ថ្ងៃចូលឆ្នាំចិន សាលានៅភ្នំពេញរៀនធម្មតា ខណៈលែងមានគណៈកម្មការឃ្លាំមើល

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា រាជធានីភ្នំពេញ មានប្រសាសន៍នៅព្រឹកថ្ងៃទី៩ ខែកុម្ភៈនេះថា ដំណើរការសិក្សារបស់សិស្សានុសិស្សនៅតាមសាលាសាធារណៈនានាក្នុងរាជធានីភ្នំពេញនៅព្រឹកថ្ងៃសែនចិននេះ ប្រព្រឹត្តិទៅជាធម្មតា មិនមានសិស្ស ឬគ្រូអវត្តមានច្រើនទេ ខណៈមន្ទីរមិនបានបង្កើតគណៈកម្មការឃ្លាំមើលតាមសាលានៅរាជធានីភ្នំពេញ ដូចឆ្នាំមុន។

លោក ហែម ស៊ីណារ៉េត បានបន្តថា៖ “នៅព្រឹកនេះគឺដំណើរការរៀនជាធម្មតាទេ អត់ទាន់មានបញ្ហាអីទេ ចាំពិនិត្យមើលពេលរសៀល និងស្អែកទៀត ក្រែងលោមានការប្រែប្រួល តែព្រឹកនេះដំណើរការធម្មតា។ នេះគ្រាន់តែជារបាយការណ៍ប្រចាំសាលានីមួយៗប៉ុណ្ណោះ មិនមែនរបាយការណ៍សរុបរួមទេ”។

ប្រធានមន្ទីរអប់រំរាជធានី មានប្រសាសន៍ទៀតថា បុណ្យចូលឆ្នាំចិនឆ្នាំនេះ មន្ទីរមិនបានបង្កើតគណៈកម្មការឃ្លាំមើលតាមសាលានៅរាជធានីភ្នំពេញ ដូចឆ្នាំមុនទេ ដោយឱ្យតាមសាលានានាមានភាពម្ចាស់ការក្នុងការគ្រប់គ្រងការបង្រៀន និងរៀនរៀងៗខ្លួន។ ប៉ុន្តែគណៈគ្រប់គ្រងសាលាទាំងអស់ត្រូវរាយការណ៍ជូនមន្ទីរ តាមគ្រុបតេឡេក្រាម ២ដង ក្នុង ១ថ្ងៃ គឺពេលព្រឹកនិងពេលរសៀល។

លោក ហែម ស៊ីណារ៉េត មានប្រសាសន៍បន្ថែមថា ការណ៍ដែលមន្ទីរឱ្យសាលាម្ចាស់ការដោយខ្លួនឯង ដោយសារកន្លងមកសាលាទាំងអស់គ្រប់គ្រងបានល្អ មិនមានបញ្ហាអ្វីទេ ព្រោះមន្ទីរតែងតែណែនាំដល់នាយកសាលាដោយឱ្យសាលានីមួយៗធ្វើការប្រជុំផ្សព្វផ្សាយដល់សិស្ស និងគ្រូឱ្យបានយល់ច្បាស់ ពិសេសនៅពេលម៉ោងគោរទង់ជាតិថា បុណ្យចូលឆ្នាំចិននេះមិនមែនជាថ្ងៃឈប់សម្រាករបស់ខ្មែរយើងទេ។ ដូចនេះលោកគ្រូអ្នកគ្រូត្រូវមកបង្រៀន និងសិស្សានុសិស្សត្រូវមករៀនដូចថ្ងៃធម្មតា មិនមានការឈប់សម្រាកឡើយ។

លោកស្រី ឃួន វិច្ឆិកា អ្នកនាំពាក្យ ក្រសួងអប់រំ យុវជន និងកីឡា បានលើកទឹកចិត្ត និងជំរុញដល់មាតាបិតា និងអាណាព្យាបាលសិស្សបញ្ជួនកូនៗមករៀនឱ្យបានគ្រប់ៗគ្នានៅថ្ងៃសែនចិន និងបុណ្យចូលឆ្នាំចិន។

លោកស្រីបានបន្តថា ការលើកទឹកចិត្តនេះដោយសារស្ទើរតែរៀងរាល់ឆ្នាំនៅពេលពិធីសែនចិន និងពិធីបុណ្យចូលឆ្នាំចិន តែងតែមានសិស្សមួយចំនួនបានឈប់សម្រាកដើម្បីទៅចូលរួមដំណើរកម្សាន្តជាមួយក្រុមគ្រួសារដែលធ្វើឱ្យខកខានការសិក្សារៀនសូត្រច្រើនថ្ងៃ អាចប៉ះពាល់ដល់ការសិក្សារបស់ពួកគេ ឬអាចរៀនមិនទាន់កម្មវិធីសិក្សា។

លោកស្រីបានណែនាំដល់សាលារៀន ត្រូវអនុវត្តតាមអនុក្រឹត្យឈប់សម្រាកដែលចេញដោយរាជរដ្ឋាភិបាល ហើយសម្រាប់ការស្នើសុំឈប់បន្ទាន់ណាមួយ ត្រូវតែមានការអនុញ្ញាតតាមភាពចាំបាច់ដូចជា គ្រោះទឹកជំនន់ និងប្រធានស័ក្តណាមួយកើតឡើង។ ជាមួយគ្នានេះ ត្រូវគ្រប់គ្រងសិស្សានុសិស្ស និងបញ្ជីវត្តមានផងដែរ។ ដូចនេះសិស្សដែលចង់ឈប់សម្រាកត្រូវតែសុំច្បាប់ បើមិនដូច្នេះទេនឹងកំណត់ជាការឈប់ដោយអវត្តមាន៕

អត្ថបទ៖ សំអឿន