​ប្រមុខការពារជាតិកម្ពុជា​បញ្ជាក់ជំហរគាំទ្រគោលនយោបាយចិនតែមួយ​

​សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជាបានបញ្ជាក់​ជំហរម៉ឺម៉ាត់របស់កម្ពុជាក្នុងការ​គាំទ្រឥតងាករេនូវគោលនយោបាយចិនតែមួយ និងចក្ខុវិស័យ​សហគមវាសនារួមរវាងចិន-កម្ពុជា។

​សម្ដច ទៀ បាញ់ ​មានប្រសាសន៍​នៅក្នុង​ពិធីផ្ទេរ ​និងប្រគល់រថយន្ត និងសម្ភារយោធារបស់ក្រសួង​ការពារជាតិចិននៅព្រឹកថ្ងៃទី ២០ ខែកញ្ញា ឆ្នាំ ២០២២នៅខេត្តកំពង់ឆ្នាំងជាមួយវត្តមានលោក វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជា។​

​សម្ដេចពិជ័យសេនា ទៀ បាញ់មានប្រសាសន៍ថា កម្ពុជាថ្លែងអំណរគុណចំពោះរដ្ឋាភិបាល និងកងទ័ពរំដោះប្រជាជន​ចិន​ដែលបានផ្ដល់ជំនួយរថយន្ត និងសម្ភារមួយ​ចំនួនដល់​ក្រសួងការ​ពារជាតិដែលសម្ដេចអះអាងថាជំនួយនេះនឹងរួមចំណែក​ការការពារសន្តិភាព ​ស្ថិរភាពនយោបាយ សន្តិសុខ សណ្ដាប់ធ្នាប់សង្គម និងទប់ស្កាត់រាល់ការប៉ុនប៉ងបង្កចលាចលរបស់ពួកប្រឆាំងជ្រុល​និយមមួយក្ដាប់តូច។

​លើសពីនេះ ជំនួយឧបត្ថម្ភសម្ភារយោធានៅពេលនេះ បានរួមចំណែកយ៉ាងសំខាន់​ក្នុងការហ្វឹក​ហ្វឺនជួយសង្គ្រោះគ្រោះមហន្តរាយ ​ការលើកកម្ពស់សមត្ថភាពវិស័យសុខាភិបាល និងសង្គមកិច្ច។​

​ម្យ៉ាងទៀតជំនួយឧបត្ថម្ភទាំងអស់នេះ បានឆ្លុះបញ្ចាំងឱ្យឃើញពីស្មារតីមិត្តភាព​សាមគ្គីភាព និងជាមិត្តដែកថែបដ៍ពិតប្រាកដដែលតែងតែជួយគាំទ្រកងទ័ពប្រជាជនកម្ពុជាគ្រប់គ្រាលំបាក បានទាន់ពេលវេលា និងគ្មានលក្ខខណ្ឌក្នុងស្មារតីទំនាក់ទំនងមិត្តភាពជាប្រពៃណីដ៍ល្អប្រសើរ និងពង្រឹងកិច្ចទំនាក់ទំនងដ៍ស៊ីជម្រៅគ្រប់ជ្រុងជ្រោយកាន់តែរឹងមាំ។

​សម្ដច ទៀ បាញ់អះអាងថា ​ក្នុងស្ថានភាពតានតឹង​ផ្នែកភូមិសាស្ត្រនយោបាយ​នៅក្នុងតំបន់​យុទ្ធសាស្ត្រមួយចំនួនទាំងនៅក្នុងទ្វីបអាស៊ីដែលជាចំណោទបញ្ហា ហានិភ័យដល់ស្ថិរភាព និងសកលលោកនាពេលបច្ចុប្បន្ន និងអនាគត។ ​​

​សម្ដច ទៀ បាញ់បន្តថា ​កិច្ចសហប្រត្តិបត្តិការទ្វេភាគីនៃកងទ័ពប្រទេសទាំងពីរ​កាន់តែមាន​ភាព​ស្អិតរមួត ក្នុងភាពជាដៃគូ និងដំណើរការការងារសម្រេចជាប្រក្រតីជាបន្តបន្ទាប់​តាមផែនការ​ស្រប​តាមចក្ខុវិស័យ​ថ្នាក់ដឹកនាំប្រទេសទាំងពីរ។

​ក្រសួងការពារជាតិចិននៅថ្ងៃទី ២០ ខែកញ្ញា ២០២២នេះ បានផ្ដល់រថយន្តជំនួយឥតសំណង​ដល់​កម្ពុជា​ចំនួន ១០៧ គ្រឿង និងសម្ភារយោធាមួយចំនួនក្នុងការបម្រើដល់វិស័យយោធានៅកម្ពុជា៕​​

អត្ថបទ៖ ឡេង ដេត