តើហេតុអ្វីបានជារបបយោធាភូមាលើកលែងទោសខ្លះដល់លោកស្រី អង់សាន ស៊ូជី?

កាលពីពេលថ្មីៗនេះ របបយោធាមីយ៉ាន់ម៉ា បានប្រកាសដោះលែងអ្នកទោសជាច្រើន ដែលមានជាង៧ពាន់នាក់ ហើយក្នុងនោះ ក៏មានអតីតមេដឹកនាំជាប់ឆ្នោតតាមបែបលទ្ធិប្រជាធិបតេយ្យ គឺលោក​ស្រី អ៊ុងសាន ស៊ូជី និងអតីតប្រធានាធិបតីនៃប្រទេសមីយ៉ាន់ម៉ាផងដែរ។

លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា បានវិភាគប្រាប់«កម្ពុជាថ្មី»ថា ការដោះលែងអ្នកទោសរបស់របបយោធាមីយ៉ាន់ម៉ា គ្រាន់តែធ្វើទៅតាមទម្លាប់របស់ប្រទេសនៅពេលមានបុណ្យជាតិធំៗ និងគ្រាន់តែជានយោបាយបញ្ឆោតប៉ុណ្ណោះ។ លោកបណ្ឌិតពន្យល់ថា របបយោធាមីយ៉ាន់ម៉ា ប្រើការលែកលែងទោសនេះ ជាការបញ្ឆោត ដើម្បីឲ្យមតិសាធារណៈ មានការយល់ច្រឡំថា មានការបន្ធូរបន្ថយទោសទៅដល់លោកស្រី អ៊ុងសាន ស៊ូជី និងយកពេលទៅធ្វើអ្វីផ្សេងទៀត។

បើតាមលោកបណ្ឌិត យង់ ពៅ គឺកាលពីដើមឆ្នាំ២០២៣ ដោយមានមតិអន្តរជាតិមួយចំនួនបានសាទរទៅលើការលើកលែងទោសដល់អ្នកជាប់ទោសរាប់ពាន់នាក់ ធ្វើឲ្យសាធារណមតិអន្តរជាតិគិតថា របបយោធាមីយ៉ាន់ម៉ាហាក់បីដូចជាមានការបន្ទន់ឥរិយាបថជាងមុន។ ប៉ុន្តែ ផ្ទុយទៅវិញមិនបានប៉ុន្មានថ្ងៃផង​​ របបយោធាមីយ៉ាន់ម៉ា បែរជាមានការកាត់ទោសប្រហារជីវិតទៅលើសកម្មជននយោបាយមួយចំនួនទៅវិញ។ ហេតុដូច្នេះ ករណីលើកលែងទោសពេលនេះ ក៏មិនខុសគ្នាពីពេលមុនដែរ គ្រាន់តែជានយោបាយបញ្ឆោតមួយប៉ុណ្ណោះ។

លោកបណ្ឌិត យង់ ពៅ បានបន្ថែមថា​ ការប្រើនយោបាយបញ្ឆោតរបស់របបយោធាមីយ៉ាន់ម៉ា ចំពោះមតិជាតិ និងអន្តរជាតិ គឺដើម្បីក្តោបក្តាប់អំណាចបន្ត ឆ្លៀតកៀបសង្កត់ និងដឹកនាំប្រទេសជាបន្តទៀត ដោយមិនព្រមរៀបចំការបោះឆ្នោតតាមការសន្យារបស់ខ្លួន។ លោក មីន អ៊ុងឡាំង ដែលជាមេដឹកនាំរបបយោធាមីយ៉ាន់ធ្លាប់បានសន្យាថា នៅក្នុងអំឡុងខែសីហា ឆ្នាំ២០២៣នេះ នឹងមានរៀបចំការបោះឆ្នោតជាសកល ប៉ុន្តែ លោកមិនបានធ្វើតាមការសន្យរបស់លោកនោះទេ។

សូមបញ្ជាក់ថា ទោះជាមានការលើកលែងទោសចំពោះលោក ស្រី អ៊ុងសាន ស៊ូជី ពីរបបយោធាមីយ៉ាន់ម៉ាចំនួន៥ករណីក៏ដោយ ក៏លោកស្រី នៅតែមិនត្រូវបានដោះលែងឲ្យមានសេរីភាពនោះដែរ ព្រោះមេដឹកនាំរដ្ឋាភិបាលស៊ីវិលដែលមានវ័យ៧៦ឆ្នាំ រូបនេះ នៅបន្តជាប់ក្តីចំនួន១៤ ករណីទៀត ក្នុងចំណោមក្តីសរុបចំនួន១៩ករណី ដែលត្រូវកាត់ទោសឲ្យជាប់ពន្ធនាគារ រយ:ពេល ៣៣ឆ្នាំ ឯណោះ៕