ប្រាក់បាត និងផ្សារហ៊ុនថៃធ្លាក់ចុះ ដោយសារជម្លោះឈ្លានពានកម្ពុជា

ប្រាក់បាតថៃបាន​ធ្លាក់ចុះសម្រាប់ការជួញដូរ​​នា​​ថ្ងៃព្រហស្បតិ៍នេះ ក្រោយ​ជម្លោះប្រដាប់អាវុធជាមួយ​កម្ពុជាបាន​ផ្ទុះឡើង ក្រោម​ទង្វើឈ្លានពាន និងការវាយប្រហាររបស់យោធាថៃ​មកលើភាគីកម្ពុជា។ នេះបើតាមការចុះផ្សាយរបស់ទីភ្នាក់ងារសារព័ត៌មាន​ Bloomberg។

ប្រាក់បាត​បានធ្លាក់ចុះ ០,៣ ភាគរយ មកត្រឹម ៣២,២៩ បាត/ ១ ដុល្លារអាមេរិក នៅថ្ងៃព្រហស្បតិ៍នេះ ក្រោយ​ឡើងដល់ ៣២,១១ បាត/ដុល្លារ ​ដែលជាកម្រិតខ្ពស់បំផុត រាប់​​ចាប់តាំងពីខែកុម្ភៈ ឆ្នាំ ២០២២។

ទន្ទឹមនឹងគ្នានោះ សន្ទស្សន៍ផ្សារហ៊ុនថៃ (SET) ក៏បានធ្លាក់ចុះប្រហែល ១ ភាគរយ ផងដែរ សម្រាប់ការជួញដូរ​នៅថ្ងៃព្រហស្បតិ៍ ចំពេល​ដែល​ការប្រយុទ្ធគ្នាបន្តតានតឹង។

ប្រាក់បាតបានកើនឡើងជាង ៦ ភាគរយ ចាប់តាំងពីដើមឆ្នាំ ដោយសារតែ​កំណើន​សុទិដ្ឋិនិយមជុំវិញការចរចាពាណិជ្ជកម្ម ការត្រឡប់មកវិញនៃលំហូរចូលភាគហ៊ុនបរទេស និងតម្លៃមាសខ្ពស់ជិតកំណត់ត្រា។ យ៉ាងណាមិញ អ្នកជំនាញលើកឡើងថា ការប្រយុទ្ធគ្នា​ដែល​ផ្ទុះឡើងនៅព្រឹកថ្ងៃ ២៤ កក្កដា នេះ អាច​ធ្វើឱ្យកំណើនតម្លៃប្រាក់បាតផ្អាកសិន

យ៉ាងណាក៏ដោយ​ ​អ្នកជំនាញក៏​បាន​គូស​បញ្ជាក់ថា ​កំណើន​តម្លៃប្រាក់បាតនាពេល​កន្លងមក បាន និងកំពុងដាក់សម្ពាធ​លើ​​សេដ្ឋកិច្ចថៃ ដោយ​វាធ្វើឱ្យប៉ះពាល់ដល់ការនាំចេញ និងវិស័យទេសចរណ៍៕