ដំណាំស្រូវ​ជាង ៣ ម៉ឺនហិកតានៅខេត្តបន្ទាយមានជ័យ​រងផលប៉ះពាល់ដោយសារទឹកជំនន់​​

​យ៉ាងហោចណាស់​ដំណាំស្រូវជាង ៣ ម៉ឺនហិកតា (៣៦.០៥៩) រងផលប៉ះពាល់ ក្នុងនោះខូចខាត​ទាំងស្រុង​ចំនួន ៥ ៦៤៦ ហិកតា ព្រមទាំងប៉ះពាល់ដល់មនុស្សជាង ៦ ម៉ឺននាក់។

លោក អុំ រាត្រី អភិបាលខេត្តបន្ទាយមានជ័យបានប្រាប់ឲ្យដឹងនៅថ្ងៃទី ១៣ ខែតុលានេះថា មានក្រុង ស្រុកចំនួន ៩ របស់ខេត្តបន្ទាយមានជ័យ រងគ្រោះដោយសារទឹកជំនន់ ខណៈពេលនេះទឹកចាប់ផ្ដើមស្រកវិញហើយ។

លោក អុំ រាត្រីបានបញ្ជាក់ថា ចាប់រងគ្រោះពីទឹកជំនន់ឡើង រហូតដល់ទឹកស្រកទៅវិញធ្វើឲ្យប៉ះពាល់ យោងតាមមន្ត្រីលេខាធិការដ្ឋាន គណៈកម្មាធិការគ្រប់គ្រងគ្រោះមហន្តរាយខេត្ត និងមន្ត្រីរដ្ឋបាល ខេត្តបន្ទាមានជ័យបានឲ្យដឹងថា ស្ថានភាពទឹកជំនន់ នៅខេត្តបន្ទាយមានជ័យ ធ្វើឲ្យប៉ះពាល់កើនពីចំនួន ៨ ដល់ ៩ ស្រុក ក្រុង ឃុំ សង្កាត់ពី ៤៧ ដល់ ៤៩ ឃុំ/សង្កាត់ និង ២៧៨ ភូមិ។

គិតត្រឹមនៅថ្ងៃទី១៣ ខែតុលា ឆ្នាំ២០២២នេះ ប៉ះពាល់មនុស្ស កើនឡើង ៦៣.៨១៦ នាក់ ឬ ១៥.០៧៤ គ្រួសារ ជម្លៀសកើនពី ១.០០០ គ្រួសារ ដល់ ១.៤៣១ គ្រួសារ សត្វពាហនៈ ២.៨៦៧ ក្បាល ស្រូវជាង ៣៦.០៥៩ ហិកតា ខូចខាត ៥.៦៤៦ ហិកតា៕