ថ្ងៃទី១៦ កក្កដា ស្អែកនេះ សម្ដេចធិបតី នឹងអញ្ជើញទស្សនកិច្ចអគារអនុវត្តមុខងារសេសសល់របស់សាលាក្ដីខ្មែរក្រហម

នៅព្រឹកថ្ងៃទី១៦ ខែកក្កដា ឆ្នាំ២០២៤ ស្អែកនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នឹងអញ្ចើញទស្សនកិច្ចអគារអនុវត្តមុខងារសេសសល់របស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ឬហៅកាត់ថា សាលាក្ដីខ្មែរក្រហម និងជាអធិបតីក្នុងពិធីបញ្ចុះបឋមសិលាជានិមិត្តរូបក្នុងការចាប់ផ្តើមសាងសង់បន្ទប់ពិគ្រោះយោបល់សម្រាប់ជនរងគ្រោះ សាលតាំងពិព័រណ៍អចិន្ត្រៃយ៍ស្តីពីដំណើរការជំនុំជម្រះក្តី និងឧទ្យានសម្រាប់ការចងចាំនៅក្នុងអគារអនុវត្តមុខងារ សេសសល់របស់ អ.វ.ត.ក។

ផ្អែកតាមស្មារតីកិច្ចព្រមព្រៀងបន្ថែមស្តីពីការរៀបចំក្នុងពេលអន្តរកាល និងការបញ្ចប់ការងាររបស់អង្គជំនុំជម្រះវិសាមញ្ញ នៅឆ្នាំ២០២១ រវាងរាជរដ្ឋាភិបាលកម្ពុជា និងអង្គការសហប្រជាជាតិ អ.វ.ត.ក ត្រូវបានផ្តល់អាណត្តិឱ្យអនុវត្តមុខងារ សេសសល់ ដែលរួមមាន មុខងារគតិយុត្តិយុត្តាធិការ និងមុខងារមិនមែនយុត្តាធិការ សម្រាប់រយៈពេល៣ឆ្នាំដំបូងពីឆ្នាំ ២០២៣ ដល់២០២៥។ ចាប់ពីដើមឆ្នាំ២០២៣ រហូតដល់នេះ ភាគីជាតិ​​ និងភាគីអន្តរជាតិនៃ អ.វ.ត.ក. បានចាប់ផ្តើមអនុវត្តមុខងារសេសសល់របស់ខ្លួននៅឆ្នាំទី១ និងសម្រេចបាននូវសមិទ្ធផលការងារសំខាន់ៗជាច្រើន រួមមាន៖ បានផ្ទេរពិរុទ្ធជន ខៀវ សំផន ដែលបច្ចុប្បន្នមានអាយុ៩៤ឆ្នាំ ទៅអនុវត្តទោសអស់មួយជីវិតនៅពន្ធនាគារខេត្តកណ្ដាល កាលពីថ្ងៃទី៣០ ខែមករា ឆ្នាំ២០២៣ ក្រោមការគ្រប់គ្រងរបស់អគ្គនាយកដ្ឋានពន្ធនាគារ នៃក្រសួងមហាផ្ទៃ។ បច្ចុប្បន្ន អ.វ.ត.ក. បាននិងកំពុងតាមដានការអនុវត្តទោសចំពោះពិរុទ្ធជនរូបនេះជាមួយគណៈកម្មាធិការអន្តរជាតិកាកបាទក្រហម ដោយផ្អែកលើបទដ្ឋាន និងទម្លាប់អនុវត្តជាអន្តរជាតិ ព្រមទាំងស្មារតីនៃកិច្ចព្រមព្រៀងបន្ថែមខាងលើ។

អ.វ.ត.ក. បានបំពេញកាតព្វកិច្ចដូចបានតម្រូវឱ្យអនុវត្តនៅក្នុងសាលដីកាស្ថាពរ នៃសំណុំរឿង០០២/០២ ក្នុងការជូនដំណឹងអំពីបច្ចុប្បន្នភាពនៃសមិទ្ធផលការងារសេម្រេចបាននិងការអនុវត្តមុខងារសេសសល់​របស់ អ.វ.ត.ក. ដល់ដើមបណ្តឹងរដ្ឋប្បវេណីចំនួនប្រមាណ៣ ១០០នាក់ ស្មើនឹង៨០% នៃដើមបណ្តឹងរដ្ឋប្បវេណីសរុបចំនួន ៣ ៨៧៥នាក់ ដែលបាននិងកំពុងរស់នៅក្នុង២៥ រាជធានីខេត្ត ព្រមទាំងបានធ្វើចំណាត់ថ្នាក់ពីប្រភេទឯកសារសម្ងាត់បំផុតនិងសម្ងាត់ ទៅជាឯកសារសាធារណៈនៃឯកសារសំណុំរឿង០០២ បានចំនួនប្រមាណ២២ម៉ឺនទំព័រ និងកំពុងពិនិត្យមើលឯកសារសំណុំរឿងដ៏ទៃទៀតដែលនៅសល់ប្រមាណជា២លានទំព័រទៀត សម្រាប់ធ្វើការផ្សព្វផ្សាយជាសាធារណៈ។         

បន្ថែមពីនេះ អ.វ.ត.ក បានរៀបចំ និងដាក់ឱ្យប្រើប្រាស់ជាផ្លូវការនូវមជ្ឈមណ្ឌលធនធានរបស់​ អ.វ.ត.ក កាលពីថ្ងៃទី២៧ ខែកញ្ញា ឆ្នាំ២០២៣ ខណៈគម្រោងការងារចំនួនពីរទៀត រួមមាន ១) ការសាងសង់បន្ទប់ពិគ្រោះយោបល់សម្រាប់ជនរងគ្រោះ និងសាលតាំងពិព័រណ៍អចិន្ត្រៃយ៍ស្តីពីដំណើរការជំនុំជម្រះក្តី និង២) ឧទ្យានសម្រាប់ការចងចាំ គ្រោងនឹងសាងសង់បញ្ចប់នៅឆ្នាំ២០២៤ និងឆ្នាំ២០២៥។

អ.វ.ត.ក ក៏បាននិងកំពុងរៀបចំដំណើរទស្សនកិច្ចសិក្សា ២លើកក្នុងមួយសប្តាហ៍ដល់សាធារណជន ជាពិសេសយុវជន យុវនារី សិស្ស និស្សិត និងគ្រូបង្រៀនដែលមានអ្នកចូលរួមសរុបប្រមាណ៤០ ២៩៣នាក់ ចាប់ពីខែមករា ឆ្នាំ២០២៣ រហូតមកទល់ខែមិថុនា ឆ្នាំ២០២៤។ អ្នកចូលរួមកម្មវិធីនេះ ត្រូវបានពន្យល់អំពីដំណើរការ និងសមិទ្ធផលសម្រេចបានរបស់ អ.វ.ត.ក. ទៅទស្សនាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង, សារមន្ទីរវាលពិឃាតជើងឯក, និងវិមានឈ្នះ ឈ្នះរបស់រាជរដ្ឋាភិបាល។

ការផលិតវីដេអូខ្លីៗទៅលើប្រធានបទជាច្រើន ទាក់ទងទៅនឹងអាណត្តិ និងការងារប្រតិបត្តិការរបស់ អ.វ.ត.ក ដែលមានទម្រង់ជាលក្ខណៈសំណួរ និងចម្លើយ ទាក់ទងនឹងការបង្កើត និងដំណើរការកាត់សេចក្តីនៃគ្រប់សំណុំរឿងនៅ អ.វ.ត.ក ដើម្បីពង្រីកការយល់ដឹងជាលក្ខណៈសម្រាយ ឬស្រួលយល់ដល់យុវជនកម្ពុជា ពាក់ព័ន្ធទៅនឹងឧក្រិដ្ឋកម្មធ្ងន់ធ្ងរនិងអំពើសាហាវយង់ឃ្នងនៃរបបខ្មែរក្រហម តាមរយៈប្រព័ន្ធផ្សព្វផ្សាយនានា និងការចុះហត្ថលេខាលើអនុស្សរណៈនៃការយោគយល់គ្នា (MOU) ចំនួន៨ ជាមួយដៃគូជាស្ថាប័នជាតិនិងអន្តរជាតិក្នុងការចែករំលែកនិងផ្លាស់ប្តូរចំណេះដឹង ចំណេះធ្វើ បទពិសោធ និងយុត្តិសាស្រ្ត របស់អ.វ.ត.ក. ទាក់ទងនឹងយុត្តិធម៌អន្តរកាល ដែលជាយុត្តិធម៌ក្រោយដំណោះស្រាយជម្លោះប្រដាប់អាវុធ និងដំណើរការកាត់សេចក្តី៕