អ្នកនាំពាក្យ៖ កម្ពុជាប្តេជ្ញាអនុវត្តលទ្ធិប្រជាធិបតេយ្យ​សេរីពហុបក្ស

លោក អាន សុខឿន អ្នកនាំពាក្យក្រសួងការបរទេសកម្ពុជា បានអះអាងថា កម្ពុជាប្តេជ្ញាចិត្តឥតងាករេ​ចំពោះការអនុវត្តលទ្ធិប្រជាធិបតេយ្យសេរីពហុបក្ស។ លោកអះអាងបែបនេះក្រោយមានការលើកឡើងថា គណបក្សភ្លើងទៀន ត្រូវបានរារាំងចូលរួមក្នុងការបោះឆ្នោតជាតិ នៅខែកក្កដាខាងមុខ។  

បើតាមសេចក្ដីថ្លែងការណ៍ កាលពីថ្ងៃទី២៧ ខែឧសភា ឆ្នាំ២០២៣ លោក អាន សុខឿន បានធ្វើការកត់សម្គាល់អំពីការបញ្ចេញមតិយោបល់ជាច្រើនជុំវិញបរិយាកាសនយោបាយរបស់កម្ពុជាក្នុងកិច្ចដំណើរការឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ នៅខែកក្កដាខាងមុខ។

អាស្រ័យដោយមានការអធិប្បាយមួយចំនួនបានបង្កឲ្យមានការភាន់ច្រលំ ធ្វើឡើងដោយគ្មានមូលដ្ឋានការពិត និងមានលក្ខណៈលំអៀងក្រោមហេតុផលនយោបាយ លោក អាន សុខឿន បានបកស្រាយ និងបំភ្លឺយ៉ាងដូច្នេះថា៖«ការលើកឡើងថា គណបក្សភ្លើងទៀនត្រូវបានរារាំងមិនអោយចូលរួមក្នុងការបោះឆ្នោតជាតិ នាខែកក្កដា គឺមិនត្រឹមត្រូវឡើយ»។ លោកថា គណបក្សនេះមិនគោរពឲ្យបានហ្មត់ចត់តាមច្បាប់បោះឆ្នោត ទោះបីជាមានសេចក្តីជូនដំណឹង និងការណែនាំជាច្រើនលើកច្រើនសាររបស់អាជ្ញាធរមានសមត្ថកិច្ចយ៉ាងណាក៏ដោយ។ លោកបន្ថែមថា ការខកខានមិនអនុវត្តតាមដំណើរការចុះបញ្ជីគណបក្សឈរឈ្មោះបោះឆ្នោតនេះ គឺជាការទទួលខុសត្រូវរបស់គណបក្សនេះខ្លួនឯង ក្នុងនាមជាគណបក្សដែលបានដាក់ពាក្យស្នើសុំ។

អ្នកនាំពាក្យរូបនេះ បានពន្យល់ថា គណៈកម្មាធិការជាតិរៀបចំការបោះឆ្នោតទទួលខុសត្រូវក្នុងការអនុវត្តដំណើរការបោះ ឆ្នោត ដោយប្រើប្រាស់ស្តង់ដារតែមួយ និងផ្អែកលើមូលដ្ឋាននៃគោលការណ៍យុត្តិធម៌ សមភាព និងនីតិវិធីត្រឹមត្រូវ ដូចដែលស្ថាប័នគ្រប់គ្រងការបោះឆ្នោតនៅក្នុងបណ្ដាប្រទេសដទៃផ្សេងទៀតអនុវត្តដោយគោរពតាមនីតិរដ្ឋ។ ប្រសិនបើគណបក្សនយោបាយ១៨ផ្សេងទៀតគោរពតាមដំណើរការចុះបញ្ជីគណបក្សឈរឈ្មោះបោះឆ្នោត នោះគណបក្សដែល មិនគោរពច្បាប់ មិនគួរទទួលបានបុព្វសិទ្ធិពិសេសឡើយ ដើម្បីភាពយុត្តិធម៌​សម្រាប់គ្រប់គណបក្សទាំងអស់។ លោក ថា ការអនុញ្ញាតឲ្យមានបុព្វសិទ្ធិពិសេសណាមួយ​នឹងត្រូវចាត់ទុកថា ជាការអនុវត្តស្តង់ដារពីរ។ ប៉ុន្តែ គណបក្សមហាសាមគ្គីជាតិខ្មែរ ដែលជាគណបក្សនយោបាយមួយទៀត មិនបានបំពេញកាតព្វកិច្ចដាក់ឯកសារគ្រប់គ្រាន់ ក៏បានប្រកាសទទួលយកដោយសុឆន្ទៈ​នូវសេចក្តីសម្រេច​របស់អាជ្ញាធរពាក់ព័ន្ធ។

លោក អាន សុខឿន បានអះអាងថា កម្ពុជាប្តេជ្ញាចិត្តឥតងាករេចំពោះការអនុវត្តលទ្ធិប្រជាធិបតេយ្យសេរីពហុបក្ស។ ត្រង់ន័យនេះ លោក បានលើកឡើងថា ល្គឹកណា គ្រប់គណបក្សនយោបាយទាំងអស់​អនុវត្តសិទ្ធិក្នុង​រង្វង់ដែន​កំណត់នៃច្បាប់ នោះទើបបរិយាកាសអំណោយផលដល់ការបោះឆ្នោតអាចធានាបាន មិនមែនសិទ្ធិទាំង​អស់មាន​លក្ខណៈដាច់ខាតឡើយ។  លោក សង្កត់ធ្ងន់ថា ឧក្រិដ្ឋកម្មមួយមិនអាចធ្វើយុត្តិកម្មថា ជាការតស៊ូផ្នែកសីលធម៌ ដើម្បីការពារលទ្ធិប្រជាធិបតេយ្យ និងសិទ្ធិមនុស្សនោះទេ ហើយការអវត្តមាន​គណបក្សចំនួនពីរនេះពីដំណើរការបោះឆ្នោត គឺដោយសារតែការមិនគោរពតាមច្បាប់ និងមិនធ្វើឲ្យប៉ះពាល់​ដល់ភាពសេរីនិយម ពហុនិយម និងលទ្ធិប្រជាធិបតេយ្យរបស់កម្ពុជាឡើយ។

បន្ថែមពីនេះ ចំពោះវត្តមានរបស់អ្នកសង្កេតការបោះឆ្នោតវិញ កម្ពុជាសូមស្វាគមន៍គ្រប់ភាគីពាក់ព័ន្ធទាំងអស់​ដែលមានចំណាប់អារម្មណ៍ ដើម្បីអញ្ជើញមកចូលរួមធ្វើជាសាក្សីដោយផ្ទាល់នៅក្នុងដំណើរការបោះឆ្នោត។ ជារដ្ឋអធិបតេយ្យមួយ សំឡេងឆ្នោតរបស់ប្រជាពលរដ្ឋកម្ពុជា ត្រូវតែគោរពតាម ហើយសេចក្ដីអញ្ជើញជា​ចំហនេះបង្ហាញឲ្យឃើញអំពីសុច្ឆន្ទៈ និងភាពបើកចំហរបស់កម្ពុជាចំពោះពិភពលោកខាងក្រៅ៕