ព័ត៌មានជាតិ
ប្រធានមន្ទីរឧស្សាហកម្ម ៖ ការប្រមូលផលអំបិលកំពត-កែប ទទួលបានជាង ៧ម៉ឺនតោន
ចុងរដូវនៃការប្រមូលផលអំបិលកំពត-កែប ទទួលបានទិន្នផលប្រមាណជាង ៧ម៉ឺនតោន ដោយអំបិលនៅក្នុងស្តុកនៅសល់ជាង ២ម៉ឺនតោន ខណៈដែលទិន្នន័យនៃការចែកចាយនៅទូទាំងប្រទេស បាននិងកំពុងស្រង់ស្ថិតិបន្ថែម, ទោះយ៉ាងណាមានការប៉ាន់ស្មានថាបានចែកចាយអស់ជាង ៥ម៉ឺនតោន។ នេះជាការបញ្ជាក់របស់លោក សុខ គឹមជឿន ប្រធានមន្ទីរឧស្សាហកម្មវិទ្យាសាស្រ្តបច្ចេកវិទ្យា និងនវានុវត្តន៍ខេត្តកំពត។
ថ្លែងប្រាប់កម្ពុជាថ្មី លោក សុខ គឹមជឿន បានសន្និដ្ឋានថា គិតមកដល់ពេលនេះ ការប្រមូលផលបានជាង ៧ម៉ឺនតោនហើយ នៅសេសសល់មួយចំនួនទៀត ដោយប្រជាកសិករកំពុងប្រញាប់ប្រមូលប្រណាំងនឹងអាកាសធាតុ។ បើតាមលោក គឹមជឿន ការផ្គត់ផ្គង់អំបិលនៅឆ្នាំ ២០២៣នេះ អាចនឹងគ្រប់គ្រាន់ ឬសល់ថែមទៀតផង ខណៈកម្ពុជា មានតម្រូវការអំបិលប្រមាណ ១០ម៉ឺនតោន ក្នុងមួយឆ្នាំ។
លោកបន្តដូច្នេះថា «ឥឡូវមិនទាន់ចប់រដូវផលិត១០០ភាគរយទេ អាចបន្តនៅមើលអាកាសធាតុបន្តិច ប៉ុន្តែកន្លែងខ្លះក៏កំពុងបញ្ចូលទឹកដើម្បីដាក់ផលិតបន្តទៀត, យើងអាចនិយាយបានថាការផ្គត់ផ្គង់គ្រប់គ្រាន់មិនបាច់នាំចូលមកទៀតទេ ហើយអំបិលនាំចូលកន្លងមក ក៏នៅសល់ប្រហែល ១ម៉ឺនតោនក្នុងស្តុកដែរ»។
ដូចគ្នានេះដែរ លោក ប៊ុន ណារិន ប្រធានសមាគមផលិតទំនិញសម្គាល់ភូមិសាស្រ្តអំបិលកំពត-កែប បានឱ្យដឹងថា នៅពេលនេះ បានផុតរដូវការធ្វើប្រហុកផ្អកហើយ ដូច្នេះតម្រូវការអំបិលក៏មានការថមថយបន្តិច ដោយលោកជឿជាក់ថា អំបិលអាចនឹងផ្គត់ផ្គង់គ្រប់តម្រូវការនៅឆ្នាំនេះ។
ប្រធានសមាគមរូបនេះ បានឱ្យដឹងទៀតថា នៅក្នុងរដូវប្រមូលផលនេះ អំបិលធម្មតា មានតម្លៃចន្លោះពី ២៥ ០០០ ទៅ ៣ម៉ឺនរៀល ក្នុងមួយបាវ(៥០គីឡូ)។ ដោយឡែកសម្រាប់អំបិល GI មានតម្លៃចន្លោះពី ៤ម៉ឺន ទៅ ៥ម៉ឺនរៀល ក្នុងមួយបាវ។ លោក ប៊ុន ណារិន បញ្ជាក់ថា ស្របពេលដែលទីផ្សារអំបិលមានស្ថានភាពល្អប្រសើរ ពលរដ្ឋដែលធ្លាប់បោះបង់មុខរបរនេះ ក៏ចាប់ផ្តើមងាកមកចាប់អាជីពនេះវិញជាបណ្តើរៗផងដែរ។
បើតាមលោក សុខ គឹមជឿន ប្រធានមន្ទីរឧស្សាហកម្មវិទ្យាសាស្រ្តបច្ចេកវិទ្យា និងនវានុវត្តន៍ខេត្តកំពត បានលើកឡើងថា បច្ចុប្បន្ននេះ កម្ពុជា មានផ្ទៃដីផលិតអំបិលនៅខេត្តកំពតប្រមាណជិត ៣ ៦០០ ហិចតា ខេត្តកែបមានប្រហែល ១ពាន់ហិចតា និងខេត្តកោះកុងជាង ១០ហិចតា ដោយក្នុងនោះមានអ្នកផលិតចំនួនជាង ១៧០ក្រុម៕
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៩ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង