រដ្ឋបាលខេត្តកែបកំណត់ទីតាំងមួយចំនួន ហាម​ប្រើប្រាស់ក្នុងការឃោសនាបោះឆ្នោត

បើយោងតាមសេចក្តីជូនដំណឹងរបស់រដ្ឋបាលខេត្តកែប កាលពីថ្ងៃទី១២ ខែមិថុន ឆ្នាំ២០២៣ម្សិលមិញ បាន​ប្រកាស​ជូនដំណឹងដល់អាជ្ញាធរដែនដីគ្រប់លំដាប់ថ្នាក់ គណបក្សនយោបាយ និងគ្រប់ភាគីពាក់ព័ន្ធទាំងអស់ពីការ​កំណត់ទីតាំងសាធារណៈ​មិនអនុញ្ញាតឱ្យប្រើប្រាស់ សម្រាប់ការឃោសនាបោះឆ្នោតជ្រើសតាំងតំណាងរាស្ត្រនីតិកាលទី ៧ ឆ្នាំ​២០២៣ ចាប់ពីថ្ងៃទី ១ ដល់ថ្ងៃទី ២១ ខែកក្កដា ឆ្នាំ២០២៣។

ទីតាំងសាធារណៈទាំងនោះមាន៖

-អគាររដ្ឋ មន្ទីរពេទ្យ វត្តអារាម សាលារៀន ឬគ្រឹះស្ថានសិក្សា
-សួនច្បារសម្តេចតេជោ ហ៊ុន សែន (វិមានឯករាជ្យខេត្ត)
-តំបន់រមណីយដ្ឋាន (ឆ្នេរលេងទឹក, ផ្សារក្ដាម, ជ្រោយដូង)
-រង្វង់មូលរូបសំណាកសេះស
-កំណាត់ផ្លូវលេខ៣៣ ចំណុចភូមិអូរក្រសារ សង្កាត់អូរក្រសារ (ប៉ុន្តែអាចធ្វើដំណើរឆ្លងកាត់បាន)
-រង្វង់មូលរូបសំណាករែកអំបិល កំណាត់ផ្លូវលេខ៣៣A ចំណុចភូមិភ្នំលាវ ឃុំពងទឹក (ប៉ុន្តែអាចធ្វើដំណើរឆ្លងកាត់បាន)
-ទីតាំងផ្សារកែប ផ្សារដំណាក់ចង្អើរ និងផ្សារសេះស។

គួរបញ្ជាក់ដែរថា នៅខេត្តកែបមាន១០គណបក្សនយោបាយ ដែលបានដាក់ពាក្យឈរឈ្មោះចូលរួមបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ នៅក្នុងខេត្តកែបដែលដំណើរការបោះឆ្នោតនឹងប្រព្រឹត្តិទៅនាថ្ងៃទី ២៣ ខែកក្កដា ឆ្នាំ២០២៣ខាងមុននេះ។

អត្ថបទ៖ សឹង រ៉ាត់