ឡើ​ង​កាន់រដ្ឋមន្រ្តី​បាន​ប៉ុន្មានថ្ងៃ លោក ឈាង រ៉ា ចុះពិនិត្យ​មូលដ្ឋានសុខាភិបាល តាមបណ្ដាខេត្ដជុំវិញបឹងទន្លេសាប

បន្ទាប់ពីបានចូលកាន់តំណែងជារដ្ឋមន្ដ្រីក្រសួងសុខាភិបាលអាណត្ដិទី៧នេះ លោកសាស្ដ្រាចារ្យ ឈាង រ៉ា បានដឹកនាំថ្នាក់ដឹកនាំក្រសួង ចុះពិនិត្យស្ថានភាពមូលដ្ឋានសុខាភិបាល នៅតាមបណ្ដាខេត្ដនៅជុំវិញបឹងទន្លេសាប ចាប់ពីថ្ងៃទី២៥-២៩ ខែសីហា ឆ្នាំ២០២៣ដើម្បីឆ្លើយតបទៅនឹងតម្រូវការរបស់ប្រជាពលរដ្ឋភ្លាមៗតែម្ដង។

សម្រាប់ជាជំហានដំបូងនេះ លោកសាស្ដ្រាចារ្យ បានចុះពិនិត្យនូវដំណើរការងាររបស់មន្ដ្រីសុខាភិបាល នៅតាមមណ្ឌលសុខភាព និងមន្ទីរពេទ្យបង្អែក នៅខេត្ដកំពង់ឆ្នាំង ពោធិ៍សាត់ និងខេត្ដបាត់ដំបងហើយនឹងបន្ដបេសកកម្មការងារនៅថ្ងៃតាមគោលដៅដែលបានគ្រោងទុក។

បេសកកម្មការងារនេះ ក្នុងគោលបំណងពិនិត្យមើលពីវឌ្ឍនភាពវិស័យសុខាភិបាល​ រួមទាំងបញ្ហាប្រឈមនានាកន្លងមក ដើម្បីជំរុញសេវាថែទាំសុខភាពកាន់តែធានាបាននូវគុណភាព ប្រសិទ្ធភាព និងសុវត្ថិភាពប្រកបដោយសមធម៌​។ ទាំងនេះជាការឆ្លើយតបទៅនឹងយុទ្ធសាស្រ្តបញ្ចកោណ​ ដំណាក់កាលទី១​ របស់រាជរដ្ឋាភិបាលអណត្តិទី៧​ ក្នុងការជំរុញបង្ខិតសេវាថែទាំសុខភាពឱ្យបានកាន់តែគៀកប្រជាពលរដ្ឋ។

ការចុះពិនិត្យពីដំណើរការការងារនេះ លោករដ្ឋមន្ដ្រីសុខាភិបាល ក៏បានធ្វើការណែនាំ និងផ្ដល់អនុសាសន៍គន្លឹះដល់មន្ដ្រីក្រោមឱវាទ ដើម្បីជាពុទ្ធិក្នុងការពង្រឹងនូវសមត្ថភាព និងប្រសិទ្ធភាពនៃការអនុវត្ដការងារកាន់តែប្រសើរ។ ជាមួយគ្នានេះ លោកសាស្ដ្រាចារ្យរដ្ឋមន្រ្តី​ ក៏បានថ្លែងអំណរគុណ និងកោតសរសើរដល់មន្ដ្រីសុខាភិបាលគ្រប់លំដាប់ថ្នាក់ ដែលបានខិតខំបំពេញការងារបម្រើសេវាសុខភាពជូនប្រជាពលរដ្ឋប្រកបដោយស្មារតីក្រមសីលធម៍វិជ្ជាជីវ:ខ្ពស់។

ក្នុងឱកាសដែលលោករដ្ឋមន្ដ្រីសុខាភិបាល ចុះបេសកកម្មក៏បានសំណេះសំណាលជាមួយក្រុមគ្រូពេទ្យ អ្នកជំងឺ និងគ្រួសារអ្នកជំងឺប្រកបដោយភាពស្និទស្នាល​ជាលក្ខណៈគ្រួសារ៕

អត្ថបទ៖សំអឿន