ក្រុមការងាររដ្ឋបាលរាជធានីកំពុងមមាញឹក​ផ្តល់ប័ណ្ណកម្មសិទ្ធិជូនពលរដ្ឋ​នៅបុរីកីឡា​ឱ្យរួចរាល់ក្នុងពេល​២ថ្ងៃ

ក្រុមការងារនៃរដ្ឋបាលរាជធានីភ្នំពេញ និងមន្ទីររៀបចំដែនដី នគររូបនីយកម្មសំណង់ និងសុរិយោដី នៅថ្ងៃទី ១៧ កុម្ភៈនេះ កំពុងមមាញឹកផ្តល់ប័ណ្ណកម្មសិទ្ធិលើចំណែកឯកជនជូនប្រជាពលរដ្ឋរស់នៅក្នុងអគារបុរីកីឡាប្រមាណជាង ១ ២០០ គ្រួសារ បន្ទាប់ពីលោក ឃួង ស្រេង អភិបាលរាជធានីភ្នំពេញចែកវិញ្ញាបនបត្រសម្គាល់ម្ចាស់កាលពីថ្ងៃម្សិលមិញ។

លោក ឃួង ស្រេង បានណែនាំថា ក្រុមការងារនៃរដ្ឋបាលរាជធានីភ្នំពេញ អាជ្ញាធរខណ្ឌមករា និងមន្ទីររៀបចំដែនដី ត្រូវចែកជូនប័ណ្ណកម្មសិទ្ធិលើចំណែកឯកជនជូនប្រជាពលរដ្ឋរស់នៅក្នុងអគារបុរីកីឡានេះអោយរួចរាល់ក្នុងរយៈពេល២ថ្ងៃ។

ទទួលបានការណែនាំនេះ អាជ្ញាធរនិងមន្ទីរខាងលើបានបែងចែកក្រុមការងារចំនួន៨ក្រុម ពោលគឺចែកនៅគ្រប់អគារតែម្តង សំដៅធ្វើយ៉ាងណាអោយការងារនេះបានលឿន ទៅតាមការចង់បានរបស់ប្រជាពលរដ្ឋ។

ប្រជាពលរដ្ឋដែលបានរស់នៅក្នុងអាគារបុរីកីឡាទាំងជាង ១ ២០០ គ្រួសារ បានសម្ដែងនូវការត្រេកអររីករាយ និងអរគុណយ៉ាងខ្លាំង ចំពោះសម្ដេចនាយករដ្ឋមន្ត្រី ហ៊ុន សែន ប្រមុខរាជរដ្ឋាភិបាលដែលបានផ្តល់ប្រគល់ប័ណ្ណកម្មសិទ្ធិដល់ពួកគាត់ មានសិទ្ធិដោយគ្មានការភ័យខ្លាច។

អ្នកស្រី ជា សូរិយា ដែលកំពុងរស់នៅជាន់ទី ៦ បានបង្ហាញក្តីរីករាយថា លោកស្រីពិតជាមិននឹកស្មានថា មានភ័ព្វសំណាងទទួលបានបណ្ណកម្មសិទ្ធិ ដូចប្រជាពលរដ្ឋទូទៅនោះទេ។ អ្វីដែលធ្វើឲ្យលោកស្រីរីករាយបំផុត គឺសម្ដេចប្រមុខរាជរដ្ឋាភិបាល បានយកចិត្តទុកដាក់ តាមរយៈរដ្ឋបាលរាជធានីភ្នំពេញគិតគូរដល់សុខទុក្ខ និងផ្ដល់ភាពកក់ក្តៅ ដល់អ្នករស់នៅសំណង់បុរីកីឡាទាំងអស់។

ក្នុងនាមប្រជាពលរដ្ឋម្នាក់ ដែលរស់នៅក្នុងសំណង់អគារបុរីកីឡា «សូមថ្លែងនូវអំណរអរគុណយ៉ាងជ្រាវជ្រៅបំផុត ចំពោះសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក ឃួង ស្រេង អភិបាល នៃគណៈអភិបាលរាជធានីភ្នំពេញ ដែលបានយកចិត្តទុកដាក់ ផ្ដល់ជូននូវបានកម្មសិទ្ធិដល់យើងខ្ញុំទាំងអស់គ្នានាពេលនេះ»។

ចំណែកលោក ហយ ហ៊ុន និងលោកស្រី លុក លន់ ចាន់ថាវរី បានថ្លែងនូវអំណរគុណដ៏ជ្រាលជ្រៅបំផុត ចំពោះសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលជានិច្ចជាការសម្ដេចតែងតែយកចិត្តទុកដាក់ គិតគូរជាពិសេសសម្រាប់ប្រជាពលរដ្ឋ ដែលមានជីវភាពខ្វះខាតក៏ដូចជាប្រជាពលរដ្ឋដែលងាយរងគ្រោះ ហើយថ្ងៃនេះរូបលោកនិងប្រជាពលរដ្ឋ ដែលរស់នៅទីនេះទាំងអស់បានប័ណ្ណកម្មសិទ្ធិផ្ទាល់ខ្លួន សម្រាប់គ្រប់គ្រងលើផ្ទះសម្បែងដោយភាពកក់ក្តៅបំផុត និងមានឱកាស បានយកប្លង់ផ្ទះទាំងនោះទៅប្រើប្រាស់ជាប្រយោជន៍សម្រាប់ការរស់នៅប្រចាំថ្ងៃ។

គួរបញ្ជាក់ថា តំបន់បុរីកីឡាមានអគារចំនួន ៨ មានប្រជាពលរដ្ឋចំនួនជាង ១២០០ គ្រួសារ ស្មើ ១,៣៩២ យូនីត ឬ ១,៣៩២ បន្ទប់៕

អត្ថបទ៖ ស្រីរ័ត្ន