញត្តិមាត្រា ៣០៥ នៃក្រមព្រហ្មទណ្ឌ នៃព្រះរាជាណាចក្រកម្ពុជា និងឲ្យលោក សុន ឆ័យ ធ្វើលិខិតសុំទោស គ.ជ.ប ជាលាយលក្ខណ៍អក្សរ និងផ្សព្វផ្សាយជាសាធារណៈ៕

អត្ថបទ៖ មករា