រឿងជំនួយទៅតួកគី៖ ឯកឧត្តម ហ៊ុន ម៉ាណែត សុំឲ្យវិទ្យុVODបង្ហាញភស្តុតាង តែបើមិនមាន ត្រូវសុំទោស

ឯកឧត្តមបណ្ឌិត ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក នៅព្រឹកថ្ងៃសៅរ៍នេះ បានចេញមកប្រតិកម្មទៅនឹងការចុះផ្សាយរបស់វិទ្យុ VOD ដែលផ្សាយចោទប្រកាន់ថា​ ឯកឧត្តមបានចុះហត្ថលេខាផ្តល់ជំនួយដល់តួកគីជំនួសសម្តេចតេជោ ហ៊ុន សែន ដែលជាឪពុក និងជានាយករដ្ឋមន្រ្តី។ ឯកឧត្តម ហ៊ុន ម៉ាណែត បានស្នើសុំឲ្យវិទ្យុមួយនេះ បង្ហាញនូវឯកសារដែលខ្លួនបានចោទប្រកាន់មកលើឯកឧត្តម។

តាមរយៈទំព័រហ្វេសប៊ុក ឯកឧត្តម បណ្ឌិត ហ៊ុន ម៉ាណែត លើកឡើងថា៖«ខ្ញុំសុំឲ្យវិទ្យុ VOD បង្ហាញឯកសារដែលបញ្ជាក់ថា ខ្ញុំបានចុះហត្ថលេខាជំនួសសម្តេចតេជោ ប្រមុខរាជរដ្ឋាភិបាលក្នុងការផ្តល់ជំនួយថវិកាទៅឲ្យប្រទេសតួគីដែលកំពុងរងគ្រោះរញ្ជួយដីផង ព្រោះខ្ញុំមិនបានដឹងរឿងនេះ ហើយខ្ញុំក៏មិនមានសិទ្ធិក្នុងការចុះហត្ថលេខាលើឯកសាររបស់រាជរដ្ឋាភិបាលដែរ»។

វិទ្យុ VOD កាលពីថ្ងៃសុក្រ ម្សិលមិញនេះ បានចុះផ្សាយដោយចោទប្រកាន់ថា ឯកឧត្តម ហ៊ុន សែន បានដើរតួជំនួសឪពុកដោយចុះហត្ថលេខាផ្តល់ជំនួយដល់ប្រទេសតួកគី។ វិទ្យុ VOD បានចុះផ្សាយបែបនេះថា៖«មន្ត្រីរដ្ឋាភិបាលថា ការដែលលោក ហ៊ុន ម៉ាណែត ដើរតួនាទីជំនួសឪពុក ដោយចុះហត្ថលេខាផ្តល់ជំនួយថវិកាទៅឱ្យប្រទេសតួកគីដែលកំពុងរងគ្រោះរញ្ជួយដីនោះ មិនមែនជារឿងខុសឆ្គងទេ ដោយសារលោកនាយករដ្ឋមន្ត្រី ហ៊ុន សែន ដែលជាឪពុកកំពុងមានធុរៈ រីឯអ្នកឃ្លាំមើលយល់ថា បើអនុលោមតាមច្បាប់ គឺនាយករដ្ឋមន្ត្រីស្តីទី ឬឧបនាយករដ្ឋមន្ត្រី គួរជាអ្នកបំពេញភារកិច្ចនេះនៅពេលនាយករដ្ឋមន្ត្រីខកខាន»។

ឯកឧត្តមបណ្ឌិត ហ៊ុន ម៉ាណែត បានអះអាងថា មិនបានដឹងពីរឿងនេះទេ ដោយឯកឧត្តមបានធ្វើការស្រាវជ្រាវរកឯកសារដែលពាក់ព័ន្ធ ប៉ុន្តែ ឃើញមានសេចក្តីប្រកាសពត៌មានរបស់ក្រសួងការបរទេស និងសហប្រតិបត្តិការអន្តរជាតិតែមួយគត់ដែលមិនមានហត្ថលេខាអ្នកណាទាំងអស់។ ត្រង់ចំណុចនេះ ឯកឧត្តម ហ៊ុន ម៉ាណែត បានគូសបញ្ជាក់យ៉ាងដូច្នេះថា៖«បើ VOD មិនមានឯកសារ ហើយចុះផ្សាយពត៌មានមិនត្រឹមត្រូវ សូមធ្វើការសុំទោស ព្រមទាំងធ្វើការកែសម្រួលពត៌មាន និងផ្សព្វផ្សាយជាសាធារណៈជាបន្ទាន់ ដើម្បីកុំឲ្យសាធារណមតិមានការយល់ច្រឡំក្នុងរឿងនេះ។  ខ្ញុំមិនចង់បានអ្វីក្រៅតែពីការពារភាពត្រឹមត្រូវនិងច្បាស់លាស់ទេ»៕