ឯកឧត្ដម ហ៊ុន ម៉ាណែត ៖ សច្ចធម៌ប្រវត្តិសាស្រ្ដបញ្ជាក់​ថា មានតែបក្សប្រជាជនកម្ពុជាទេ ដែលមានសមត្ថភាព និងលទ្ធភាពដឹកនាំកម្ពុជា

ឯកឧត្ដមបណ្ឌិត ហ៊ុន ម៉ាណែត បេក្ខជនតំណាងរាស្រ្ដពេញសិទ្ធិលេខរៀងទី ១ មណ្ឌលរាជធានីភ្នំពេញរបស់គណបក្សប្រជាជនកម្ពុជា បានលើកឡើងថា សច្ចធម៌ប្រវត្តិសាស្រ្ដ បានបញ្ជាក់​ថា មានតែគណបក្សប្រជាជនកម្ពុជាទេ ដែលមានសមត្ថភាព និងលទ្ធភាពក្នុងការដឹកនាំកម្ពុជា។

ការលើកឡើងនេះ គ្រាដែលឯកឧត្ដមបណ្ឌិត ហ៊ុន ម៉ាណែត នៅព្រឹកថ្ងៃទី ២១ ខែកក្កដា ឆ្នាំ ២០២៣នេះ បានដឹកនាំការជួបជុំសមាជិក-សមាជិកា ដើម្បីដង្ហែក្បួនបិទយុទ្ធនាការឃោសនាបោះឆ្នោតជ្រើសតាំង តំណាងរាស្ត្រ នីតិកាលទី ៧ នៅរាជធានីភ្នំពេញ។

ឯកឧត្ដមបណ្ឌិត ហ៊ុន ម៉ាណែត មានប្រសាសន៍ថា នៅក្នុងរយៈពេលជាង ៤៤ឆ្នាំកន្លងមកនេះ គណបក្សប្រជាជនកម្ពុជា បានរួមសុខទុក្ខជាមួយប្រជាជនកម្ពុជានៅគ្រប់កាលៈទេសៈ និងបានដឹកនាំប្រទេសជាតិ ឆ្លងកាត់ការលំបាកគ្រប់បែបយ៉ាង តាំងពីដំណាក់កាលនៃការរំដោះជាតិ មាតុភូមិ របបប្រល័យពូជសាសន៍ ប៉ុល ពត និងដំណាក់កាលនៃការស្ដារកសាង និងការពារជាតិ រហូតមកដល់ដំណាក់កាលនៃការបង្រួបបង្រួមជាតិ ការកសាងសុខសន្តិភាព ការអភិវឌ្ឍជាតិ ឲ្យបានរីកចម្រើនលើគ្រប់វិស័យដូចសព្វថ្ងៃ។

ឯកឧត្ដមបណ្ឌិត ហ៊ុន ម៉ាណែត បានមានប្រសាសន៍បន្តថា «សច្ចធម៌នៃប្រវត្តិសាស្រ្ដកម្ពុជានេះ បានបញ្ជាក់​ថា មានតែគណបក្សប្រជាជនកម្ពុជាទេ ដែលមានសមត្ថភាព និងលទ្ធភាព ក្នុងការដឹកនាំកម្ពុជា ឆ្ពោះទៅត្រើយសុភមង្គលរបស់ប្រជាជនទូទាំងប្រទេស ដូចនេះការបោះឆ្នោតជូនគណបក្សប្រជាជនកម្ពុជា គឺពិតជាបានបោះឆ្នោតឲ្យខ្លួនឯងយ៉ាងពិតប្រាកដ»។

ឯកឧត្ដមបណ្ឌិត ហ៊ុន ម៉ាណែត លើកឡើងដែរថា នៅរៀងរាល់អាណត្តិ ៥ឆ្នាំម្ដង គណបក្សប្រជាជនកម្ពុជា តែងតែដាក់ចេញនូវគោលនយោបាយ និងយុទ្ធសាស្រ្ដអភិវឌ្ឍន៍សង្គម សេដ្ឋកិច្ច ដែលមានភាពប្រាកដនិយម ច្បាស់លាស់ ជាក់លាក់ ឆ្លើយតបទៅនឹងស្ថានភាព និងតម្រូវការជាក់ស្ដែងរបស់ប្រជាជនកម្ពុជា ដោយផ្ដើមចេញពីយុទ្ធសាស្រ្ដត្រីកោណ និងយុទ្ធសាស្រ្ដចតុកោណទាំង ៤ដំណាក់កាល។

ឯកឧត្ដមបណ្ឌិត ហ៊ុន ម៉ាណែត លើកឡើងទៀតថា រាជរដ្ឋាភិបាល ដឹកនាំដោយគណបក្សប្រជាជនកម្ពុជា បានសម្រេចនូវសមិទ្ធផល​មហាធំធេងរាប់មិនអស់មកហើយ សម្រាប់ជាតិ និងប្រជាជនកម្ពុជា ហើយនៅពេលនេះ កម្ពុជា បានឈានដល់ដំណាក់កាលថ្មីមួយទៀត ដែលនឹងលើកស្ទួយមោទនភាពជាតិ ឲ្យកាន់តែខ្ពស់ឡើងដូចសម័យអង្គរ តាមរយៈការបន្តការកសាងអភិវឌ្ឍន៍ជាតិឲ្យបានរឹងមាំ រស់រវើក រុងរឿង ប្រកបដោយវិបុលភាព និងជាប្រទេសមានចំណូលខ្ពស់នៅឆ្នាំ ២០៥០។

ឯកឧត្ដមបណ្ឌិត ហ៊ុន ម៉ាណែត បានបញ្ជាក់ថា «ដូច្នេះ គណបក្សប្រជាជនកម្ពុជា ពិតជាត្រូវការចាំបាច់នូវការគាំទ្រពីសមាជិក-សមាជិកាគណបក្ស និងប្រជាជនពីគ្រប់មជ្ឈដ្ឋាន សម្រាប់ការសម្រេចបាននូវមហិច្ឆតានេះ ក្នុងន័យនេះបើសិនជាគណបក្សប្រជាជនកម្ពុជា ទទួលបានជោគជ័យក្នុងការបោះឆ្នោត យុទ្ធសាស្រ្ដបញ្ចកោណ ដំណាក់កាលទី ១ នឹងក្លាយជាកម្មវិធីនយោបាយរបស់រាជរដ្ឋាភិបាល នីតិកាលទី ៧ នៃរដ្ឋសភា ២០២៥-២០២៨ ហើយយើងនឹងសម្រេចបានជាមួយគ្នានូវចក្ខុវិស័យ កម្ពុជាឆ្នាំ ២០៥០នេះ យ៉ាងពិតប្រាកដ»៕