ព័ត៌មានជាតិ

ព្រឹត្តិការណ៍រាត្រីសមោសសប្បុរសធម៌ ប្រមូលបានថវិកាជាង ៨ម៉ឺន ដុល្លារប្រគល់ជូនមន្ទីរពេទ្យគន្ធបុប្ផា

បានផុស

២ years មុន

នៅ

ថ្ងៃអាទិត្យ ១៨ ធ្នូ ២០២២

ដោយ

ព្រឹត្តិការណ៍រាត្រីសមោសរសប្បុរសធម៌ ដែលរៀបចំដោយក្រសួង វប្បធម៌ និងវិចិត្រសិល្បៈ កាលពីថ្ងៃទី១៦ ខែធ្នូ នៅបរិវេណប្រាសាទបាយ័ន ខេត្តសៀមរាប កន្លងទៅនេះ ប្រមូលថវិកាបានប្រមាណជាង ៨ម៉ឺនដុល្លារអាមេរិក(៨២,៧០៣ ដុល្លារអាមេរិក) ប្រគល់ជូនដល់មន្ទីរពេទ្យគន្ធបុប្ផា តាមរយៈការសម្ដែងសិល្បៈទស្សនីយភាពនានា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមក្រសួងវប្បធម៌ និងវិចិត្រសិល្បៈ រាត្រីសមោសរសប្បុរសធម៌ ដែលបានប្រារព្ធរៀបចំនៅលើទឹកដីអង្គរដ៏ពិសិដ្ឋនេះ ធ្វើឡើងក្នុងគោលបំណងដើម្បីចូលរួមអបអរសាទរខួប ៣០ ឆ្នាំ នៃការដាក់បញ្ចូលរមណីយដ្ឋានអង្គរ ក្នុងបញ្ជីបេតិកភណ្ឌពិភពលោករបស់អង្គការយូណេស្កូ។ ការរៀបចំព្រឹត្តិការណ៍នេះ ក៏ដើម្បីស្វែងរកថវិកាឧបត្ថម្ភគាំទ្រដល់មន្ទីរគន្ធបុប្ផា តាមរយៈការលក់សំបុត្រចូលទស្សនាការសម្ដែងសិល្បៈទស្សនីយភាពជាច្រើនទម្រង់ ជាមួយនឹងការទទួលទានអាហារពេលល្ងាចផងដែរ។ លើសពីនេះទៀត ក៏មានការអញ្ជើញចូលរួមពីថ្នាក់ដឹកនាំរបស់ក្រសួង-ស្ថាប័នក្នុងប្រទេស ក្រុមការងារអង្គការយូណេស្កូ អ្នកជំនាញការអន្តរជាតិ និងដៃគូអន្តរជាតិនៃគម្រោងផ្សេងៗនៅតំបន់រមណីយដ្ឋានអង្គរ និងបណ្ដាវិស័យក្រុមហ៊ុនឯកជន។

ទន្ទឹមនោះ ក្នុងព្រឹត្តិការណ៍មួយនេះ ក៏មានវត្តមានសិល្បករសិល្បការិនី ក្នុងប្រព័ន្ធ និងក្រៅប្រព័ន្ធជាច្រើននាក់ ដែលអញ្ជើញមកពីសាលាមធ្យមវិចិត្រសិល្បៈ នាយកដ្ឋានសិល្បៈទស្សនីយភាព ក្លឹបសិល្បៈវប្បធម៌ ឱម យុវណ្ណឌី ក្រុមព្រះសូរិយា សហព័ន្ធយុទ្ធក្រមខម សាលាគុណល្បុក្កតោជ័យតេជៈ សមាគមលក្ខណ៍រ៉ៃយុងល្បុក្កតោ ក្រុមភ្លេងបុរាណទេពបុទុមវង្ស និងក្រុមល្បុក្កតោពេជ្រចរណៃ បានរួមគ្នាបង្កើតបាននូវផ្ទាំងសិល្បៈទស្សនីយភាពមួយដ៏អស្ចារ្យ បង្ហាញឱ្យឃើញនូវវប្បធម៌ អរិយធម៌ដ៏សម្បូរបែប និងវិសេសវិសាលបំផុតរបស់បុព្វបុរសខ្មែរ៕

ដោយ៖ ថារី