មេកសិកម្ម ចាត់ប្រតិភូរាជរដ្ឋាភិបាលម្នាក់ឱ្យប្រជុំដោះស្រាយបញ្ហាលក់សត្វចិញ្ចឹមបានថោក ជូនកសិករជាបន្ទាន់

រដ្ឋមន្ត្រីក្រសួងកសិកម្ម លោក ឌិត ទីណា  បានចាត់តាំង លោក តាន់ ផាន់ណារ៉ា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ ឱ្យដឹកនាំកិច្ចប្រជុំបន្ទាន់ជាមួយក្រុមការងារជំនាញ និងភាគីពាក់ព័ន្ធ ស្តីពីតម្រូវការនិងការផ្គត់ផ្គង់សត្វ ការធ្វើបំណែកសាច់តាមប្រភេទនិងស្តង់ដាគុណភាព ដើម្បីទទួលបានតម្លៃបន្ថែម និងធានាស្ថិរភាពតម្លៃទីផ្សារល្អ និងធានាផលចំណេញសមរម្យសម្រាប់អ្នកផលិត ចែកចាយ និងអ្នកបរិភោគ។

រដ្ឋមន្ត្រីក្រសួងកសិកម្មបានចាត់តាំងបែបនេះ នៅក្នុងកិច្ចប្រជុំជាមួយភាគីពាក់ព័ន្ធស្តីពីបញ្ហាទីផ្សារសត្វ សាច់ និងផលិតផលសត្វនៅកម្ពុជា នៅទីស្តីការក្រសួង នាព្រឹកថ្ងៃទី០៤ ខែមករា ឆ្នាំ២០២៤។

សម្រាប់កិច្ចប្រជុំស្ដីពីបញ្ហាទីផ្សារសត្វ សាច់ និងផលិតផលសត្វនៅកម្ពុជានេះ គឺធ្វើឡើងដើម្បីស្វែងយល់ពីស្ថានភាពពិតប្រាកដ និងគោលជំហររបស់ភាគីពាក់ព័ន្ធទាំងអស់ រួមមានអ្នកចិញ្ចឹមសត្វ អ្នកនាំចូល កុងស៊ីឬអ្នកកាប់ អ្នកចែកចាយ និងអ្នកលក់ ដើម្បីឈានទៅដោះស្រាយបញ្ហាទីផ្សារសត្វ។

តាមរយៈកិច្ចប្រជុំនេះ រដ្ឋមន្ត្រីក្រសួងកសិកម្មបានអះអាងនៅចំពោះមុខភាគីពាក់ព័ន្ធថា ក្រសួងនឹងចាត់ចែងឱ្យមានការសិក្សាទីផ្សារគ្រប់ជ្រុងជ្រោយ ដើម្បីវាយតម្លៃឱ្យបានច្បាស់លាស់ពីស្ថានភាព តម្រូវការ និងការផ្គត់ផ្គង់សត្វ ក្នុងខ្សែច្រវាក់ផលិតកម្ម និងតម្លៃ ដើម្បីដោះស្រាយ និងគ្រប់គ្រងបញ្ហានេះឱ្យបានល្អប្រសើរ ដើម្បីផលចំណេញទាំងអស់គ្នា ក៏ដូចជាសុខុមាលភាពសម្រាប់អ្នកបរិភោគ។

ជាការកត់សម្គាល់មួយរយៈចុងក្រោយនេះ ម្ចាស់កសិដ្ឋានចិញ្ចឹមសត្វនៅកម្ពុជាបានត្អូញត្អែរពីបញ្ហាលក់សត្វចិញ្ចឹមដូចជា គោ ជ្រូក បានថ្លៃថោកខុសពីរាល់ដង ខណៈតម្លៃថ្លៃលក់គឺទាបជាងតម្លៃថ្លៃចំណាយ បណ្ដាលឱ្យពួកគាត់មានការខាតបង់ប្រាក់កាសជាដើម៕

ដោយ៖ ង៉ិល ណារ៉ាត់