បេក្ខជនមណ្ឌលភ្នំពេញ ប្រឡងជាប់សញ្ញាបត្រមធ្យមសិក្សាបឋមភូមិ ជាង ៩៤ ភាគរយ

បេក្ខជនមណ្ឌលប្រឡងរាជធានីភ្នំពេញ ប្រឡងជាប់សញ្ញាបត្រមធ្យមសិក្សាមឋមភូមិ ឬឌីប្លូមជាង ១៦ ០០០ នាក់ ក្នុងនោះស្រី មានចំនួនជាង ៨ ៥០០ នាក់ ស្មើនឹងជាង ៩៤ ភាគរយ ក្នុងចំណោមបេក្ខជនមកប្រឡងសរុបជាង ១៧ ០០០ នាក់។

លោក ហែម ស៊ីណារ៉េត ប្រធានមន្ទីរ អប់រំ យុវជន និងកីឡា រាជធានីភ្នំពេញ បានមានប្រសាសន៍នៅព្រឹកថ្ងៃទី១ ខែវិច្ឆិកានេះថា ចំនួនបេក្ខជនប្រឡងជាប់សញ្ញាបត្រឌីប្លូម ថ្ងៃទី២៤ ខែតុលានេះ មានចំនួនប្រហាក់ប្រហែលនឹងឆ្នាំមុនដែរ ដោយឆ្នាំនេះមានបេក្ខជនប្រឡងជាប់ចំនួន ១៦ ១៨៧ នាក់ ស្រី ៨ ៥៣៩នាក់ ស្មើនឹង ៩៤.០១ ភាគរយ ក្នុងចំណោមអ្នកដាក់ពាក្យប្រឡង ១៧ ៥៤៧ នាក់ ស្រី ៨ ៩៩៧ នាក់ ក្នុងនោះបេក្ខជនមកប្រឡងចំនួន ១៧ ២១៩ នាក់ ស្រី ៨ ៨៤៤ នាក់ ចែកជា ៦៣ មណ្ឌល ស្មើនឹង ៧៣៦ បន្ទប់។

លោក ហែម ស៊ីណារ៉េត បានបន្តថា ក្នុងចំណោមបេក្ខជនប្រឡងជាប់ទាំងនោះ មានបេក្ខជនទទួលបានពិន្ទុល្អមានចំនួន ១៦,៧៦ ភាគរយ ស្រី ២១,០៨ ភាគរយ ពិន្ទុល្អបង្គួរមានចំនួន ៣៨,៣៥ ភាគរយ ស្រី ៤១,២៣ ភាគរយ និងពិន្ទុមធ្យមមានចំនួន ៤៤,៤៩ ភាគរយ ស្រី ៣៧,៦៩ ភាគរយ។

លោកប្រធានមន្ទីរបានបន្តទៀតថា កាលប្រឡងឌីប្លូមសម័យប្រឡង ១៥ វិច្ឆិកា ២០២១ មានចំនួនមណ្ឌលប្រឡងសរុប ៦៣ម ណ្ឌល ត្រូវជា ៦៤៧ បន្ទប់ មានចំនួនបេក្ខជនចុះឈ្មោះសរុប ១៥ ៣១៣ នាក់ ស្រី ៧ ៨៣២ នាក់ បេក្ខជនមកប្រឡងសរុប ១៤ ៥០៦ នាក់ ស្រី ៧ ៤៩៨ នាក់ ក្នុងនោះមានបេក្ខជនប្រឡងជាប់សរុប ១៣ ៧០៩ នាក់ ស្រី ៧ ១៨៦ នាក់ ស្មើនឹង ៩៤,៥១ ភាគរយ។

សម្រាប់ឆ្នាំនេះ នៅមណ្ឌលប្រឡងភ្នំពេញមានបេក្ខជនអវត្តមានចំនួន ១៣៧ នាក់ ស្រី ១៣៩ នាក់ ភាគច្រើនលើសលប់បណ្តាលមកពីខាងសាលាមិនបានលប់ឈ្មោះចេញពីបញ្ជីប្រឡង ដោយសារសិស្សទាំងនោះបានបោះបង់ការសិក្សា។

គូរបញ្ជាក់ថា ឆ្នាំនេះមានបេក្ខជនចូលរួមប្រឡងឌីប្លូមសរុប ១៧៤ ៧២៦ នាក់ ស្រី៩៥ ១២៧ នាក់ ក្នុងនោះសិស្សចំណេះទូទៅ ១៧៣ ៤៦៦ នាក់ ស្រី ៩៤ ៨៧៦ នាក់ បេក្ខជនស្វៃរិន ១៣៦ នាក់ ស្រី ៤៥ នាក់ បេក្ខជនបំពេញវិជ្ជា ១ ០៧៦ នាក់ ស្រី ១៩២ នាក់ បេក្ខជនគថ្លង់ ២៩ នាក់ ស្រី ០៩ នាក់ បេក្ខជនពិការភ្នែក ១៩នាក់ ស្រី ០៥ នាក់ ដោយមាន ១ ៧២៣ មណ្ឌលប្រឡង ចែកជា ៧ ៨១៦ បន្ទប់៕

អត្ថបទ៖ សំអឿន