ព័ត៌មានជាតិ

ផ្លូវក្រវាត់ក្រុងទី ៣ នឹងដាំដើមឈើកណ្តាលទ្រូងផ្លូវ ការពារចាំភ្នែកអ្នកដំណើរពេលយប់

បានផុស

២ ខែ មុន

នៅ

ថ្ងៃពុធ ១ មីនា ២០២៣

ដោយ

ផ្លូវក្រវាត់ក្រុងទី ៣ ដែលគ្រោងបញ្ចប់នៅអំឡុងខែឧសភានេះ នឹងមានការដាំដើមឈើបន្ថែមដើម្បីសម្រួលការបើកបរបញ្ច្រាសទិសគ្នានៅពេលយប់។

លោក ស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូនបានឲ្យដឹងថា ក្រោយផ្លូវក្រវាត់ក្រុងទី ៣ សាងសង់បញ្ចប់ដាក់ឲ្យប្រើប្រាស់ កំណាត់ផ្លូវវាងក្រុងប្រវែងជាង ៥០ គីឡូម៉ែត្រនេះ នឹងមានដាំដើមផ្កាឬដើមឈើបន្ថែមកណ្តាលទ្រូងផ្លូវ ដើម្បីសម្រួលការបើកបរពេលយប់ព្រលប់កុំឲ្យចាំភ្នែក ពេលបើកបរបញ្ច្រាសទិសគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្ថែមថា ពេលដាំដើមឈើនេះនឹងបែងបែងចែកកម្លាំងទទួលខុសត្រូវ ធ្វើឲ្យបានច្បាស់លាស់ រវាងមន្ទីរសាធារណការខេត្តកណ្តាល និងរាជធានីភ្នំពេញមិនឲ្យដូចករណីផ្លូវជាតិលេខ ៣ ដោយសារខ្វះការថែទាំ ខ្វះការទទួលខុសត្រូវបានងាប់អស់ ហើយដែលត្រូវប្រើប្រាស់ថវិកាដាំឡើងវិញ។

គួរបញ្ជាក់ថា ផ្លូវក្រវាត់ក្រុងទី ៣ មានប្រវែង ៥៣ គីឡូម៉ែត្រ ប្រើប្រាស់ថវិកាសាងសង់ជាង ២៧៣ លានដុល្លារអាមេរិក។ ជាផ្លូវយុទ្ធសាស្រ្តសម្រាប់រាជធានីភ្នំពេញ ដែលតភ្ជាប់ពីផ្លូវជាតិលេខ ៦ លេខ ៥ លេខ ៤ លេខ ៣ លេខ ២ រហូតដល់ផ្លូវជាតិលេខ ១ កាត់ភូមិសាស្រ្តរាជធានីភ្នំពេញ និងខេត្តកណ្តាល។

លោករដ្ឋមន្រ្តី ស៊ុន ចាន់ថុល អះអាងថា ផ្លូវក្រវាត់ក្រុងទី ៣ នៅមិនទាន់ក្លាយជាផ្លូវក្រវាត់ក្រុងពេញលេញទេ។ ដើម្បីក្លាយជាផ្លូវក្រវាត់ក្រុងពេញលេញ ត្រូវសាងសង់ស្ពានឆ្លងទន្លេមេគង្គពីរទៀតដែលរដ្ឋាភិបាលគ្រោងស្នើទៅមិត្តចិនដើម្បីតភ្ជាប់បង្កើតបណ្តាញផ្លូវដ៏មានសារសំខាន់នេះឲ្យក្លាយជាផ្លូវក្រវាត់ក្រុងពេញលេញ៕