ព័ត៌មានជាតិ

សម្តេចតេជោ បានចាត់ទុកថាស្ត្រីមានផ្ទៃពោះ និងកុមារ គឺជាអាទិភាព១ ក្នុងអាណត្តិទី៦នេះ

បានផុស

៤ years មុន

នៅ

ថ្ងៃអង្គារ ១២ មករា ២០២១

ដោយ

លោក វង សូត រដ្ឋមន្ត្រីក្រសួងសង្គមកិច្ច បានប្រាប់ឲ្យដឹងនាថ្ងៃថ្ងៃទី១២ ខែមករា ឆ្នាំ២០២១ថា ប្រមុខរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រីបានចាត់ទុកថាស្ត្រីមានផ្ទៃពោះ និងកុមារអាយុក្រោម២ឆ្នាំ គឺជាអាទិភាព១ដ៏សំខាន់របស់រាជរដ្ឋាភិបាលក្នុងអាណត្តិទី៦នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រីវង សូត ថ្លែងបែបនេះ ខណៈពេលផ្តល់បទសម្ភាសដល់អ្នកសារព័ត៌មាននៅទីស្តីការក្រសួង ដែលបានផ្តោតសំខាន់ទៅនឹងអាទិភាពទី១របស់រាជរដ្ឋាភិបាល គឺបានផ្តល់ភាពចាំបាច់សម្រាប់ស្ត្រីមានផ្ទៃពោះ និងកុមារអាយុក្រោម២ឆ្នាំក្នុងការទទួលការឧបត្ថម្ភសាច់ប្រាក់ពីរាជរដ្ឋាភិបាល តាមរយៈការចុះឈ្មោះថ្មីនៅគ្រប់ថ្នាក់មូលដ្ឋានឃុំ សង្កាត់ទូទាំងប្រទេសកម្ពុជា។ បទសម្ភាសស្ដីពីកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំនាឪកាសនោះលោកវង សូត បានថ្លែងថា ក្រសួងបានជំរុញឲ្យសកម្មភាពរបស់ក្រុមការងារនាយកដ្ឋានសុខុមាលភាពសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទា បន្តសកម្មភាពផ្សព្វផ្សាយនិងការចុះថតវីដេអូទុកជាឯកសារដ៏សំខាន់ហើយឯកសារនេះ មានអត្ថប្រយោជន៍ណាស់ ដើម្បីបញ្ចៀសនូវភាពមិនប្រក្រតីណាមួយកើតឡើង ពិសេសការខុសឈ្មោះ ឬអត្តសញ្ញាណ ក្នុងកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំតែម្ដង។

លោករដ្ឋមន្ត្រីបន្តថា ជាក់ស្ដែងសកម្មភាពទូទាំងប្រទេសCTPបានអនុវត្តជាប្រចាំថ្ងៃនៃការទទួលផលរបស់ស្ត្រីមានផ្ទៃពោះ និងកុមារអាយុក្រោម២ឆ្នាំ ក្នុងគ្រួសារក្រីក្រ នៅក្នុងកម្មវិធីឧបត្ថម្ភសាច់ប្រាក់ជូនស្រី្តមានផ្ទៃពោះនិងកុមារអាយុក្រោម២ឆ្នាំ បានមកជាបន្តហូរហែរៀងរាល់ថ្ងៃ ដោយការចុះឈ្មោះថ្មីនៅតាមឃុំ សង្កាត់ និងការពិនិត្យសុខភាព នៅតាមមន្ទីរពេទ្យរដ្ឋនៅទូទាំងប្រទេស ដែលជាកម្មវិធីអាទិភាព១របស់រាជរដ្ឋាភិបាលក្នុងនីតិកាលទី៦នេះ ដើម្បីជាការវិនិយោគរយៈពេលវែងលើធនធានមនុស្សរបស់កម្ពុជា និងការកាត់បន្ថយអត្រាមរណភាពមាតា និងទារក។ ផ្អែកតាមក្របខ័ណ្ឌគោលនយោបាយជាតិគាំពារសង្គម (២០១ ៦-២០២៥) រាជរដ្ឋាភិបាលបានផ្ទេរការអនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ ពីក្រសួងសុខាភិបាលទៅក្រសួងសង្គមកិច្ច អតីតយុទ្ធជន និងយុវនីតិសម្បទា ដើម្បីគ្រប់គ្រង និងអនុវត្តឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ឆ្នាំ ចាប់តាំងពីថ្ងៃអំពាវនាវកាលពីពាក់កណ្តាលខែធ្នូឆ្នាំ២០២០មកម្ល៉េះ ។

កម្មវិធីនេះ ត្រូវបានប្រើប្រាស់យន្តការអនុវត្តជាលក្ខណៈអន្តរស្ថាប័ន ដែលមានការចូលរួមពីក្រសួង ស្ថាប័នទាំងនៅថ្នាក់ជាតិ និងថ្នាក់ក្រោមជាតិ ដែលក្នុងនោះនៅថ្នាក់ជាតិមានក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងមហាផ្ទៃ ក្រសួងសុខាភិបាល ក្រសួងសេដ្ឋកិច្ច និងហិរញ្ញវត្ថុ ក្រសួងផែនការ និងអគ្គលេខាធិការដ្ឋាននៃក្រុមប្រឹក្សាជាតិគាំពារសង្គម។ នៅថ្នាក់រាជធានី ខេត្ត មានរដ្ឋបាលរាជធានី ខេត្ត មន្ទីរសង្គមកិច្ច អតីតយុទ្ធជន និងយុវនីតិសម្បទា និងមន្ទីរសុខាភិបាលរាជធានី ខេត្ត និងនៅថ្នាក់ឃុំ សង្កាត់ មានរដ្ឋបាលឃុំ សង្កាត់ និងមូលដ្ឋានសុខាភិបាលសាធារណៈ ដែលនៅក្បែរលំនៅឋានតែម្ដង៕

អត្ថបទ៖ វិមាន