ព័ត៌មានជាតិ

ឯកឧត្ដម ហ៊ុន ម៉ាណែត គ្រោងជួបពលរដ្ឋខ្មែរនៅអាមេរិក ខណៈអញ្ជើញចូលរួមក្នុងមហាសន្និបាតប្រចាំឆ្នាំរបស់ UN

បានផុស

២ ខែ មុន

នៅ

ថ្ងៃសុក្រ ១ កញ្ញា ២០២៣

ដោយ

ឯកឧត្ដមបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ឯកឧត្ដម នឹងអញ្ជើញជួបសំណេះសំណាលជាមួយប្រជាពលរដ្ឋខ្មែរ រស់នៅសហរដ្ឋអាមេរិក នៅខែកញ្ញា ឆ្នាំ ២០២៣នេះ ខណៈឯកឧត្ដមអញ្ជើញចូលរួមមហាសន្និបាតប្រចាំឆ្នាំរបស់អង្គការសហប្រជាជាតិ (UN) នៅសហរដ្ឋអាមេរិកនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់នេះ បានធ្វើឡើងគ្រាដែលឯកឧត្ដមបណ្ឌិត ហ៊ុន ម៉ាណែត អញ្ជើញចុះជួបសំណេះ សំណាលជាមួយកម្មករ-និយោជិតជិត ២ម៉ឺននាក់ នៅក្រុងតាខ្មៅ ខេត្តកណ្តាល នៅព្រឹកថ្ងៃទី ១ ខែកញ្ញា ឆ្នាំ ២០២៣នេះ។

ឯកឧត្ដមបណ្ឌិត ហ៊ុន ម៉ាណែត មានប្រសាសន៍ថា នៅថ្ងៃទី ២០ ខែកញ្ញា ឆ្នាំ ២០២៣ខាងមុខនេះ ឯកឧត្ដម នឹងអញ្ជើញទៅកាន់សហរដ្ឋអាមេរិក ដើម្បីចូលរួមមហាសន្និបាតប្រចាំឆ្នាំរបស់អង្គការសហប្រជាជាតិ និងអញ្ជើញជួបសំណេះសំណាលជាមួយប្រជាពលរដ្ឋខ្មែររស់នៅទីនោះ ផងដែរ។

ឯកឧត្ដមមានប្រសាសន៍បែបនេះថា «ខែ ៩ ថ្ងៃទី ២០ ខ្ញុំចេញទៅក្រៅប្រទេស ជួបជាមួយបងប្អូននៅទីនោះ រំពឹងជួបគ្នាហើយ ជួបគ្នា ខ្ញុំខានទៅអាមេរិកយូរ ហើយក៏មានបងប្អូនខ្លះ គេកំពុងប្រមូលគ្នាទៅស្រែកជេរឲ្យទៅចុះ ខ្ញុំមិនថាអីទេ ដូចខ្ញុំនិយាយអញ្ចឹងកុំទៅធ្វើអីខុសច្បាប់ ប្រយ័ត្នអាមេរិកចាប់»។

នាយករដ្ឋមន្ត្រីកម្ពុជា ក៏បានលើកឡើងដែរថា ចំពោះអ្នករៀបចំធ្វើបាតុកម្មតវ៉ានោះ ត្រូវចេញមុខទទួលខុសត្រូវផង កុំមានបញ្ហាអីរត់ចោលអ្នកចូលរួមធ្វើបាតុកម្មតវ៉ានោះឲ្យសោះ។ «ភាគច្រើនអ្នកដែលចេញឈ្មោះប្រមូលគេធ្វើបាតុកម្ម អត់ដែលមានមុខទេ ដល់ពេលទៅណា ទៅអាហ្វ្រិក ទៅរាំនៅអាហ្វ្រិកបាត់»។ នេះជាការកត់សម្គាល់បន្ថែមរបស់ឯកឧត្ដមបណ្ឌិត ហ៊ុន ម៉ាណែត៕