សម្ដេចតេជោ ហ៊ុន សែន បញ្ចេញសារសំឡេងក្រុមប្រឆាំងនៅក្រៅប្រទេស ពាក់ព័ន្ធនឹងយុទ្ធនាការតាមហ្វេសប៊ុក

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ចេញសារសំឡេងរបស់ក្រុមប្រឆាំងនៅក្រៅប្រទេស ពាក់ព័ន្ធនឹងយុទ្ធនាការតាមបណ្ដាញសង្គមហ្វេសប៊ុក ដែលមានបំណងវាយប្រហារដោ​យពាក្យសម្ដីមកលើសម្ដេច និងគណៈ កម្មាធិការជាតិរៀបចំការបោះឆ្នោត (គ.ជ.ប)។

សម្ដេចតេជោ ហ៊ុន សែន បានសរសេរនៅលើបណ្ដាញសង្គមតេលេក្រាម នៅព្រឹកថ្ងៃទី ៣១ ខែឧសភានេះថា សម្ដេចចង់ឲ្យបងប្អូនជនរួមជាតិ បានស្តាប់នូវការណែនាំរបស់ពួកក្បត់ជាតិនៅក្រៅប្រទេស ក្នុងយុទ្ធនាការតាមហ្វេសប៊ុក ដែលមានបំណងវាយប្រហារសំដៅមកលើសម្ដេច និងគណៈកម្មាធិការជាតិរៀបចំការបោះឆ្នោត។

សម្ដេចតេជោ ហ៊ុន សែន បានសរសេរបន្តថា ល្បិចបំបែកបំបាក់ និងភាពពិសពុលរបស់ក្រុមប្រឆាំងនៅក្រៅប្រទេសនេះ នឹងបង្កើតបាននូវផលអាក្រក់សម្រាប់ក្រុមរបស់ពួគេ នៅក្នុងប្រទេស។

«នេះជាផែនការរបស់អាក្បត់ជាតិ ៣ជំនាន់ ដែលម៉ាឡេស៊ីទើបបណ្តេញចេញពីប្រទេសមុននេះបន្តិច។ផ្តាំទៅឆានីថា សម្តេច ស ខេង ជាឧបនាយករដ្ឋមន្ត្រី។ លិខិតបញ្ជាក់នោះ ត្រូវបានសុំយោបល់ខ្ញុំជានាយករដ្ឋមន្ត្រី ហើយនេះជាសមត្ថកិច្ចរដ្ឋមន្ត្រីក្រសួងមហាផ្ទៃ។ ឯការទទួលស្គាល់ ឬមិនទទួលស្គាល់វាជារឿងរបស់ គ.ជ.ប»។ នេះជាការសរសេរបញ្ជាក់ និងលើកឡើងរបស់សម្ដេចតេជោ ហ៊ុន សែន។

បើតាមសម្ដេចតេជោ ហ៊ុន សែន លើកឡើងទៀតថា «បើពួកអស់លោកល្ងង់ និងគិតតែបោកប្រាស់មួលបង្កាច់បែបនេះ តើពេលណាទើបមានសេចក្តីសុខ»៕