រាជរដ្ឋាភិបាល លើកទឹកចិត្តដល់វិនិយោគិន​អភិវឌ្ឍវិស័យដីធ្លីផ្ទះល្វែងតម្លៃសមរម្យក្នុងខេត្តស្វាយរៀង

រាជរដ្ឋាភិបាល បានលើកទឹកចិត្តដល់វិស័យឯកជន ធ្វើការអភិវឌ្ឍវិស័យអចលនទ្រព្យ នៅខេត្តស្វាយរៀង ឱ្យរីកចម្រើន ដោយអភិវឌ្ឍទៅជាផ្ទះល្វែង លក់ក្នុងតម្លៃសមរម្យ។

លោក ជុក មុន្នី រដ្ឋលេខាធិការក្រសួងមុខងារសាធារណៈ និងប្រធានក្រុមការងាររាជរដ្ឋាភិបាលចុះជួយមូលដ្ឋាន​ក្រុងស្វាយរៀង បានថ្លែងថា ក្នុងនាមអាជ្ញាធរ សូមលើកទឹកចិត្តដល់អ្នកវិនិយោគឯកជនទាំងអស់ នៅខេត្តស្វាយរៀង ដែលមានបំណងចង់វិនិយោគលើវិស័យអចលនទ្រព្យ មានដីធ្លី ផ្ទះល្វែង ដែលមានតម្លៃសមរម្យ ដើម្បីរួមចំណែក​ក្នុងការអភិវឌ្ឍ នៅនៅក្រុងស្វាយរៀង ។

លោក ជុក មុន្នី បានបន្តថា អាជ្ញាធរតែងតែជំរុញ និងសហការក្នុងការផ្តល់ទំនុកចិត្ត ចំពោះ ការអភិវឌ្ឍ។ ដោយលោក លើកឡើងថា ការវិនិយោគរបស់វិស័យឯកជន ពិតជាបានរួម ចំណែកក្នុងគោលនយោបាយកាត់បន្ថយភាពក្រីក្រ ជាមួយរាជរដ្ឋាភិបាល ដូចជា បានផ្តល់ លំនៅឋានមានតម្លៃសមរម្យ  ជាពិសេសបានផ្តល់ការងារដល់ប្រជាពលរដ្ឋ ជាដើម។

លោក រៀម ស៊ីណា ម្ចាស់គម្រោងផ្ទះល្វែង នៅខេត្តស្វាយរៀង ទទួលយកការណែនាំរបស់មន្រ្តីរាជរដ្ឋាភិបាល។ ក្នុងនាមជាសហគ្រិនមួយរូប ដែលតែងតែអភិវឌ្ឍវិស័យអចលនទ្រព្យនៅក្នុងខេត្តស្វាយរៀង លោក រៀម ស៊ីណា តែងតែបានចូលរួមចំណែកជាមួយរដ្ឋាភិបាល ក្នុងការបង្កើតគម្រោងនានា។ ជាក់ស្តែង លោកបានសាងសង់ផ្ទះល្វែង ជាច្រើន ដោយលក់ក្នុងតម្លៃសមរម្យ ទៅដល់បងប្អូនប្រជាពលរដ្ឋ នៅក្នុងតំបន់។

លោកបានបន្ថែមថា ចំពោះផ្ទះល្វែងដែលជាគម្រោងរបស់លោក គឺអតិថិជនអាចចំណេញបាន២ដង គឺចំណេញ​ពេលទិញ និងចំណេញពេលលក់(នេះសម្រាប់បងប្អូនដែលរកស៊ីលើវិស័យអចលនទ្រព្យ)៕ ដោយ:ភក្ដី