ព័ត៌មានជាតិ
អ្នកជំនាញ UN៖ ដំណើរទស្សនកិច្ចនៅកម្ពុជា ដំណើរការយ៉ាងរលូនដោយគ្មានការរារាំងពី រដ្ឋាភិបាល
លោក វិទិត មុនតាប៊ន អ្នករាយការណ៍ពិសេសរបស់អង្គការសហប្រជាជាតិ បានលើកឡើងថា ដំណើរទស្សនកិច្ចស្តីពីស្ថានភាពសិទ្ធិមនុស្សលើកទីមួយនៅកម្ពុជារបស់លោក ដំណើរការយ៉ាងរលូនដោយគ្មានការរារាំងអ្វីទាំងអស់ពីសំណាក់រដ្ឋាភិបាលកម្ពុជា។ លោក វិទិត លើកឡើងបែបនេះក្នុងឱកាសធ្វើសន្និសីទសារព័ត៌មាន កាលពីថ្ងៃទី២៦ ខែសីហា ឆ្នាំ២០២២ ស្តីពីចុងបញ្ចប់នៃដំណើរទស្សនកិច្ចសិទ្ធិមនុស្សរបស់លោកនៅកម្ពុជារយៈពេល ១១ថ្ងៃកន្លងមក។
លោក វិទិត បានលើកឡើងថា កំលុងពេលលោកមកទស្សនកិច្ចស្តីពីសិទ្ធិមនុស្សនៅកម្ពុជា រូបលោកបានជួបសំណេះសំណាលជាមួយរដ្ឋមន្រ្តីជាន់ខ្ពស់ជាច្រើនរបស់កម្ពុជា ព្រមទាំងបានលើកយកនូវចំណុចមួយចំនួន និងបញ្ហាផ្សេងៗដាក់នៅលើតុពិភាក្សាដើម្បីឱ្យសិទ្ធិមនុស្សនៅកម្ពុជាមានភាពប្រសើរឡើង ដោយបើកចំហ និងសេរីភាព។
ជាមួយគ្នានោះ ចំពោះចំណុច មួយចំនួនដែលលោកលើកឡើងក្នុងកិច្ចប្រជុំ ក៏មានមតិខ្លះយល់ស្រប ហើយមតិខ្លះមិនយល់ស្របឡើយ ប៉ុន្តែ លោក វិទិត សុំមិននិយាយថាលោកបានលើកឡើងនូវបញ្ហាអ្វីខ្លះដោយលំអិត ជាមួយមន្ត្រីជាន់ខ្ពស់ណាមួយឡើយ។ យ៉ាងណាមិញលោកបានបញ្ជាក់ថា ចំណុចដែលរូបលោកលើកឡើង គឺដើម្បីចង់បានការផ្លាស់ប្តូរពីសន្តិភាព ឱ្យទៅជាសន្តិភាពសិទ្ធិមនុស្សប្រជាធិបតេយ្យ និងការអភិវឌ្ឍ។
អ្នកជំនាញរបស់អង្គការសហប្រជាជាតិរូបនេះ ក៏បានលើកឡើងពីបញ្ហាជីវិតរបស់អ្នកជាប់ពន្ធនាគារ ព្រមទាំងបានទៅទស្សនកិច្ចនៅពន្ធនាគារផ្ទាល់ បានជួបសម្ភាសសួរនាំពួកគេពីបញ្ហាផ្សេងៗ ដោយគ្មានវត្តមានមន្ត្រីពន្ធនាគារណាម្នាក់នៅក្បែរ ឬ នៅជាមួយលោកកំលុងពេលជួបជាមួយអ្នកជាប់ពន្ធនាគារឡើយ។ ត្រង់ចំណុចនេះ លោកក៏បានថ្លែងអំណរគុណដល់មន្ត្រីពន្ធនាគារ ដែលយល់ពីស្ថានភាព និងផ្តល់ឱកាសឱ្យរូបលោកជួបជាមួយពួកគេដោយសេរី។
លោក វិទិត មានប្រសាសន៍ថា៖ “ខ្ញុំមិនអាចនិយាយថាខ្ញុំទៅពន្ធនាគារមួយណាបានទេ ព្រោះដើម្បីរក្សាឯកជនភាព និងការពារដល់អ្នកដែលយើងសម្ភាស ប៉ុន្តែយើងពិតជាបានចូលដល់ ពន្ធនាគារ។ ហើយមណ្ឌលដែលគេបិទជិតមិនឱ្យចូលក៏ខ្ញុំបានចូលដែរ ប៉ុន្តែ ខ្ញុំមិនជម្រាបថា មួយណានោះទេ”។
ក្នុងឱកាសនេះ លោក វិទិត មុនតាប៊ន ក៏បានថ្លែងអំណរគុណដល់រដ្ឋាភិបាលកម្ពុជា ដែលបានអនុញ្ញាតឱ្យរូបលោកចូលទៅទស្សនកិច្ចនៅទីកន្លែងណាក៏បានដោយគ្មានការរារាំងអ្វីទាំងអស់ ព្រមទាំងអនុញ្ញាតឱ្យជួបនូវគ្រប់ភាគីពាក់ព័ន្ធទាំងអស់ រួមទាំងសហគមន៍គណបក្សនយោបាយផ្សេងៗទៀតផងដែរ។
បន្ថែមពីលើនេះ ក្រោយពីបញ្ចប់ទស្សនកិច្ចនៅកម្ពុជា អ្នករាយការណ៍ពិសេស របស់UN ទទួលបន្ទុកសិទ្ធិមនុស្សរូបនេះ ក៏បានចេញផ្សាយនូវរបៀបវីរៈ ១០ចំណុចបន្ថែមទៀត ដើម្បីឱ្យស្ថានភាពសិទ្ធិមនុស្សនៅកម្ពុជាមានភាពល្អប្រសើរឡើង បើកចំហលំហពលរដ្ឋ និងនយោបាយ ដើម្បីឆ្ពោះទៅរកកំណែទម្រង់ប្រជាធិបតេយ្យ៕
ដោយ៖ អុន ស្រីមាន
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៧ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៧ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង