ព័ត៌មានជាតិ
មន្ទីរអប់រំរាជធានី ទប់ស្កាត់ការឈប់របស់គ្រូ និងសិស្ស ពេលចូលឆ្នាំចិន
មន្ទីរអប់រំ យុវជន និងកីឡារាជធានីភ្នំពេញ បានរៀបចំកិច្ចប្រជុំពង្រឹងការងារមួយចំនួនដល់ គណៈនាយកគ្រឹះស្ថានសិក្សាសាធារណៈដើម្បីពង្រឹង និងទប់ស្កាត់ការឈប់របស់គ្រូ និងសិស្ស ក្នុងឱកាសបុណ្យចូលឆ្នាំប្រពៃណីចិន ដែលនឹងឈានចូលមកដល់នៅថ្ងៃទី៩ ខែកុម្ភៈ ឆ្នាំ២០២៤ នេះ។
លោក ហែម ស៊ីណារ៉េត ប្រធាន មន្ទីរអប់រំ យុវជន និងកីឡារាជធានីភ្នំពេញ មានប្រសាសន៍ថា កាលពីរសៀលថ្ងៃទី៧ ខែមករា ឆ្នាំ២០២៤ នេះ មន្ទីរអប់រំ យុវជន និងកីឡារាជធានីភ្នំពេញ បានរៀបចំកិច្ចប្រជុំពង្រឹងការងារមួយចំនួនដល់គណៈនាយកគ្រឹះស្ថានសិក្សាសាធារណៈ ក្រោមឱវាទមន្ទីរ ដើម្បីពង្រឹង និងទប់ស្កាត់ការឈប់របស់គ្រូ និងសិស្ស ក្នុងឱកាសបុណ្យចូលឆ្នាំប្រពៃណីចិន។
លោកប្រធានមន្ទីរបានបន្តថា នៅក្នុងកិច្ចប្រជុំនោះ លោកបានណែនាំដល់នាយកសាលារួចហើយ ដោយឱ្យសាលានីមួយៗធ្វើការប្រជុំផ្សព្វផ្សាយដល់សិស្ស និងគ្រូឱ្យបានយល់ច្បាស់ ពិសេសនៅពេលម៉ោងគោរទង់ជាតិថា បុណ្យចូលឆ្នាំចិននេះមិនមែនជាថ្ងៃឈប់សម្រាករបស់ខ្មែរយើងទេ។ ដូចនេះលោកគ្រូអ្នកគ្រូត្រូវមកបង្រៀន និងសិស្សានុសិស្សត្រូវមករៀនដូចថ្ងៃធម្មតា មិនមានការឈប់សម្រាកឡើយ ហើយនាយកសាលានីមួយៗត្រូវផ្តល់របាយការណ៍ ២ ដងក្នុង ១ ថ្ងៃ គឺព្រឹកម្តង និងរសៀលម្តង ពីវត្តមានគ្រូ និងសិស្ស។
លោកប្រធានមន្ទីរបានបន្តថា ក្រៅពីនេះកិច្ចប្រជុំ ក៏បានលើកឡើងពីបញ្ហាទប់ស្កាត់សកម្មភាពរបស់សិស្សក្នុងឱកាស ទិវានៃក្តីស្រលាញ់ ១៤ កុម្ភៈ ទប់ស្កាត់សកម្មភាពក្មេងទំនើង និងទប់ស្កាត់បាតុភាពអសកម្មផ្សេងៗទៀតផងដែរ។
លោកស្រី ឃួន វិច្ឆិកា អ្នកនាំពាក្យ ក្រសួងអប់រំ យុវជន និងកីឡា បានលើកទឹកចិត្ត និងជំរុញដល់មាតាបិតា និងអាណាព្យាបាលសិស្សបញ្ជួនកូនៗមករៀនឱ្យបានគ្រប់ៗគ្នានៅថ្ងៃសែនចិន និងបុណ្យចូលឆ្នាំចិន។
លោកស្រីបានបន្តថា ការលើកទឹកចិត្តនេះដោយសារស្ទើរតែរៀងរាល់ឆ្នាំ នៅពេលពិធីសែនចិន និងពិធីបុណ្យចូលឆ្នាំចិនតែងតែមានសិស្សមួយចំនួនបានឈប់សម្រាកដើម្បីទៅចូលរួមដំណើរកម្សាន្តជាមួយក្រុមគ្រួសារ ដែលធ្វើឱ្យខកខានការសិក្សារៀនសូត្រច្រើនថ្ងៃ អាចប៉ះពាល់ដល់ការសិក្សារបស់ពួកគេ ឬអាចរៀនមិនទាន់កម្មវិធីសិក្សា។
លោកស្រីបានណែនាំដល់សាលារៀន ត្រូវអនុវត្តតាមអនុក្រឹត្យឈប់សម្រាកដែលចេញដោយរាជរដ្ឋាភិបាល ហើយសម្រាប់ការស្នើសុំឈប់បន្ទាន់ណាមួយ ត្រូវតែមានការអនុញ្ញាតតាមភាពចាំបាច់ដូចជា គ្រោះទឹកជំនន់ និងប្រធានស័ក្តណាមួយកើតឡើង។ ជាមួយគ្នានេះ ត្រូវគ្រប់គ្រងសិស្សានុសិស្ស និងបញ្ជីវត្តមានផងដែរ។ ដូចនេះសិស្សដែលចង់ឈប់សម្រាក ត្រូវតែសុំច្បាប់ បើមិនដូច្នេះទេនឹងកំណត់ជាការឈប់ដោយអវត្តមាន។
លើសពីនេះ មាតាបិតានិងអាណាព្យាបាល ត្រូវមានការចូលរួមសហការគោរព និងជំរុញឱ្យកុមារ និងសិស្សានុសិស្សគោរពតាមបទបញ្ញាតិ និងបទបញ្ជាផ្ទៃក្នុងដែលដាក់ចេញដោយសាលា និងសេចក្តីណែនាំរបស់ក្រសួងអប់រំ ដើម្បីធានាបាននូវគុណភាព និងប្រសិទ្ធភាព នៃការអប់រំ និងការសិក្សារបស់កូនចៅ៕
អត្ថបទ៖ សំអឿន
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៣ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៦ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៤ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ