អ្នកជំនាញថា ការលាងឈាម មិនមែនជាដំណាក់កាលចុងក្រោយនៃជីវិតទេ

ការលាងឈាម គ្រាន់តែជាការផ្តល់វិធីសាស្ត្រថ្មីមួយ ក្នុងការបញ្ចុះជាតិពុលចេញពីរាងកាយអ្នកជំងឺ ដើម្បីស្តារសុខភាពអ្នកជំងឺមកវិញប៉ុណ្ណោះ។ បើសិនជាគេចវេសពីការលាងឈាម មិនទទួលការព្យាបាលនេះ នឹងធ្វើឲ្យស្ថានភាពសុខភាពកាន់តែគ្រោះថ្នាក់។
នេះជាបើតាមការលើក​ឡើង​របស់លោកវេជ្ជបណ្ឌិត នីវ រត្នវីរៈ ឯកទេសផ្នែកតម្រងនោម និងលាងឈាម បម្រើការនៅ​មន្ទីរពេទ្យកាល់ម៉ែត ក្នុងបទសម្ភាសជាមួយកម្ពុជាថ្មី។

លោកវេជ្ជបណ្ឌិតមានប្រសាសន៍ឲ្យដឹងថា ការលាងឈាម គឺអនុវត្តការព្យាបាលនេះ ទៅលើអ្នកដែលមានបញ្ហាតម្រងនោមរុំារៃ ជំងឺទឹកនោមប្រៃ ជំងឺទឹកនោមផ្អែម ឬលើសសម្ពាធឈាម​ជាដើម និងស្ថានភាពសង្គ្រោះបន្ទាន់ប៉ុណ្ណោះ។​ ​លោកថា ដោយសារតែតម្រងនោមរបស់អ្នកជំងឺទាំងនេះ ខ្សោយខ្លាំងឬខូចខាតតែម្តង ជាហេតុតម្រូវឲ្យមានការលាង​ឈាម​ជាប្រចាំ​និង​ទៀតទាត់។

វេជ្ជបណ្ឌិតឯកទេសរូបនេះ ពន្យល់ថា ក្នុងស្ថានភាពដែលអ្នកជំងឺកំពុងសង្គ្រោះបន្ទាន់ តម្រងនោមអាចនឹងកើតមាន បញ្ហាគាំង ឬតម្រងនោម​ផ្អាកដំណើរការមួយរយៈ ដូចនេះការជួយដោយវិធីលាងឈាមនេះ នឹងធ្វើឡើងត្រឹមតែក្នុងស្ថានភាពពេលខ្លីមួយប៉ុណ្ណោះ ពោលគឺធ្វើការលាងឈាមរហូតដល់ស្ថានភាពតម្រងនោមអ្នកជំងឺ ត្រឡប់មកជាប្រក្រតីវិញ។

តាមការគូសបញ្ជាក់ ជាទូទៅអ្នកជំងឺដែលត្រូវព្យាបាលដល់ដំណាក់កាលនេះ បើតាមបច្ចេកទេស គឺត្រូវលាងឈាម ២-៣ដង​ ក្នុង១សប្តាហ៍ជាទៀងទាត់។ លោកវេជ្ជបណ្ឌិតថា “ចំពោះការលាងឈាម ក្នុង១ដង គឺត្រូវប្រើពេល ៤ម៉ោង”​។

បើតាមការណែនាំ សម្រាប់អ្នកដែលមានជំងឺត្រូវលាងឈាមនោះទៀតសោត គឺតម្រូវឲ្យតមទទួលទានប្រៃ និងត្រូវប្រយ័ត្នខ្ពស់ចំពោះអាហារដែលមានសារជាតិបូតាស្យូម ដែលសារជាតិទាំងនេះ ភាគច្រើនគឺសម្បូរ នៅក្នុងបន្លែផ្លែឈើ ពិសេស ចេក និងទឹកដូង។ លោកវេជ្ជបណ្ឌិតថា “បើកាលណាអ្នកជំងឺទទួលទានសារ ជាតិបូតាស្យូមនេះច្រើន នឹងបង្កឲ្យគ្រោះថ្នាក់ធ្ងន់ធ្ងរ”។

លោកវេជ្ជ​បណ្ឌិតលើកទឹកចិត្តដល់អ្នកជំងឺ ដែលដល់ដំណាក់នៃការព្យាបាលដោយការលាងឈាម គប្បីកុំយល់ថា ការលាងឈាម ជាដំណាក់កាលចុងក្រោយ គ្មានសង្ឃឹម ហើយគេចវេសពីការព្យាបាលអី ព្រោះវានឹងធ្វើឲ្យស្ថានភាពជំងឺកាន់តែធ្ងន់ធ្ងរ៕