៩ខែ ឆ្នាំនេះ ហ្វេសប៊ុកជិត៦០០គណនី ស្នើសុំកិច្ចអន្តរាគមន៍ពីថ្នាក់ដឹកនាំក្រសួងមហាផ្ទៃ

រយៈពេល៩ខែ ឆ្នាំ២០២៣ មានគណនីហ្វេសប៊ុកជិត៦០០ បានផ្ញើបញ្ហាក្នុងដែនសមត្ថកិច្ចក្រសួងមហាផ្ទៃ ដើម្បីស្នើសុំកិច្ចអន្តរាគមន៍ពីលោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ និងសម្ដេចក្រឡាហោម ស ខេង ដែលជាអតីតរដ្ឋមន្រ្តីនៃក្រសួងនេះ។

របាយការណ៍របស់ក្រុមការងារហ្វេសប៊ុករបស់លោកឧបនាយករដ្ឋមន្ត្រី ស សុខា បានឱ្យដឹងថា ក្នុងរយៈពេល៩ខែ នៅឆ្នាំ២០២៣នេះ ក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់ពលរដ្ឋក្នុងទំព័រហ្វេសប៊ុករបស់លោក ស សុខា និងទំព័រហ្វេសប៊ុកសម្តេច ស ខេង ឧត្តមប្រឹក្សាផ្ទាល់ព្រះមហាក្សត្រ ក្នុងសមត្ថកិច្ចក្រសួងមហាផ្ទៃ​ បានទទួលសំណូមពរ និងសំណួររបស់ប្រជាពលរដ្ឋចំនួន ៥៩៦គណនី។ ក្នុងនោះ ក្រុមការងារ បានទទួលបានការដោះស្រាយ និងបានឆ្លើយតបទៅម្ចាស់គណនីចំនួន ២០៤គណនី និងចំនួន ២៥៦គណនីទៀត កំពុងស្ថិតក្នុងដំណាក់កាលដោះស្រាយ ខណៈសំណូមពរ សំណួរ និងបញ្ហាខ្លះទៀត ត្រូវបានរកឃើញថា ខុសពីសមត្ថកិច្ចរបស់ក្រសួងមហាផ្ទៃ និងបានជូនយោបល់បង្វែរទៅស្ថាប័នមានសមត្ថកិច្ចពាក់ព័ន្ធ។

ដោយឡែក ករណីនៅសេសសល់មិនទាន់បានដោះស្រាយ កាលពីឆ្នាំ២០២០ រហូតដល់ឆ្នាំ២០២២ កន្លងទៅ គឺមានចំនួន ៣៥៤គណនី គឺបានបន្តដំណើរការដោះស្រាយរហូតមកដល់ពេលនេះបានចំនួន ១២៣គណនីបន្ថែមទៀត និងករណីកំពុងបន្តការដោះស្រាយមានចំនួន ២៣១គណនី។ តែយ៉ាងណាក្ដី ក្រុមការងារ ក៏បានស្នើសុំការអធ្យាស្រ័យចំពោះករណីដែលមិនទាន់បានដោះស្រាយចប់សព្វគ្រប់ ដោយក្រុមការងារ នៅតែបន្តប្រឹងប្រែងរួមគ្នាចូលរួមដោះស្រាយ ដោយហេតុថា ករណីខ្លះមានភាពស្មុគស្មាញ និងត្រូវទាមទារពេលវេលាក្នុងការដោះស្រាយ។

ក្រុមការងារហ្វេសប៊ុករបស់លោកឧបនាយករដ្ឋមន្ត្រី ស សុខា បានគូសបញ្ជាក់ថា វឌ្ឍនភាពការងារនេះ អាចសម្រេចបាន ដោយសារកិច្ចខិតខំប្រឹងប្រែង និងការសហការគ្នាដ៏ល្អរវាងថ្នាក់ដឹកនាំ និងមន្ត្រីស្ថិតក្នុងសមត្ថកិច្ចក្រសួងមហាផ្ទៃ ទាំងថ្នាក់ជាតិ និងថ្នាក់ក្រោមជាតិ និងក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់ប្រជាពលរដ្ឋនៅក្នុងទំព័រហ្វេសប៊ុក។ ក្រុមកាងារ ចាត់ទុកការរួមគ្នាដោះស្រាយបញ្ហានានាក្រៅប្រព័ន្ធតុលាការនេះ ជាផ្នែកដ៏សំខាន់ជួយសម្រួលជីវភាពរស់នៅរបស់ពលរដ្ឋ និងរួមគ្នាអភិវឌ្ឍន៍សង្គមជាតិ ផងដែរ៕