ព័ត៌មានជាតិ
និយោជកគាំទ្រការបង់វិភាគទាន ២ភាគរយ តែស្នើឲ្យកម្មករខំធ្វើការដើម្បីលើកកម្ពស់ផលិតភាពការងារបន្ថែម
និយោជកសហគ្រាស-រោងចក្រ បានស្នើឲ្យកម្មករ-និយោជិតខិតខំធ្វើការ ដើម្បីលើកកម្ពស់ផលិតភាពការងារបន្ថែម និងទទួលបានប្រាក់ចំណូលកើនឡើង ហើយយកប្រាក់ចំណូលទាំងនោះ ទៅបង់វិភាគទាន២ភាគរយ សម្រាប់អនុវត្តរបបសន្តិសុខសង្គមផ្នែកសោធន ដែលនឹងចាប់ផ្តើមអនុវត្តជាផ្លូវការនៅខែតុលា ឆ្នាំ ២០២២ខាងមុខ។
ថ្លែងប្រាប់អ្នកសារព័ត៌មាន ក្រោយចូលរួមពិធីផ្សព្វផ្សាយការអនុវត្តរបបសន្ដិសុខសង្គមផ្នែកប្រាក់សោធន កាលពីថ្ងៃទី ១៩ ខែកក្កដា នៅសណ្ឋាគារហ្គាឌិនស៊ីធី លោក កាំង ម៉ូនីកា អគ្គលេខាធិការរង នៃសមាគមរោងចក្រកាត់ដេរនៅកម្ពុជា មានប្រសាសន៍ថា ការអនុវត្តរបបសោធននេះ គឺជាការវិវត្តន៍មួយជំហានថ្មីមួយទៀត នៃការអនុវត្តផ្នែកបេឡាជាតិសន្តិសុខសង្គម។
លោកបានបន្តថា «យើងដឹងស្រាប់ហើយលើកមុន យើងមានតែរបបហានិភ័យការងារ បន្ទាប់មកទៀតយើងមានរបបថែទាំសុខភាព ឥឡូវនេះយើងបានដើរមួយជំហានទៀត ដែលបង្ហាញពីការវិវត្តន៍មួយជំហានទៀត នៃវិស័យសន្តិសុខសង្គមរបស់យើង»។
លោកបានបន្តទៀតថា «ជាការពិតហើយការអនុវត្តរបបនេះនិយោជក ត្រូវទទួលបន្ទុកបង់វិភាគទានបន្ថែម។ ជាធម្មតាទេជាបន្ទុកផ្នែកហិរញ្ញវត្ថុ ទៅលើនិយោជកយើងហើយ។ ប៉ុន្តែយើងទទួលស្គាល់ថា ច្បាប់នេះបានដាក់ចេញយូរដែរហើយ ប៉ុន្តែត្រូវបានពន្យាពេលដោយសារស្ថានភាពសេដ្ឋកិច្ច រងការប៉ះពាល់ដែលបណ្តាលវិបត្តិជំងឺកូវីដ-១៩។ អីចឹងនៅពេលនេះដល់ពេល ដែលត្រូវអនុវត្តហើយ ទោះបីជាយ៉ាងណាក៏ដោយយើងនឹងព្យាយាម អនុវត្តទៅតាមការណែនាំរបស់រាជរដ្ឋាភិបាល»។
យ៉ាងណាក៏ដោយ លោកបានបន្ថែមថា «គ្រាន់តែថាវាមានបញ្ហាបន្តិចគ្រាន់ថា យើងចាប់ផ្តើមអនុវត្តនៅពេលវិបត្តិនៅមិនទាន់បានបញ្ចប់ទី ១ វិបត្តិកូវីដ-១៩ មិនទាន់បានចប់ទី ២ វិបត្តិសាកលផ្សេងៗទៀត ដែលបានប៉ះពាល់ដូចជាវិបត្តិសង្គ្រាមរវាងរុស្សីនិងអ៊ុយក្រែនជាដើម ធ្វើឲ្យមានបញ្ហាសេដ្ឋកិច្ចសកលយើងមានការព្រួយបារម្ភ ខ្លាចប៉ះពាល់ដល់លទ្ធភាព នៃការនាំចេញរបស់យើងពិសេសសម្រាប់សវិស័យនាំចេញ អាចជាបញ្ហាតែទោះបីជាវាជាបញ្ហាប្រឈម តែយើងត្រូវជម្នះឲ្យបាន»។
ជាមួយគ្នានេះដែរ លោកបានស្នើឲ្យរាជរដ្ឋាភិបាល ត្រូវធ្វើកំណែទម្រង់សេវាសាធារណៈ និងផ្តល់សេវាសាធារណៈឲ្យបានល្អបន្ថែមទៀត ដើម្បីធ្វើយ៉ាងណាឲ្យវិស័យឯកជនមានលក្ខណៈងាយស្រួលក្នុងការប្រកបធុរកិច្ច និងការវិនិយោគ ដើម្បីធានានូវភាពប្រកួតប្រជែងនាំចេញទៅទីផ្សារអន្តរជាតិ និងប្រកួតប្រជែងថ្នាក់ជាតិបាន។
លោក កាំង ម៉ូនីកា បានឲ្យដឹងទៀតថា «អីចឹងនៅពេលនិរន្តភាព អាចប្រកួតប្រជែងបានវាជួយសម្រាលបន្ទុកនៃការចំណាយរបស់យើង និងសូមឲ្យបងប្អូនកម្មករនិយោជិត ព្យាយាមសហការជាមួយនិយោជក ដើម្បីធ្វើយ៉ាងណាលើកកម្ពស់ផលិតភាពការងារ ពីព្រោះមានតែផលិតភាពការងារទេ ដែលអាចជួយធ្វើឲ្យកម្រិតនៃប្រាក់ចំណូល របស់សហគ្រាស-រោងចក្រកើនឡើង ដើម្បីយកប្រាក់ចំណូលទាំងនោះ មកជួយទប់ការចំណាយបន្ថែមដល់កម្មករ ចាប់ពីខែតុលានេះទៅ»។
លោក អ៊ុក សមវិទ្យា ប្រតិភូរាជរដ្ឋាភិបាល ទទួលបន្ទុកជាអគ្គនាយកប.ស.ស មានប្រសាសន៍ដែរថា ក្រសួងការងារ បានប្រកាសដាក់ឲ្យអនុវត្តរបបផ្នែកសោធននេះ នៅថ្ងៃទី ១ ខែកក្កដា ឆ្នាំ ២០២២។ ប៉ុន្តែដោយសារតែរបបនេះថ្មី ក៏ពន្យាលពេល ៩០ថ្ងៃ ចាប់ពីខែកក្កដានេះ រហូតដល់ដំណាច់ខែកញ្ញា ឆ្នាំ ២០២២ មុននឹងអនុវត្តរបបនេះជាផ្លូវការ នៅថ្ងៃទី ១ ខែតុលា ឆ្នាំ ២០២២ ហើយកម្មករ-និយោជិត និងនិយោជក ត្រូវចាប់ផ្តើមបង់វិភាគទាន ចាប់ពីថ្ងៃទី ១ ខែវិច្ឆិកា ឆ្នាំ ២០២២តទៅ។
គួរបញ្ជាក់ថា របបផ្នែសោធននេះ តម្រូវឲ្យបង់ចំនួន ៤ភាគរយ។ ក្នុងនោះកម្មករ-និយោជិតបង់ ២ភាគរយនៃប្រាក់ឈ្មួល និងនិយោជកបង់ ២ភាគរយ។ ប៉ុន្តែកម្មករទទួលបាន ៤ភាគពេញស្មើនឹង ១០០ភាគរយ ពេលដល់អាយុចូលនិវត្តន៍ ៦០ឆ្នាំ៕
អត្ថបទ៖ សំអឿន
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៤ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ