កាលពីព្រឹកថ្ងៃទី ១ ខែឧសភា ឆ្នាំ ២០២៣នេះ ព្រះអគ្គិជ័យកីឡា សម្រាប់ព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ បានដង្ហែចូលដល់ខេត្តបាត់ដំបងហើយ ដោយមានវត្តមានថ្នាក់ដឹកនាំ មន្ត្រីរាជការ និងក្រុមកីឡាជិះកង់យ៉ាងច្រើន ចូលរួម។

នៅក្នុងពិធីនោះដែរ គេសង្កេតឃើញថា នៅតាមដងផ្លូវមានប្រជាពលរដ្ឋ លោកគ្រូ-អ្នកគ្រូ សិស្សានុ-សិស្សយ៉ាងច្រើនកុះករឈរកាន់ទង់ជាតិនៅសងខាងផ្លូវ រង់ចាំទទួលស្វាគមន៍ដល់ក្បួនដង្ហែយ៉ាងរីករាយជាទីបំផុត។

នៅក្នុងព្រឹត្តិការណ៍ជាប្រវត្តិសាស្រ្ដនេះ គឺព្រះអគ្គិជ័យកីឡា បានដង្ហែចូលដល់មុខរូបសំណាកលោកតាដំបងគ្រញូង ដោយបានរៀបចំធ្វើកិច្ច រួចក៏បានដង្ហែចូលតាមផ្លូវលេខ ១ និងផ្លូវលេខ ៣ ក្នុងក្រុងបាត់ដំបង ដោយមានមន្ត្រីរាជការ សិស្ស និស្សិត និងប្រជាពលរដ្ឋចូលរួមដង្ហែរាប់ពាន់នាក់ ដើម្បីយកព្រះអគ្គិជ័យកីឡា ទៅតម្កល់ទុកនៅក្នុងទីអារាម វត្តពោធិវាល ក្នុងភូមិរំចេក ៤ សង្កាត់រតន: ក្រុងបាត់ដំបង តាមប្រពៃណីព្រះពុទ្ធសាសនា។

សូមជម្រាបថា តាមគម្រោង ព្រះអគ្គិជ័យកីឡា នឹងត្រូវដង្ហែចេញពីក្រុងបាត់ដំបង ឆ្លងកាត់ស្រុកថ្មគោល ឆ្ពោះទៅកាន់ខេត្តបន្ទាយមានជ័យ នៅព្រឹកថ្ងៃទី ២ ខែឧសភា ឆ្នាំ ២០២៣៕

អត្ថបទ៖ សោ និយមរ័ត្ន