ព័ត៌មានជាតិ

វិទ្យាស្ថានពហុបច្ចេកទេសភូមិភាគតេជោសែនស្វាយរៀង ទទួលបានសិស្សជិត ៥០០ នាក់ ចុះឈ្មោះចូលរៀនលើជំនាញចំនួន ១១

បានផុស

២ years មុន

នៅ

ថ្ងៃព្រហស្បតិ៍ ៤ មករា ២០២៤

ដោយ

វិទ្យាស្ថានពហុបច្ចេកទេសភូមិភាគតេជោសែនស្វាយរៀង បានជ្រើសរើសយកជំនាញចំនួន ១១ ដែលសុទ្ធសឹងតែជាជំនាញមានទីផ្សារការងារខ្ពស់ក្នុងខេត្ត និងទទួលបានប្រាក់ចំណូលសមរម្យ ក្នុងការស្វាគមន៍ការបណ្ដុះបណ្ដាលជំនាញវិជ្ជាជីវៈដល់យុវជនមកពីគ្រួសារក្រីក្រ និងគ្រួសារងាយរងហានិភ័យដំបូងរបស់ខ្លួន នៅថ្ងៃទី ១៥ ខែមករា ឆ្នាំ ២០២៤ ខាងមុខ។ នេះជាការលើកឡើងរបស់ លោក មុត ចន្ថា នាយកវិទ្យាស្ថានពហុបច្ចេកទេសភូមិភាគតេជោសែនស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម លោក មុត ចន្ថា ជំនាញទាំង ១១ នោះ មានដូចជា ជាងកំបោរ ការងារកំបោរ ការដំឡើងបណ្ដាញទឹកក្នុងអគារ ការដំឡើងអគ្គិសនីក្នុងអគារ ការផ្សារលោហៈដោយធ្នូអគ្គិសនី បរិក្ខារត្រជាក់ក្នុងគេហដ្ឋាន សេវាថែទាំ និងជួសជុលអគ្គិសនីរថយន្ត ការដំឡើងបញ្ជាម៉ូទ័រអគ្គិសនី សេវាថែទាំកាមេរ៉ាសុវត្ថិភាព ការផ្សារអគ្គិសនី និងការថែទាំ និងជួសជុលរថយន្ត។

លោកបន្ថែមថា «ដោយឡែកក្នុងចំណោមជំនាញទាំង ១១ នេះ វិទ្យាស្ថានសង្កេតឃើញថា មានជំនាញចំនួន ៣ ដែលមានសិស្សចុះឈ្មោះរៀនច្រើនជាងគេ ក្នុងនោះមានការដំឡើងបណ្ដាញអគ្គិសនីក្នុងអគារ បរិក្ខារត្រជាក់ក្នុងគេហដ្ឋាន និងការថែទាំ និងជួសជុលរថយន្ត»។

លោកបន្ថែមទៀតថា ចាប់តាំងតែពីពេលប្រកាសដាក់ឲ្យអនុវត្តជាផ្លូវការនូវការបណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥ លាននាក់ កាលពីថ្ងៃទី ១៤ ខែវិច្ឆិកា ឆ្នាំ ២០២៣ វិទ្យាស្ថានជាតិ បានទទួលយុវជនមកចុះឈ្មោះចូលរៀនបានចំនួន ៥៤៦ នាក់។

លោកបន្តថា សម្រាប់វិទ្យាស្ថានរបស់លោក នឹងបើកឲ្យចូលរៀនដំបូង នៅថ្ងៃទី ១៥ ខែមករា ឆ្នាំ ២០២៤ ខាងមុខនេះ ខណៈវិទ្យាស្ថាន បានត្រៀមខ្លួនរួចជាស្រេចលើការបណ្ដុះបណ្ដាលនៅពាក់កណ្ដាលខែនេះ ទាំងគ្រូបង្រៀន បន្ទប់សិក្សា បន្ទប់អនុវត្ត និងសម្ភារៈបច្ចេកទេសផ្សេងៗ ផងដែរ។

គួរបញ្ជាក់ថា កាលពីថ្ងៃទី ១៤ ខែវិច្ឆិកា ឆ្នាំ ២០២៣ កន្លងទៅ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានដាក់ឲ្យអនុវត្តជាផ្លូវការនូវការបណ្ដុះបណ្ដាលជំនាញវិជ្ជាជីវៈ និងបច្ចេកទេស ទៅដល់គ្រួសារក្រីក្រ និងគ្រួសារងាយរងហានិភ័យ ១,៥ លាននាក់។ ការបណ្ដុះបណ្ដាលនេះ មានរយៈពេល ៤ ខែ សិក្សាដោយឥតគិតថ្លៃ ដោយឡែកយុវជនមកពីគ្រួសារក្រីក្រ និងគ្រួសារងាយរងហានិភ័យ នឹងទទួលបានប្រាក់ឧបត្ថម្ភប្រចាំខែចំនួន ២៨ ម៉ឺនរៀល រហូតដល់រៀនចប់ផងដែរ៕