តើមន្ត្រីកម្ពុជាណាខ្លះដែលកំពុង និងធ្លាប់បម្រើការងារនៅសាលាក្ដីខ្មែរក្រហម ?

អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា​ (អ.វ.ត​.ក) គឺ​ជា​តុលាការ​ពិសេស​មួយ​ដែល​ទទួល​បាន​ការ​គាំ​ទ្រ​ពី​មជ្ឈ​ដ្ឋា​ន​​អន្ដរ​ជាតិ​ តាម​រយៈ​អង្គ​ការ​សហ​ប្រ​ជា​ជាតិ ហើយតុលាការ​នេះ ​ត្រូវ​បាន​សាធារណជន​ស្គាល់​ថា​ «តុលាការខ្មែរ​ក្រហម​»។ ដោយមានកិច្ចព្រមព្រៀងរវាងរាជរដ្ឋាភិបាលកម្ពុជា និងអង្គការសហប្រជាជាតិ តុលាការ​​ខ្មែរក្រហមនេះ បានប្រព្រឹត្ដទៅ​​​នៅ​ក្នុង​​​ប្រទេស​​​កម្ពុជា ដោយ​ប្រើប្រាស់ទាំង​​មន្ដ្រី ​និង​​ចៅក្រម​​កម្ពុជា គួបផ្សំ​​ជាមួយ​​មន្ដ្រី​ និង​​ចៅក្រម​​អន្ដរជាតិ ​​ដើម្បីឲ្យដំណើរការនៃការកាត់ក្ដីធានា​បាននូវ​​យុត្ដិធម៌​​ជាលក្ខណៈ​​​អន្ដរជាតិ។ ដូច្នេះ តើមន្ត្រីកម្ពុជារូបណាខ្លះ កំពុងបម្រើការងារនៅអង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា? ហើយអ្នកទាំងនោះ មានតួនាទី និងកាន់លើកិច្ចការអ្វីខ្លះ?

១/ លោក ហែម ក្រាញ់តូនី

លោក ហែម ក្រាញ់តូនី មានតួនាទីជាប្រធានការិយាល័យរដ្ឋបាល ដែលការិយាល័យ​​រដ្ឋបាល​​នេះ មានតួនាទី​​ផ្ដល់​សេវាកម្ម​ដល់​អង្គជំនុំជម្រះ ការិយាល័យសហចៅក្រម​ស៊ើបអង្កេត ​សហ​ព្រះរាជអាជ្ញា និង​​ការិយាល័យ​​ផ្សេងៗទៀត។ លោក ហែម ក្រាញ់តូនី ក្នុងនាមជាប្រធានការិយាល័យរដ្ឋបាល បានផ្ដល់កិច្ចសម្របសម្រួលទូទៅ និងការណែនាំសម្រាប់ផ្នែក និងអង្គភាពផ្សេងៗនៅក្រោមចំណុះការិយាល័យរដ្ឋបាល ដើម្បីធានានូវការគាំទ្រពេញទំហឹងដល់ដំណើរការតុលាការ។

បើនិយាយអំពីប្រវត្តិវិញ គឺលោក ហែម ក្រាញ់តូនី ទទួលបានការបណ្ដុះបណ្ដាលនៅប្រទេសបារាំង ដោយបានបញ្ចប់ការសិក្សាថ្នាក់បរិញ្ញាបត្រផ្នែកច្បាប់ជំនួញ និងច្បាប់ការងារ និងបញ្ចប់ថ្នាក់បរិញ្ញាបត្រជាន់ខ្ពស់ចំនួនពីរ គឺបរិញ្ញាបត្រជាន់ខ្ពស់ផ្នែកច្បាប់សង្គម និងបរិញ្ញាបត្រជាន់ខ្ពស់ផ្នែកបណ្ដុះបណ្ដាលរដ្ឋបាល នៅសាកលវិទ្យាល័យប៉ារីស។

ក្នុងឆ្នាំ១៩៩៣ លោក បានត្រឡប់មកកម្ពុជាវិញ ដោយធ្វើជាទីប្រឹក្សាផ្នែកច្បាប់ឲ្យគណៈកម្មការការងារនៃសភាធម្មនុញ្ញ ក្រោយការបោះឆ្នោតអាណត្តិទី១ ឆ្នាំ១៩៩៣ ដែលរៀបចំឡើងដោយអង្គការសហប្រជាជាតិ។ បន្ទាប់មក លោក ហែម ក្រាញ់តូនី បានចូលបម្រើការងារនៅទីស្ដីការណៈរដ្ឋមន្ដ្រី ហើយបានទទួលការតែងតាំងតួនាទីជាបន្ដបន្ទាប់ ជាអាទិ៍ ទីប្រឹក្សាផ្នែកច្បាប់របស់ទេសរដ្ឋមន្ដ្រីទទួលបន្ទុកទីស្ដីការគណរដ្ឋមន្ដ្រី សមាជិកក្រុមប្រឹក្សាអ្នកច្បាប់ និងជាទីប្រឹក្សាច្បាប់របស់ក្រុមការងាររាជរដ្ឋាភិបាលសម្រាប់ការជំនុំជម្រះក្តីខ្មែរក្រហម។ ក្នុងឆ្នាំ២០០៤ លោក ត្រូវបានតែងតាំងជាអនុរដ្ឋលេខាធិការទីស្ដីការគណៈរដ្ឋមន្ដ្រី ហើយដល់បច្ចុប្បន្ននេះ លោកកំពុងកាន់តំណែងជារដ្ឋលេខាធិការទីស្ដីការគណៈរដ្ឋមន្ត្រី ទទួលបន្ទុកការងារអង្គជំនុំជម្រះវិសាមញ្ញក្នុងតុលាការកម្ពុជា។

២/ លោក នេត្រ ភក្ត្រា

នៅពេលបច្ចុប្បន្ននេះ លោក នេត្រ ភក្ត្រា កំពុងកាន់មុខតំណែងជារដ្ឋលេខាធិការ និងជាអ្នកនាំពាក្យនៃក្រសួងបរិស្ថាន។ ទន្ទឹមនេះ លោក ក៏មានតួនាទីជាប្រធានផ្នែកកិច្ចការសាធារណៈ និងជាអ្នកនាំពាក្យនៃអង្គជំនុំជម្រះវិសាមញ្ញក្នុងតុលាការកម្ពុជាផងដែរ។ តួនាទីជាប្រធានផ្នែកកិច្ចការសាធារណៈ និងជាអ្នកនាំពាក្យនេះ លោក នេត្រ ភក្ត្រា តែងតែបានផ្ដល់កិច្ចសហការល្អជាមួយអ្នកសារព័ត៌មានជាតិ-អន្តរជាតិ ដើម្បីផ្ដល់នូវសេចក្ដីរាយការណ៍ ក៏ដូចជា ព័ត៌មាននានា រួមទាំងការធ្វើបទបង្ហាញដល់សិស្សនិស្សិត យុវជន និងសាធារណជនទូទៅទាក់ទងទៅនឹងដំណើរការរបស់សាលាក្ដីខ្មែរក្រហម។

លោក នេត្រ ភក្ត្រា គឺជាអតីតអ្នកសារព័ត៌មានមួយរូប ប្រកបដោយបទពិសោធ និងចំណេះដឹង ដោយលោកធ្លាប់បម្រើការងារនៅស្ថាប័នសារព័ត៌មានជាច្រើន ដូចជា បម្រើការនៅទូរទស្សន៍ជាតិកម្ពុជា ជាអ្នករាយការណ៍ព័ត៌មានប្រចាំខេត្តសៀមរាបឲ្យកាសែតសំណេរថ្មី ជានិពន្ធនាយកកាសែតមេគង្គថែម និងក្រោយមកជានាយកគ្រប់គ្រងការីនិពន្ធផ្នែកភាសាខ្មែរ នៅកាសែតភ្នំពេញប៉ុស្ដិ៍។ លោកបានបញ្ចប់ការសិក្សាថ្នាក់បរិញ្ញាបត្រចំនួនពីរ គឺបរិញ្ញាបត្រផ្នែកភាសាបារាំង និងបរិញ្ញាបត្រផ្នែកសារព័ត៌មាននៅសាកលវិទ្យាល័យភូមិន្ទភ្នំពេញ ហើយលោកក៏ធ្លាប់បានទៅសិក្សានៅប្រទេសបារាំង ផងដែរ។

៣/ លោកស្រី ជា លាង

លោកស្រី ជា លាង ជាសហព្រះរាជអាជ្ញាជាតិ​នៃ​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា បន្ទាប់ពីអង្គជំនុំជម្រះនេះ​ត្រូវបានបង្កើតឡើងនៅក្នុងប្រទេសកម្ពុជា ក្នុងឆ្នាំ២០០៦។ ក្នុងនាមជាសហព្រះរាជអាជ្ញានៃសាលាក្តីខ្មែរក្រហម លោកស្រី បាន​ធ្វើការ​ចោទប្រកាន់​ជន​ជាប់ចោទជាមេដឹកនាំ​កំពូលៗ​ ក្នុង​របប​ខ្មែរក្រហមជាបន្តបន្ទាប់ ​ដើម្បី​យក​មក​កាត់ទោសតាមផ្លូវច្បាប់​។ ដោយផ្អែកលើបទពិសោធនេះ ក្នុង​ឆ្នាំ​២០០៩ លោកស្រី ជា លាង ក៏​ទទួល​ការ​តែងតាំង​​ជា​អគ្គព្រះរាជអាជ្ញានៃមហាអយ្យការអម​តុលាការ​កំពូល​ ហើយជាស្រ្តីទី១ ដែលកាន់តំណែងកំពូលនេះនៅស្ថាប័នតុលាការ នាពេលបច្ចុប្បន្ន។ តាមរយៈតួនាទីនេះ លោកស្រីបានបំពេញការងារយ៉ាងសកម្មលើកិច្ចការច្បាប់ និងតុលាការនៅកម្ពុជាដែលភាគច្រើន គឺលោកស្រីធ្វើលើកិច្ចការព្រហ្មទណ្ឌ។

លោកស្រី ជា លាង ជាអតីតនិស្សិតអាហារូបករណ៍ដែលទៅ​​សិក្សា​នៅ​ប្រទេស​អាល្លឺម៉ង់ ​ជំនាញនីតិសាស្ត្រ ដោយលោកស្រីបានចំណាយ​ពេលសិក្សាប្រមាណ​ ៧​ឆ្នាំ ដើម្បីទទួលបានសញ្ញាបត្រថ្នាក់​បរិញ្ញាបត្រ​ជាន់ខ្ពស់​នីតិសាស្រ្ត ​នៅ​សាកលវិទ្យាល័យ Martin Luther នៅឆ្នាំ ១៩៩៥។ ទន្ទឹមនេះ លោកស្រីក៏ទទួលបានវគ្គបណ្ដុះបណ្ដាលផ្សេងៗជាច្រើនទៀត នៅប្រទេសដាណឺម៉ាក ប្រទេសជប៉ុន និងវគ្គបណ្ដុះបណ្ដាលស្ដីពី ការស៊ើបអង្កេតរឿងក្ដីព្រហ្មទណ្ឌអន្តរជាតិ នៅទីក្រុងឡាអេ ប្រទេសហូឡង់។

៤/ លោក យូ ប៊ុនឡេង

លោក យូ ប៊ុនឡេង មានតួនាទីជាសហចៅក្រមស៊ើបអង្កេតជាតិនៃសាលាក្ដីខ្មែរក្រហម។ សព្វថ្ងៃ លោក យូ ប៊ុនឡេង គឺជាអនុប្រធានតុលាការកំពូល បន្ទាប់ពីលោកធ្លាប់បានកាន់តំណែងជាប្រធានសាលាឧទ្ធរណ៍ភ្នំពេញ តាំងពីឆ្នាំ២០០៧។ មុនពេលតែងតាំងនេះ លោកបានបម្រើការងារនៅក្រសួងយុត្តិធម៌អស់រយៈពេលប្រមាណ ១១ឆ្នាំ ក្នុងតួនាទីជាប្រធានការិយាល័យកិច្ចការបណ្តឹងរដ្ឋប្បវេណី។

លោក យូ ប៊ុនឡេង បានទទួលសញ្ញាបត្របរិញ្ញាបត្រច្បាប់នៃសាកលវិទ្យាល័យហូជីមិញ ប្រទេសវៀតណាម និងបានបញ្ចប់ការសិក្សាអនុបណ្ឌិតច្បាប់ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច រាជធានីភ្នំពេញ។

ជាមួយគ្នានេះ ក្រៅពីមន្ត្រីទាំងបួនខាងលើនេះ ក៏មានមន្ត្រីតុលាការកម្ពុជាមួយចំនួនទៀត បាននិងកំពុងបំពេញការងារនៅ អ.វ.ត.ក ដែលភាគច្រើនជាចៅក្រមជំនុំជម្រះ ជាអាទិ៍ លោក គង់ ស៊្រីម ​​ជា​ប្រធាន​​អង្គជំនុំជម្រះ​​តុលាការ​​កំពូល និង​ជា​​ចៅក្រម​ជាតិ​​ប្រចាំការ​​នៅ អ.វ.ត.ក  និងលោក និល ណុន ជាប្រធាន​អង្គជំនុំជម្រះ​សាលា​ដំបូង​នៃ អ.វ.ត.ក ជាដើម។ ដោយឡែក លោក ឌឹម សុវណ្ណារុំ ក៏ធ្លាប់ធ្វើជាមន្ត្រីផ្នែកកិច្ចការសាធារណៈផងដែរ មុនពេលដែលលោកត្រូវមកបំពេញតួនាទីជាសមាជិកគណៈកម្មាធិការជាតិរៀបចំការបោះឆ្នោត គ.ជ.ប ៕

ដោយ៖ ធឿន វ៉ាន់សុង