ព័ត៌មានជាតិ

ក្រសួងអប់រំ បើកការប្រឡងឌីប្លូម ព្រឹកនេះ ជាមួយបេក្ខជនប្រឡងជិត ១៨ ម៉ឺននាក់

បានផុស

៣ years មុន

នៅ

ថ្ងៃចន្ទ ២ តុលា ២០២៣

ដោយ

ក្រសួងអប់រំ យុវជន និងកីឡា ចាប់ផ្ដើមបើកការប្រឡងមធ្យមសិក្សាបឋមភូមិ ឬ ឌីប្លូម នៅព្រឹកថ្ងៃទី ២ ខែតុលា ឆ្នាំ ២០២៣ នេះ ដោយមានបេក្ខជនដាក់ពាក្យប្រឡងសរុបចំនួន ១៧៨ ១៣៤ នាក់ ស្រី ៩៤ ៨០៥ នាក់ មានមណ្ឌលប្រឡង ១ ៧៤៣ មណ្ឌល ចែកជា ៨ ០៩០ បន្ទប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កាន់ ពុទ្ធី អ្នកនាំពាក្យក្រសួងអប់រំ យុវជន និងកីឡា បានឲ្យដឹងថា ក្នុងចំណោមបេក្ខជនចូលរួមប្រឡងចំនួន ១៧៨ ១៣៤ នាក់ ក្នុងនោះមានបេក្ខជនស្វៃរិនចំនួន ១០ នាក់ ស្រី ៦ នាក់ បេក្ខជនបំពេញវិជ្ជាមានចំនួន ៧២៨ នាក់ ស្រី ១៧៥ នាក់ បេក្ខជនគថ្លង់ចំនួន ២៧ នាក់ ស្រី ៨ នាក់ និងបេក្ខជនពិការភ្នែកចំនួន ២២ នាក់ ស្រី ១០ នាក់។

លោកបានបន្តថា ចំនួនដាក់ពាក្យប្រឡងឆ្នាំនេះ បើធៀបទៅនឹងការប្រឡងឆ្នាំមុនឃើញថា មានការកើនឡើង ក្នុងនោះឆ្នាំ ២០២២ មានបេក្ខជនដាក់ពាក្យប្រឡងចំនួន ១៧៤ ៧២៦ នាក់ ស្រី ៩៥ ១២៧ នាក់ បេក្ខជនស្វៃរិន ១៣៦ នាក់ ស្រី ៤៥ នាក់ បេក្ខជនបំពេញវិជ្ជា ១ ០៧៦ នាក់ ស្រី ១៩២ នាក់ ដោយមានមណ្ឌលប្រឡងសរុប ១ ៧២៣ ចែកចេញជា ៧ ៨១៦ បន្ទប់។

លោកបានបន្តទៀតថា ក្នុងចំណោមបេក្ខជនចំនួន ១៧៤ ៧២៦ នាក់ បេក្ខជនមកប្រឡងមានចំនួន ១៦២ ១៦៦ នាក់ ក្នុងនោះបេក្ខជនប្រឡងជាប់មានចំនួន ១៥៣ ៦៤៩ នាក់ ស្មើនឹង ៩៤.៧៥៥។

លោក កាន់ ពុទ្ធី បានបន្ថែមថា សម្រាប់ការប្រឡងឌីប្លូមឆ្នាំនេះក៏មិនខុសពីការប្រឡងមុនៗ ដែរ ដោយក្រសួងអប់រំ នៅតែបន្តប្រគល់សិទ្ធិអំណាច និងការទទួលខុសត្រូវទាំងស្រុងជូនគ្រឹះស្ថានមធ្យមសិក្សាសាធារណៈ និងឯកជននីមួយៗ ដែលមានអនុវិទ្យាល័យ និងវិទ្យាល័យ ក្នុងការរៀបចំដំណើរការប្រឡងដោយខ្លួនឯង ពោលចាប់តាំងពីការរៀបចំប្រធានវិញ្ញាសា ដំណើរការសំណេរ កំណែ ស្រង់បូកពិន្ទុ និងការប្រកាសលទ្ធផលប្រឡងជាដើម។

គួរបញ្ជាក់ថា ការប្រឡងសញ្ញាបត្រមធ្យមសិក្សាបឋមភូមិនៅឆ្នាំនេះ នឹងប្រព្រឹត្តិទៅនៅថ្ងៃទី ០២ ខែតុលា និងប្រកាសលទ្ធផលប្រឡងនៅថ្ងៃទី ០៩ ខែតុលា ឆ្នាំ ២០២៣៕

អត្ថបទ ៖ សំអឿន

Related Topics:ប្រឡងឌីប្លូម ក្រសួងអប់រំ យុវជន និងកីឡា

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា