លោកជំទាវ ម៉ែន សំអន៖ មន្រ្តីដ៏ល្អរបស់គណបក្ស គឺតម្រូវឲ្យមានទាំងសមត្ថភាព ទាំងគុណធម៌ សីលធម៌ទើបស្របនឹងលក្ខន្តិកៈគណបក្ស

លោកជំទាវកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា បានថ្លែងថា ការធ្វើជាមន្រ្តីដ៏ល្អប្រពៃរបស់គណបក្ស គឺតម្រូវឲ្យមានទាំងសមត្ថភាព មានទាំងគុណធម៌ មានអត្តចរិតសីលធម៌ល្អប្រពៃ ស្របនឹងលក្ខន្តិកៈគណបក្ស ប្រជាជនកម្ពុជា ។

លោកជំទាវកិត្តិសង្គហបណ្ឌិត ម៉ែន សំអន ថ្លែងបែបនេះ ខណៈពេលអញ្ជើញជាអធិបតីក្នុងពិធីបិទវគ្គអប់រំនយោបាយរបស់គណបក្ស និងប្រគល់វិញ្ញាបនប័ត្រជូនសិក្ខាកាមជំនាន់ទី៧០ នៅវិមាន៧មករា ដែលមានសិក្ខាកាមចូលរួមចំនួន ៨១រូប នារសៀល ថ្ងៃសៅរ៍ ១៥កើត ខែភទ្របទ ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី១០ ខែកញ្ញា ឆ្នាំ២០២២ ។

លោកជំទាវកិត្តិសង្គហបណ្ឌិតបានថ្លែងថា ឆ្លងកាត់តាមរយៈការបណ្តុះបណ្តាលរយៈពេល១សប្តាហ៍នេះ គឺពិតជាធ្វើឲ្យសិក្ខាកាមគ្រប់រូបទទួលបាននូវធាតុចូលដ៏សំខាន់ ជាពិសេសតាមរយៈការធ្វើជាមន្រ្តីដ៏ល្អប្រពៃរបស់គណបក្ស គឺទាមទារឲ្យមានទាំងសមត្ថភាព មានគុណធម៌ មានអត្តចរិត សីលធម៌ល្អប្រពៃ ទើបស្របនឹងលក្ខន្តិកៈគណបក្ស ។ ហេតុនេះទើបគណបក្សបានរៀបចំឲ្យមានវគ្គបណ្តុះបណ្តាលនេះឡើង ក្នុងន័យពង្រឹង និងបង្កើនសមត្ថភាពមន្រ្តីគណបក្ស ហើយសិក្ខាកាមដែលបានឆ្លងកាត់វគ្គអប់រំនយោបាយរបស់គណបក្ស មិនគ្រាន់តែជាកម្លាំងដ៏សកម្មក្នុងការកសាង និងការពារមាតុភូមិបច្ចុប្បន្ននេះប៉ុណ្ណោះទេ តែក៏ជាកម្លាំងបន្តវេន ដើម្បីរក្សាការពារនូវបុព្វហេតុដ៏ឧត្តុង្គឧត្តមរបស់គណបក្សនាពេលអនាគតថែមទៀត ។

លោកជំទាវក៏បានសំណូមពរឲ្យសិក្ខាកាមក្នុងជំនាន់ទី៧០ នេះ សូមចូលរួមចែករំលែកនូវបទពិសោធន៍ដែលទទួល ក្នុងរយៈពេលឧទ្ទេសនាម និងធ្វើការផ្សព្វផ្សាយបន្ត ដើម្បីបន្តចូលរួមចំណែកក្នុងការអភិវឌ្ឍមូលដ្ឋានរបស់ខ្លួន៕

អត្ថបទ៖ វិមាន