រដ្ឋាភិបាលកំពុង​សិក្សាបិទការនាំចូលរថយន្តចាស់ៗ

រដ្ឋាភិបាលកម្ពុជាកំពុងសិក្សាលទ្ធភាពបញ្ឈប់ការនាំចូលរថយន្តចាស់ៗ ដោយកំណត់អាយុកាល និងឆ្នាំផលិត ដើម្បីសុវត្ថិភាព និងការពារបរិស្ថាន។

លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ប្រាប់អ្នកសារព័ត៌មាននៅថ្ងៃទី ២១ ខែមេសា ឆ្នាំ ២០២៣នេះថា ក្រសួងសាធារណការ កំពុងពិភាក្សាជាមួយក្រសួងបរិស្ថាន និងក្រសួងសេដ្ឋកិច្ចដើម្បីបញ្ចប់ការនាំចូលរថយន្តចាស់ៗ។

លោក ស៊ុន ចាន់ថុលថ្លែងថា «យើងបានពិភាក្សាគ្នាជាមួយក្រសួងបរិស្ថាន ក្រសួងសេដ្ឋកិច្ច និងហិរញ្ញវត្ថុ ​នឹងរៀបចំពិនិត្យមើលថាតើ ​ឡានមួយទឹក អាយុប៉ុន្មាន​ ចាស់ជាងហ្នឹងយើង​មិនអនុញ្ញាតឱ្យចូលទេ ឥឡូវកំពុងពិភ្សាគ្នា​ថាតើ ១០ ឆ្នាំ ឬ១៥ ឆ្នាំ ឬ ៧ ឆ្នាំ»។

បើតាមលោករដ្ឋមន្ត្រីរដ្ឋាភិបាលកំពុងតែជំរុញឱ្យប្រើប្រាស់រថយន្តដើរដោយថាមពលអគ្គិសនី ដែលថ្មីហើយធូរថ្លៃជាងរថយន្តមួយទឹក ខណៈរថយន្តប្រភេទនេះមានកំណើនច្រើន ហើយក្រសួងកំពុងឱ្យអ្នកវិនិយោគដាក់កន្លែងបញ្ចូលថាមពលអគ្គិសនីឱ្យបានច្រើន៕

អត្ថបទ៖ ឡេង ដេត