អភិបាលក្រុងបាវិត បើកការដ្ឋានសាងសង់ និងសម្ពោធផ្លូវក្នុងក្រុងនៅថ្ងៃតែមួយ

(ខេត្តស្វាយរៀង)៖ លោក លឹម សៀងហេង អភិបាលក្រុងបាវិត បានអញ្ជើញបើកការដ្ឋានសាងសង់ផ្លូវក្រាលកៅស៊ូ DBST ប្រវែង៤៥០០ម៉ែត្រ ទទឹង៧ម៉ែត្រ និងសម្ពោធដាក់ឲ្យប្រើប្រាស់ជាផ្លូវការនូវផ្លូវបេតុងអាម៉េ១ខ្សែ ប្រវែង៨៨៧ម៉ែត្រ ទទឹង៤ម៉ែត្រ ស្ថិតក្នុងសង្កាត់បាទី ក្រុងបាវិត ខេត្តស្វាយរៀង នៅព្រឹកថ្ងៃទី៧ ខែធ្នូ ឆ្នាំ២០២២។

នៅក្នុងឱកាសនោះលោកអភិបាលក្រុងបាវិត បានមានប្រសាសន៍ថា គោលនយោបាយរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខបានធ្វើឲ្យប្រទេសជាតិមានការរីកចម្រើនលើគ្រប់វិស័យ ដោយមិនប្រកាន់ និន្នាការនយោបាយជូនប្រជាពលរដ្ឋនៅគ្រប់មូលដ្ឋាន។

លោកអភិបាលក្រុងបានបន្តទៀតថា ការស្ថាបនា​​ ដោយសារផ្លូវមួយខ្សែនេះមានសភាពតូចចង្អៀត និងខូចខាតច្រើន​ហើយនៅរដូវវស្សាស្ថានភាពផ្លូវគឺមានទឹកដក់និងរអិលពិបាកក្នុងការធ្វើដំណើរឆ្លងកាត់ផ្លូវទាំងនេះ ជាពិសេស​គឺនៅពេលបងប្អូនប្រជាពលរដ្ឋដឹកកសិផលមកកាន់ទីផ្សារសិស្សសាលាទៅរៀនសូត្រ និងកម្មករកម្មកា​រិនី​ធ្វើដំណើរតែងតែជួបការលំបាកយ៉ាងខ្លាំង។

បើតាមលោកអភិបាលក្រុង សម្រាប់ការពង្រីកនិងការជួសជុលស្ថាបនាផ្លូវនាពេលនេះ លោកសុំការយោគ​យល់ពីប្រជាពលរដ្ឋ​ដែលរស់នៅអមសងខាងផ្លូវសូមជួយសម្រួលដល់​អាជ្ញាធរក្នុងការជួសជុលស្ថាបនា​ផ្លូវមួយខ្សែនេះឡើងវិញផងដែរ ជាពិសេសគឺផលប៉ះពាល់របងផ្ទះរបស់ពួកគាត់ក្នុងការពង្រីកផ្លូវ។

លោកក៏បានសំណូមពរ នៅពេលផ្លូវនេះបានជួសជុលរួចហើយសូមឱ្យអ្នកប្រើប្រាស់ផ្លូវទាំងអស់គ្នា ត្រូវចូលរួម​គោរពច្បាប់ចរាចរណ៍ ដើម្បីកាត់បន្ថយនូវការគ្រោះថ្នាក់ ដែលកើតមានជារៀងរាល់ថ្ងៃ មិនថានៅទីក្រុង​ឬជនបទ​នោះឡើយ។  ម៉្យាងទៀតក៏សូមសំណូមពរ និងស្នើឲ្យប្រជាពលរដ្ឋដែលរស់នៅក្នុងមូលដ្ឋានរបស់ខ្លួនជាពិសេសអ្នក​ដែលប្រើប្រាស់ផ្លូវថ្នល់ទាំងអស់សូមចូលរួមថែទាំផ្លូវថ្នល់ ដែលបានធ្វើរួចហើយត្រូវគិតថាផ្លូវជាសម្បត្តិរួម​ដើម្បីប្រើ​ប្រាស់បាន​យូរអង្វែងទៅថ្ងៃក្រោយ៕ ដោយ:ភក្ដី