ពលរដ្ឋនៅរតនគិរីដើរទិញអាវរងាក្រាស់ៗ ក្នុងអំឡុងពេលអាកាសធាតុចុះត្រជាក់

អ្នកស្រី សំ បូ អាយុ ៥០ឆ្នាំ ជាប្រជាពលរដ្ឋរស់នៅក្នុងក្រុងបានលុង បានលើកឡើងនៅថ្ងៃទី២០ធ្នូ ថា ខណៈដែលអាកាសធាតុចាប់ផ្តើមប្រែប្រួលចុះត្រជាក់ លាយឡំជាមួយនឹងខ្យល់ហួតហែងយ៉ាងខ្លាំងផងនោះ អ្នកស្រីចាំបាច់រកទិញ មួកអំបោះ ស្រោមដៃ ស្រោមជើង និងខោអាវ រងា ក្រាស់ៗ ដើម្បីទប់ទល់នឹងអាកាសធាតុធ្លាក់ត្រជាក់នេះ។ ពិសេសត្រៀមបង្ការសម្រាប់ឪពុកម្តាយ ដែលមានអាយុច្រើន ដែលពួកគាត់ចាញ់នឹងភាពត្រជាក់ ព្រមទាំងចៅតូចៗផងដែរ។

លោក សយ សុណ្ណ ភេទប្រុស អាយុ៤៥ឆ្នាំ ដែលកំពុងទិញខោអាវ រងា បានឲ្យដឹងថា អាកាសធាតុចាប់ផ្តើមប្រែប្រួល មានភាពត្រជាក់គួរសម ពិសេសពេលព្រឹកព្រលឹម និងពេលយប់។ ដើម្បីទប់ទល់នឹងភាពត្រជាក់ខាងលើ លោកបានមកកាន់ផ្សារបានលុង ដើម្បីរកទិញខោ ឬអាវរងា ព្រោះឆ្នាំនេះអាកាសធាតុត្រជាក់ខ្លាំងជាងឆ្នាំកន្លងទៅ និងអូសបន្លាយពេលយូរទៅទៀត។

ក្រសួងធនធានទឹក និងឧតុនិយមនៅថ្ងៃទី ២០ ខែធ្នូនេះបានប្រកាសថា ព្រះរាជាណាចក្រកម្ពុជាបន្តទទួលរងឥទ្ធិពលទ្រនុងសម្ពាធខ្ពស់(ចិន) និងខ្យល់មូសុងឦសាន្តក្នុងកម្រិតមធ្យមចាប់ពីថ្ងៃទី ២១ ដល់ថ្ងៃទី ២៧ ខែធ្នូ ឆ្នាំ ២០២២នេះ។

បាតុភូតនេះ ធ្វើឲ្យអាកាសធាតុចុះត្រជា់នៅតាមបណ្ដាខេត្តមួយចំនួន រួមមាន ខេត្តមណ្ឌលគិរី រតនគិរី ព្រះវិហារ និងខេត្តឧត្តរមានជ័យ អាកាសធាតុនឹងធ្លាក់ចុះក្នុងកម្រិត ១៦ អង្សា៕

អត្ថបទ៖ វុទ្ធឦសាន