អ្នកតាមដានសង្គម ជំរុញទឹកចិត្តពលរដ្ឋដែលមានលទ្ធភាពបន្តជួយដល់ជនភៀសសឹក និងកងទ័ព

អ្នកតាមដានសង្គម ២រូបបាន បានជំរុញទឹកចិត្តពលរដ្ឋដែលមានលទ្ធភាពឱ្យបន្តជួយដល់ជនភៀសសឹក និងវីរៈកងទ័ពកម្ពុជាដែលឈរជើងតាមបន្ទាត់ព្រំដែនកម្ពុជា-ថៃ ព្រោះនៅមានប្រជាពលរដ្ឋមួយចំនួនមិនទាន់អាចវិលទៅលំនៅឋានវិញ ហើយវីរៈកងទ័ពកម្ពុជាក៏នៅតែបន្តឈរជើង ដើម្បីការពារបូរណភាពទឹកដីជាប់ជានិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះ លោកបណ្ឌិ ឈត ប៊ុនថង អ្នកជំនាញទស្សនវិជ្ជា និងកិច្ចការសង្គម បានជំរុញលើកទឹកចិត្តដល់ប្រជាពលរដ្ឋដែលមានលទ្ធភាព ឱ្យបន្តជួយទៅដល់ជនភៀសសឹក និងវីរៈកងទ័ពកម្ពុជាបន្តទៀត ដើម្បីជួយសម្រួលដល់ជីវភាពរស់នៅរបស់ពួកគាត់។

លោកបណ្ឌិត បានលើកឡើងថា​​ «ថ្វីត្បិតតែកម្ពុជា-ថៃ ឈានដល់ការគោរពបទឈប់បាញ់ ប៉ុន្តែនៅតំបន់ខ្លះប្រជាពលរដ្ឋមិនអាចវិលទៅវិញបានទេ ដោយសារនៅប្រុងជើងការម្ខាងៗនៅតំបន់ខ្លះ ហើយនៅតំបន់ខ្លះត្រូវបានថៃឈរជើងកាន់កាប់នោះក៏យើងមិនអាចទៅបានដែរ ហើយតំបន់ខ្លះទៀតនៅមានគ្រាប់ដែលមិនទាន់ផ្ទុះជាច្រើន និងផ្ទះសម្បែង ហេដ្ឋារចនាសម្ព័នដែលត្រូវបានបំផ្លាញក៏មិនអាចទាន់ទៅវិញបាន»។ ហេតុនេះហើយទាមទាឱ្យមានការឧបត្ថម្ភទៅដល់ពលរដ្ឋដែលខ្វះខាតដើម្បីជួយសម្រួលដល់ជីវភាពរស់នៅរបស់ពួកគាត់។

លោកបណ្ឌិត បានបន្តថា ជនភៀសសឹកដែលនៅសេសសល់ និងអ្នកដែលបានត្រឡប់ទៅលំនៅឋានវិញក្តី គឺសុទ្ធតែប៉ះពាល់។ ដូច្នេះហើយ សម្រាប់បងប្អូនដែលមានសទ្ធា មានសមត្ថភាព មានសមានចិត្ត គួរតែបន្តផ្តល់អំណោយ ចែករំលែកធនធានដែលខ្លួនមានទៅតាមលទ្ធភាពរៀងៗខ្លួន។

ចំណែកលោកបណ្ឌិត យង់ ពៅ អ្នកជំនាញភូមិសាស្ត្រនយោបាយ លើកឡើងថា ស្ថានភាពសង្គ្រាមនៅមិនទាន់បញ្ចប់ ដោយទើបតែមានបទឈប់បាញ់ ហើយជនភៀសសឹកជាង ១០ម៉ឺននាក់ នៅមិនទាន់អាចវិលត្រឡប់ទៅលំនៅឋានវិញ ដោយសារតែថៃបានចូលកាន់កាប់ដោយខុសច្បាប់បណ្តោះអាសន្ន ហើយបំផ្លាញផ្ទះ និងមុខរបររបស់ប្រជាពលរដ្ឋ ព្រមទាំងហេដ្ឋារចនាសម្ព័ន្ធជាដើម។ ដូច្នេះជនភៀសសឹកមិនត្រឹមតែបាត់បង់ផ្ទះនោះទេ ថែមទាំងបាត់បង់មុខរបរថែមទៀត ហើយកងទ័ពជួរមុខក៏ដូចគ្នា គឺនៅត្រូវការការជួយជ្រុំជ្រែងពីសាធារណៈជន និងជនរួមជាតិទាំងក្នុង និងក្រៅប្រទេស នៃជំនួយសប្បុរសដែលធ្លាប់ធ្វើកន្លងមក។

លោកបណ្ឌិត រំពឹងថា ជំនួយសប្បុរសធម៌ នឹងបន្តជួយជ្រុំជ្រែងពលរដ្ឋភៀសសឹក និងវីរៈកងទ័ពបន្តទៀត ក្នុងស្មារតីប្រជាជាតិខ្មែរ រួមសាមគ្គីជាធ្លុងមួយ បន្តស្មារតីជ្រុំជ្រែង ដើម្បីជាកម្លាំងចិត្ត ជាពិសេសកងទ័ពដែលនៅប្រចាំការ តាមលេណដ្ឋាន និងសមរភូមិ គឺត្រូវការទាំងការលើកទឹកចិត្ត និងការជ្រុំជ្រែងសម្ភារៈផ្សេងៗផងដែរ៕

ដោយ៖ គេន ម៉ាលិះ