តុលាការកូរ៉េ​ខាង​ត្បូង សម្រេចបន្ថែមទោសលោក Yoon ៧ឆ្នាំ លើ​ទោស​ជាប់​ពន្ធនាគារ​មួយ​ជីវិត

រឿងរ៉ាវច្បាប់របស់អតីតប្រធានាធិបតីកូរ៉េខាងត្បូង លោក ​Yoon Suk Yeol កាន់តែដុនដាបខ្លាំងឡើង បន្ទាប់ពីតុលាការឧទ្ធរណ៍នៅទីក្រុងសេអ៊ូល បានសម្រេចបង្កើនទោសជាប់ពន្ធនាគារលើរូបលោកដល់ទៅ ៧ឆ្នាំ នា​ថ្ងៃពុធ ទី២៩ ខែមេសា ឆ្នាំ២០២៦ នេះ។ ការសម្រេចនេះ គឺកើនឡើងលើសពីទោស ៥ឆ្នាំ ដែលតុលាការថ្នាក់ទាបបានកំណត់កាលពីដើមឆ្នាំ ដោយសារតុលាការរកឃើញថា លោកពិតជាបានប្រព្រឹត្តកំហុសធ្ងន់ធ្ងរ ក្នុងការរារាំងការអនុវត្តច្បាប់របស់មន្ត្រីស៊ើបអង្កេត។ នេះ​បើយោងតាម​ការ​ចុះ​​ផ្សាយ​របស់​ទីភ្នាក់ងារ​ព័ត៌មាន Reuters។

ករណីនេះ បានកើតឡើងតាំងពីឆ្នាំ​២០២៥ នៅពេលដែលលោកបានបញ្ជា​ឲ្យ​ក្រុមអង្គរក្សប្រធានាធិបតីប្រើកម្លាំងបិទផ្លូវ និងធ្វើជាខែលការពាររូបលោក ដើម្បីកុំឲ្យ​មន្ត្រីប្រឆាំងអំពើពុករលួយចូលមកចាប់ខ្លួនលោកតាមដីកាស្របច្បាប់បាន។

នៅក្នុងសវនាការដែលបានចាក់ផ្សាយជាសាធារណៈ ចៅក្រមបានសង្កត់ធ្ងន់ថា សកម្មភាពរបស់លោក Yoon គឺជាការរំលោភលើរដ្ឋធម្មនុញ្ញយ៉ាងធ្ងន់ធ្ងរ ព្រោះលោកបានយកអំណាចរដ្ឋ និងធនធានជាតិមកប្រើប្រាស់ ដើម្បីការពារប្រយោជន៍ផ្ទាល់ខ្លួន។ ក្រៅពីបទរារាំងយុត្តិធម៌ លោកក៏ត្រូវបានរកឃើញថាមានទោសពីបទរំលោភអំណាច និងការក្លែងបន្លំឯកសារសាធារណៈថែមទៀតផង។

ក្រុមរដ្ឋ​អាជ្ញាពិសេសចង់ឲ្យ​មានការដាក់ទោសរហូតដល់ ១០ឆ្នាំ ប៉ុន្តែតុលាការបានសម្រេចយកត្រឹម ៧ឆ្នាំ ដោយយោងតាមទិដ្ឋភាពច្បាប់ និងអង្គហេតុដែលបានកើតឡើង។

អ្វីដែលគួរឲ្យ​កត់សម្គាល់នោះ គឺទោសជាប់ពន្ធនាគារ ៧ឆ្នាំនេះ គ្រាន់តែជាផ្នែកមួយតូចនៃបញ្ហាច្បាប់ដ៏ស្មុគស្មាញរបស់លោកតែប៉ុណ្ណោះ។ បច្ចុប្បន្ន លោក Yoon កំពុងតែជាប់ឃុំឃាំងក្រោមទោស «ជាប់គុកមួយជីវិត» រួចទៅហើយ ពាក់ព័ន្ធនឹងបទចោទប្រកាន់ពីបទក្បត់ជាតិ និងការដឹកនាំរដ្ឋប្រហារ ក្នុងព្រឹត្តិការណ៍ប្រកាសច្បាប់អាជ្ញាសឹកកាលពីចុងឆ្នាំ២០២៤។ មិនត្រឹមតែប៉ុណ្ណោះ លោកនៅមានសំណុំរឿងមួយទៀត ដែលកំពុងស្ថិតក្នុងការជំនុំជម្រះ គឺការចោទប្រកាន់ថាបានបញ្ជូនដ្រូនទៅកាន់ប្រទេសកូរ៉េខាងជើង ដើម្បីបង្កើតជាលេសបង្កជម្លោះ ដែលអាចឲ្យ​លោកប្រឈមនឹងទោសបន្ថែមរហូតដល់ ៣០ឆ្នាំទៀត។

ក្នុងពេលជាមួយគ្នានេះដែរ សំណាញ់ច្បាប់ក៏បានគ្របដណ្ដប់ទៅលើក្រុមគ្រួសាររបស់លោកផងដែរ។ ភរិយារបស់លោក គឺលោកស្រី Kim Keon Hee ក៏ទើបតែត្រូវបានតុលាការបង្កើនទោសឲ្យ​ជាប់ពន្ធនាគារ ៤ឆ្នាំ កាលពីថ្ងៃអង្គារកន្លងទៅ ពាក់ព័ន្ធនឹងរឿងអាស្រូវពុករលួយ និងការកែប្រែតម្លៃភាគហ៊ុន។ ស្ថានការណ៍នេះ បានធ្វើឲ្យ​គ្រួសារអតីតថ្នាក់ដឹកនាំរូបនេះ ធ្លាក់ក្នុងវិបត្តិផ្លូវច្បាប់ដ៏ធំបំផុត នៅក្នុងប្រវត្តិសាស្ត្រនយោបាយកូរ៉េខាងត្បូងសម័យទំនើប៕

ប្រែសម្រួល៖ ឈាង