ឧបនាយករដ្ឋមន្ត្រី នេត សាវឿន បញ្ជាឱ្យទប់ស្កាត់ការនាំចូលគ្រឿងញៀននៅគ្រប់ច្រកឆ្លងដែន

ឧបនាយករដ្ឋមន្ត្រី នេត សាវឿន បានបញ្ជាឱ្យភាគីពាក់ព័ន្ធ ក៏ដូចជាអាជ្ញាធរមានសមត្ថកិច្ច បន្តបង្កើនការត្រួតពិនិត្យ និង ទប់ស្កាត់ការនាំគ្រឿងញៀនចូលកម្ពុជានៅគ្រប់ច្រកទ្វារព្រំដែន ហើយត្រូវបង្ក្រាបឱ្យបានទាន់ពេលវេលា។ ការបញ្ជារបស់លោក នេត សាវឿន ធ្វើឡើងតាមរយៈលិខិតមួយច្បាប់ កាលពីថ្ងៃទី៩ ខែតុលា ក្នុងការណែនាំដល់ភាគីពាក់ព័ន្ធសម្រាប់ការចាត់តាំងអនុវត្តការងារប្រយុទ្ធប្រឆាំងគ្រឿងញៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើម្បីទប់ស្កាត់ការនាំចូលគ្រឿងញៀនឱ្យកាន់តែមានប្រសិទ្ធភាព លោក នេត សាវឿន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានណែនាំដល់អង្គភាព ក៏ដូចជាមន្ត្រីមានសមត្ថកិច្ច ត្រូវបង្កើនការយកចិត្តទុកដាក់លើការត្រួតពិនិត្យនៅតាមច្រកទ្វារព្រំដែនអន្តរជាតិ ពិសេសនៅក្បែរតំបន់ត្រីកោណមាស ដោយត្រូវបន្ថែមឧបករណ៍ សម្ភារបច្ចេកទេស ម៉ាស៊ីនស្កែន សុនខហិតក្លិន ជាដើម។

លោកឧបនាយករដ្ឋមន្ត្រី បានណែនាំឱ្យមានការពង្រឹងសន្តិសុខតាមខ្សែបន្ទាត់ព្រំដែន ទប់ស្កាត់ការនាំគ្រឿងញៀនចូលខុសច្បាប់តាមច្រករបៀង ច្រកទ្វេភាគី ច្រកទ្វារតំបន់ យកចិត្តទុកដាក់លើការនាំគ្រឿងញៀនតាមផ្លូវទឹក លំហសមុទ្រ និងកំពង់ផែអន្តរជាតិ និងបង្កើនការត្រួតពិនិត្យលើបញ្ញើប្រៃសណីយ៍ពីបរទេស និងចេញទៅក្រៅប្រទេស ជាពិសេសការពង្រឹង និងលើកកម្ពស់សមត្ថភាពជាប្រចាំជូនដល់មន្ត្រីនៃកងកម្លាំងមានសមត្ថកិច្ចនៅគ្រប់ច្រកទាំងអស់។

បន្ថែមពីនេះ ឧបនាយករដ្ឋមន្ត្រីរូបនេះ ក៏បានជំរុញដល់ក្រសួងស្ថាប័ន អាជ្ញាធរមានសមត្ថកិច្ចគ្រប់ភាគីពាក់ព័ន្ធ ត្រូវបង្កើនកិច្ចសហប្រតិបត្តិការអន្តរជាតិ និងសហការជាមួយភាគីប្រទេសជាមិត្ត ក្នុងការផ្លាស់ប្តូរព័ត៌មានពាក់ព័ន្ធនឹងការនាំគ្រឿង ញៀនឆ្លងដែន ដើម្បីទប់ស្កាត់ និងបង្ក្រាបឱ្យបានទាន់ពេលវេលាផងដែរ៕