ក្រុមអ្នកសង្កេតការណ៍អាស៊ាន ចុះពិនិត្យស្ថានភាពជនភៀសសឹកកម្ពុជា ខណៈប្រជាពលរដ្ឋ ៦៤៥គ្រួសារ មិនទាន់អាចវិលត្រឡប់ទៅផ្ទះវិញ

អ្នកនាំពាក្យក្រសួងការពារជាតិ បានឱ្យដឹងថា ក្រុមអ្នកសង្កេតការណ៍អាស៊ានប្រចាំព្រះរាជាណាចក្រកម្ពុជា (ASEAN Observer Team–Cambodia: AOT-KH) នៅថ្ងៃទី១៤ ខែកក្កដា ឆ្នាំ២០២៦ បានចុះពិនិត្យ និងសួរសុខទុក្ខប្រជាពលរដ្ឋដែលបានផ្លាស់ទីលំនៅជាបណ្តោះអាសន្នចំនួន ៦៤៥គ្រួសារ នៅភូមិតាកឹងបៃតង ឃុំថ្មី ស្រុកគូលែន ខេត្តព្រះវិហារ។

តាមសេចក្តីប្រកាសព័ត៌មាន ការចុះបំពេញបេសកកម្មនេះ ត្រូវបានសម្របសម្រួលដោយក្រុមអ្នកសម្របសម្រួល (CLG) របស់កម្ពុជា និងដឹកនាំដោយប្រធានបេសកកម្មក្រុមអ្នកសង្កេតការណ៍អាស៊ានមកពីសាធារណរដ្ឋហ្វីលីពីន។

ក្រសួងការពារជាតិបានបញ្ជាក់ថា រហូតមកដល់ពេលនេះ ប្រជាពលរដ្ឋដែលបានផ្លាស់ទីលំនៅនៅមិនទាន់អាចវិលត្រឡប់ទៅលំនៅដ្ឋានវិញបាននៅឡើយ ដោយលើកឡើងថា មានការចូលកាន់កាប់ទឹកដីកម្ពុជាដោយខុសច្បាប់ពីសំណាក់កងកម្លាំងយោធាថៃនៅតំបន់មួយចំនួន តាមរយៈការរាយបន្លាលួស ដាក់ទូកុងតឺន័រ និងការបំផ្លិចបំផ្លាញផ្ទះសម្បែងរបស់ប្រជាពលរដ្ឋ។

សេចក្តីប្រកាសបន្តថា ការចុះសង្កេតការណ៍ និងផ្ទៀងផ្ទាត់របស់ក្រុមអ្នកសង្កេតការណ៍អាស៊ាន បានបង្ហាញពីភាពចាំបាច់ក្នុងការចាប់ផ្តើមការងារវាស់វែង និងខណ្ឌសីមាព្រំដែនដោយគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ ឱ្យបានឆាប់ ស្របតាមសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) កាលពីថ្ងៃទី២៧ ខែធ្នូ ឆ្នាំ២០២៥ ដើម្បីឱ្យប្រជាពលរដ្ឋកម្ពុជាអាចវិលត្រឡប់ទៅលំនៅដ្ឋានវិញដោយសុវត្ថិភាព និងកិត្តិយស។

ជាមួយគ្នានេះ កម្ពុជាបានបញ្ជាក់ជាថ្មីនូវជំហររក្សាខ្សែព្រំដែនអន្តរជាតិកម្ពុជា-ថៃ ដោយផ្អែកលើច្បាប់អន្តរជាតិ គោលការណ៍ Uti Possidetis Juris សន្ធិសញ្ញា អនុសញ្ញា ផែនទី និងឯកសារពាក់ព័ន្ធដែលភាគីទាំងពីរបានឯកភាពកន្លងមក ហើយអះអាងថា មិនទទួលស្គាល់ការកែប្រែខ្សែព្រំដែនណាមួយដែលកើតឡើងពីការប្រើប្រាស់កម្លាំងឡើយ៕