សម្ដេចក្រឡាហោម សខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជំរុញដល់ក្រសួងយុត្តិធម៌ និងភាគីពាក់ព័ន្ធទាំងអស់ ត្រូវធ្វើការសម្របសម្រួលជាមួយស្ថាប័នតុលាការ ដើម្បីពន្លឿនការជំនុំជំរះក្តី ចំពោះបទល្មើសគ្រឿងញៀន ឱ្យបានឆាប់រហ័ស។

ទន្ទឹមនឹងនេះត្រូវបន្តពន្លាតដែនសមត្ថកិច្ចស្រាវជ្រាវ លើបទល្មើសគ្រឿងញៀនណាដែលសង្ស័យថា មានពាក់ព័ន្ធនឹង​ការសម្អាតប្រាក់ ដើម្បីធ្វើការដកហូតឱ្យបានទាន់ពេលវេលានូវទ្រព្យសម្បត្តិ ដែលបានមកពីផល នៃការប្រព្រឹត្តបទ​ល្មើស។

ថ្លែងនៅក្នុងពិធីបិទសន្និបាតបូកសរុបលទ្ធផលការងារត្រួតពិនិត្យគ្រឿងញៀន ឆ្នាំ ២០២២ និងលើកទិសដៅការងារ​ត្រួតពិនិត្យគ្រឿងញៀន ឆ្នាំ២០២៣ របស់អាជ្ញាធរជាតិប្រយុទ្ធប្រឆាំងគ្រឿងញៀនកាលពីរសៀលថ្ងៃទី២១ ខែមីនា ឆ្នាំ២០២៣ សម្ដេចក្រឡាហោម ស ខេង បានមានប្រសាសន៍ថា ការដកហូតបានទាន់ពេលវេលានូវទ្រព្យសម្បត្តិ ដែលបានមកពីផល នៃការប្រព្រឹត្តបទល្មើសគ្រឿងញៀន និងបង្ហាញពីឆន្ទៈ កិច្ចសហប្រតិបត្តិការ​របស់រាជរដ្ឋាភិបាល​កម្ពុជា ក្នុងការចូលរួមស៊ើបអង្កេតស្រាវជ្រាវប្រឆាំងការសម្អាតប្រាក់ ហិរញ្ញប្បទានភេវរកម្ម និងហិរញ្ញប្បទាន​គាំទ្រដល់ការរីកសាយភាយអាវុធមហាប្រល័យនៅក្នុងក្របខណ្ឌសកលលោក។

ជាមួយគ្នានេះ សម្ដេចក្រឡាហោម ក៏បានណែនាំ ដល់អាជ្ញាធរជាតិប្រយុទ្ធប្រឆាំងគ្រឿងញៀន ត្រូវសម្រប​សម្រួលជាមួយក្រសួង-សា្ថប័នជំនាញមានសមត្ថកិច្ចពាក់ព័ន្ធ ដើម្បីពន្លឿនការធ្វើវិសោធនកម្មច្បាប់ ស្ដីពីការ​ត្រួតពិនិត្យគ្រឿងញៀន និងរៀបចំតាក់តែងគោលនយោបាយ ឬលិខិតបទដ្ឋានគតិយុត្តិផ្សេងទៀត ដើម្បីបម្រើ​ដល់ការអនុវត្តសកម្មភាពប្រយុទ្ធប្រឆាំងគ្រឿងញៀននៅ ក្នុងប្រទេសកម្ពុជា ជាពិសេស ការរៀបចំច្បាប់​ថ្មីពាក់ព័ន្ធនឹងការគ្រប់គ្រងត្រួតពិនិត្យ ការប្រើប្រាស់សារធាតុគីមីផ្សំ សំដៅដល់ការទប់​ស្កាត់ការបង្វែរយក​ទៅផលិតគ្រឿងញៀនខុសច្បាប់ ឱ្យកាន់តែមានប្រសិទ្ធភាព។

សម្ដេចក្រឡាហោម ស ខេង ក៏បានស្នើដល់គ្រប់ក្រសួង-ស្ថាប័ន អង្គភាពជំនាញពាក់ព័ន្ធ ជាពិសេស ស្ថាប័ន-អង្គភាព ដែលមានមន្ត្រីបម្រើការងារនៅតាមខ្សែបន្ទាត់ព្រំដែន និងខេត្តជាប់ព្រំដែន ត្រូវបន្តយកចិត្តទុកដាក់ និងលើកកម្ពស់​កិច្ចសហប្រតិបត្តិការបង្ការ ទប់ស្កាត់ និងបង្ក្រាបការ ចរាចរ ការជួញដូរគ្រឿងញៀន និងសារធាតុគីមីផ្សំខុស​ច្បាប់ឆ្លងកាត់ព្រំដែនឱ្យមានប្រសិទ្ធភាពខ្ពស់។

គួរបញ្ជាក់ថា នៅក្នុងឆ្នាំ២០២២ លទ្ធផលនៃកិច្ចប្រតិបត្តិការបង្ក្រាបបទល្មើសគ្រឿងញៀនសរុបបង្ក្រាបបាន ៦,៣៩០ ករណី ស្មើនឹង ១០១.៣០%ប្រៀបធៀបនឹងឆ្នាំ ២០២១ (៦,៣០៨ករណី) មានចំនួនច្រើនជាង ៨២ករណីកើន​ឡើង១.៣០% ជនសង្ស័យសរុប ឃាត់ខ្លួន ១៥,០០២នាក់ ស្មើនឹង១០៧.៣២%ប្រៀបធៀបនឹងឆ្នាំ២០២១ មានចំនួន​ច្រើនជាង ១,០២៣នាក់ កើនឡើង ៧.៣២% ក្នុងនោះ មានជនសង្ស័យជាជនជាតិខ្មែរ ១៤,៦៨៣នាក់ (ស្រី៦៩១នាក់) និងជនបរទេស ៣១៩នាក់ (ស្រី៤៣នាក់) ស្មើនឹង១០ជនជាតិ៕

អត្ថបទ៖ សំអឿន