អ្នកឧកញ៉ា គួច ម៉េងលី លើកឡើងថា បើចង់ជោគជ័យលើវិស័យអាជីវកម្ម ត្រូវមាន៤ចំណុចនៅក្នុងខ្លួន

អ្នកឧកញ៉ា គួច ម៉េងលី ស្ថាបនិកនៃសាលារៀន អន្តរទ្វីប អាមេរិកាំង (AIS) បានណែនាំដល់អ្នកដែលមានបំណងចង់បង្កើតអាជីវកម្មដោយខ្លួនឯង ឬ ចង់ឱ្យជោគជ័យលើអាជីវកម្ម ត្រូវមាន៤ចំណុចនៅក្នុងខ្លួន ទើបអាជីវកម្មនោះដើរទៅរលូន និងមានផ្លែផ្កា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ា គួច ម៉េងលី បានលើកឡើងថា ៤ចំណុចដែលត្រូវមាននោះ គឺទី១ ចំណង់ចំណូលចិត្តខ្ពស់ ពោល គឺធ្វើអ្វីក៏ដោយ គឺកើតចេញពីការស្រឡាញ់ មានចំណង់ចំណូលចិត្តខ្ពស់ក្នុងការធ្វើវា​ នឹងនាំឱ្យអ្នកមានភាពអត់ធ្មត់បានច្រើន ព្រមទាំងពុះពារទៅមុខរហូតដល់ទទួលបានភាពជោគជ័យ។ ទី២ គឺចំណេះដឹង ត្រង់ចំណុចនេះ នៅពេលដែលអ្នកស្រឡាញ់អ្វីមួយ នោះនឹងធ្វើឱ្យអ្នកព្យាយាមសិក្សា ស្វែងយល់ពីវាកាន់តែច្រើ​ន​ រួចនាំឱ្យអ្នកមានចំណេះដឹងច្រើន។ មានចំណេះដឹង នឹងធ្វើឱ្យអ្នកមានភាពចង់ចេះ ចង់ដឹងកាន់តែខ្លាំង នឹងជំរុញទឹកចិត្តឱ្យអ្នកទៅធ្វើការ។

ចំណុចទី៣ គឺយកបទពិសោធ ក្រោយពីអ្នករៀនចប់ មានចំណេះដឹង គួបផ្សំនឹងភាពចង់ដឹងចង់ឃើញផងនោះ នឹងធ្វើឱ្យអ្នកចូលទៅបម្រើការងារ។ ការស្រឡាញ់ចូលចិត្ត ផ្សំជាមួយនឹងចំណេះដឹង និងការចូលបម្រើការងារនោះ នឹងធ្វើឱ្យអ្នកមានបទពិសោធកាន់តែច្រើន។ ទី៤ គឺជំនាញ មានន័យថា នៅពេលដែលអ្នកមានទាំង៣ខាងលើហើយ នឹងធ្វើឱ្យអ្នកចូលប្រឡូកការងារបានច្រើន យូរៗទៅក្លាយជាជំនាញដែលអាចប្រឡូកក្នុងវិស័យអាជីវកម្មបាន។

អ្នកឧកញ៉ា បានបន្ថែមថា ប្រសិនជាមនុស្សគ្រប់រូបមានចំណុចទាំង៤នេះនៅក្នុងខ្លួន រាល់កិច្ចការទាំងអស់ មិនសំដៅលើការចង់បង្កើតអាជីវកម្មនោះទេ គឺអាចប្រើប្រាស់បានគ្រប់វិស័យ ហើយកម្រនឹងបរាជ័យណាស់។ យ៉ាងណាមិញ ស្ថាបនិករបស់សាលារៀន អន្តរទ្វីប អាមេរិកាំង (AIS) រូបនេះ ក៏បានរំលឹកជារើយៗដល់យុវជនគ្រប់រូបដែលមានបំណងចង់បង្កើតអាជីវកម្ម ឬ ប្រកបកិច្ចការអ្វីមួយចង់ទទួលបានផលលឿន គឺពិចារណាឱ្យបានដិតដល់។ លោកបានលើកឡើងថា មុននឹងធ្វើអ្វីមួយ ត្រូវសិក្សាឱ្យបានច្រើន ចេញធ្វើការ ដើម្បីទទួលបានបទពិសោធ និងមានគំនិតចាស់ទុំ ចេះគិតវែងឆ្ងាយទើបអាចធ្វើឱ្យការងារនោះជោគជ័យបានរលូនល្អ។ មួយវិញទៀត មិនអាចចេញបង្កើតអាជីវកម្មទាំងវ័យក្មេង និងគ្មានបទពិសោធបានឡើយ៕

ដោយ៖ អុន ស្រីមាន