ព័ត៌មានជាតិ

រដ្ឋមន្ត្រីសុខាភិបាលណែនាំដល់អាជ្ញាធរត្រូវចុះពិនិត្យទីតាំងបិទស្រាសឲ្យបានហ្មត់ចត់នៅបុណ្យចូលឆ្នាំខាងមុខនេះ

បានផុស

១២ ខែ មុន

នៅ

ថ្ងៃសៅរ៍ ៨ មេសា ២០២៣

ដោយ

លោកសាស្ត្រាចារ្យ ម៉ម ប៊ុន ហេង រដ្ឋមន្ត្រីក្រសួងសុខាភិបាលបានណែនាំដល់អាជ្ញាធរត្រូវចាត់តាំងកម្លាំងចុះត្រួតពិនិត្យទីតាំងបិទស្រាស ឬ ផលិតស្រាស នៅក្នុងមូលដ្ឋានរបស់ខ្លួនឱ្យបានច្បាស់លាស់ដើម្បីចៀសវាងការពុលស្រាសនាំឱ្យគ្រោះថ្នាក់ដល់អាយុជីវិតនៅក្នុងឱកាសបុណ្យចូលឆ្នាំខ្មែរខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្ដីណែនាំក្រើនរំលឹក ស្ដីពីការការពារការចម្លងជំងឺកូវីដ១៩, ជំងឺផ្ដាសាយបក្សី និងការបង្ការការពុលចំណីអាហារ ឬពុលស្រាស ដែលរៀបចំមិនត្រឹមត្រូវ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរចុះថ្ងៃទី៨មេសានេះ លោករដ្ឋមន្ត្រីបានមានប្រសាសន៍ថា នៅក្នុងឱកាសបុណ្យចូលឆ្នាំខ្មែរខាងមុខនេះអាជ្ញាធរខេត្តស្រុកក្រុងខណ្ឌរដ្ឋបាលឃុំសង្កាត់ត្រូវចាត់តាំងកម្លាំងគ្រប់គ្រងឃ្លាំមើលនិងធ្វើការណែនាំវិធានការ៣ការពារនិង៣កុំនិងសុវត្ថិភាពចំណីអាហារពិសេសនៅមូលដ្ឋានរបស់ខ្លួនត្រូវចាត់ចែងការត្រួតពិនិត្យទីតាំងបិទស្រាស ឬ ផលិតស្រាសហើយអ្នករៀបចំឬអ្នកផលិតស្រាសត្រូវធានានូវការអនុវត្តតាមក្បួនបច្ចេកទេសត្រឹមត្រូវដោយមិនយកសារធាតុមេតាណុលមកលាយធ្វើជាស្រាសផ្តេសផ្តាសឡើយ។

លោករដ្ឋមន្ត្រីបានបន្តថា ហាមដាច់ខាតមិនត្រូវទិញ ឬ ផលិតឬបរិភោគស្រាសដែលមិនមានប្រភពផលិតច្បាស់លាស់ហើយមិនគោរពតាមបទដ្ឋានបច្ចេកទេសត្រឹមត្រូវឬយកសារធាតុមេតាណុលមកលាយធ្វើជាស្រាសដែលបង្កឱ្យមានការពុលរហូតដល់ស្លាប់បាត់បង់ជីវិតនិងត្រូវចៀសវាងការយកស្រាសឬស្រាផ្សេងទៅលាយជាមួយស្រាផ្សេងៗទៀតឬជាមួយភេសជ្ជៈណាមួយទៀតដែលយើងមិនអាចដឹងពីប្រតិកម្មរបស់វាដែលបង្កឲ្យពុលនឹងអាចមានគ្រោះថ្នាក់ដល់អាយុជីវិតផងដែរ។

លោករដ្ឋមន្ត្រីបានណែនាំទៀតថា លើសពីនេះទៀតត្រូវជៀសវាងការប្រើប្រាស់គ្រឿងស្រវឹងនៅពេលបើកបរនិងចូលរួមរក្សាសុវត្ថិភាពចរាចរណ៍ចៀសវាងគ្រោះថ្នាក់ចរាចរណ៍ដោយកុំបើកលឿនពេកត្រូវពាក់ខ្សែក្រវាត់ ឬ ពាក់មួកសុវត្ថិភាពនិងគោរពច្បាប់ចរាចរណ៍និងជៀសវាងការប្រើប្រាស់គ្រឿងញៀនបំផ្លាញសុខភាពនិងអនាគតរបស់ខ្លួន។

គួរបញ្ជាក់ថា ពិធីបុណ្យចូលឆ្នាំថ្មីប្រពៃណីជាតិនៅឆ្នាំនេះនឹងប្រព្រឹត្តិទៅរយៈពេល៣ថ្ងៃគឺចាប់ពីថ្ងៃទី១៤-១៥និង១៦ខែមេសា ឆ្នាំ២០២៣ខាងមុខនេះ៕

ដោយ ៖ សំអឿន